Jer 21 | KaaIBT22L | STEP | Patsha Sedekiya Malkiya ulı Pashxur menen Maaseya ulı ruwxaniy Sefaniyanı Eremiyaǵa jibergende, Eremiyaǵa Jaratqan Iyeden sóz tústi. Pashxur menen Sefaniya Eremiyaǵa:

‏ Jeremiah 21

Jaratqan Iyeniń Erusalimge qarsı shıǵıwı

1 Patsha Sedekiya Malkiya ulı Pashxur menen Maaseya ulı ruwxaniy Sefaniyanı Eremiyaǵa jibergende, Eremiyaǵa Jaratqan Iyeden sóz tústi. Pashxur menen Sefaniya Eremiyaǵa:

2 – Babiloniya patshası Nabuxodonosor bizlerge urıs ashtı. Sol sebepli bizler ushın Jaratqan Iyege jalbarın. Bálkim, Jaratqan Iye bizler ushın burınǵıday ájayıp káramatlarınan birin kórsetip, Nabuxodonosor elimizden sheginer, – dedi.

3 Eremiya olarǵa Sedekiyaǵa mınanı aytıp barıwdı tapsırdı:

4 – Izraildıń Qudayı Jaratqan Iye bılay deydi: «Sizlerdiń sırtqı diywallarıńızdı qamal qılǵan Babiloniya patshasına hám kaldeylerge qarsı qollanıp atırǵan qollarıńızdaǵı qurallardı ózlerińizge qarsı buraman. Olardıń hámmesin bul qalanıń ortasına toplayman. 5 Kúshli bilegim hám sozılǵan qolım meniń ashıwǵa, qáhárge hám ǵázepke minip, Meniń Ózim sizlerge qarsı urısaman. 6 Men bul qalada jasawshılardıń hámmesin: adamlardı da, haywanlardı da joq qılaman. Olar qorqınıshlı illetten qırıladı. 7 Bunnan keyin, – deydi Jaratqan Iye, – Yahuda patshası Sedekiyanı, onıń hámeldarların, bul qalanıń turǵınların, yaǵnıy illetten, qılıshtan hám ashlıqtan aman qalǵanlarınıń hámmesin Babiloniya patshası Nabuxodonosordıń hám janın alıwdı qálegen dushpanlarınıń qolına tapsıraman. Nabuxodonosor olardı qılıshtan ótkeredi, olarǵa rehim etpeydi, janı ashımaydı, ayamaydı».

8 Bul xalıqqa ayt: «Jaratqan Iye bılay deydi: Mine, Men ómir jolı menen ólim jolın usınaman. 9 Bul qalada qalǵan hár bir adam qılıshtan, ashlıqtan hám illetten óledi, al qaladan shıǵıp, ózlerin qamal qılıp turǵan kaldeylerge táslim bolǵan hár bir adam bolsa, janın qutqarıp, ómirin saqlap qaladı. 10 Men bul qalaǵa jaqsılıq qılıw ushın emes, – deydi Jaratqan Iye, – al apatshılıq keltiriw ushın bet burdım. Qala Babiloniya patshasınıń qolına beriledi, ol qalaǵa ot qoyadı».

11 Yahuda patshasınıń úy-ishine ayt: «Jaratqan Iyeniń sózin tıńlań! 12 Háy, Dawıttıń násili, Jaratqan Iye bılay deydi:

Hár kúni azanda ádalattı júzege asırıń,
Jábirlengendi zalımnıń qolınan azat etiń.
Bolmasa, qılǵan jawızlıqlarıńız sebepli,
Ǵázebim ottay lawlap janadı,
Onı hesh kim sóndire almaydı.
13 Háy, oypatlıqtaǵı biyik jartas,
Tegislik ústindegi Erusalim!
Men saǵan qarsıman!
– deydi Jaratqan Iye. –
Sizler: „Kim joqarıdan asıp túsip, bizge qarsı shıǵa aladı?
Kim qorǵanımızǵa kire aladı?“– deysizler.
14 Men sizlerdi is-háreketińizge jarasa jazalayman,
– deydi Jaratqan Iye. –
Toǵaylarıńızǵa ot beremen,
Ot átirapıńızdaǵılardıń hámmesin jalmaydı».