Jer 22 | KaaIBT22L | STEP | Jaratqan Iye maǵan bılay dedi: – Yahuda patshasınıń sarayına bar da, mına sózdi oǵan ayan et:

‏ Jeremiah 22

1 Jaratqan Iye maǵan bılay dedi:

– Yahuda patshasınıń sarayına bar da, mına sózdi oǵan ayan et: 2 «Háy, Dawıttıń taxtında otırǵan Yahuda patshası, sen, hámeldarlarıń hám bul dárwazadan ótetuǵın xalqıń, Jaratqan Iyeniń sózin tıńlań! 3 Jaratqan Iye bılay deydi: Ádalattı hám tuwrılıqtı júzege asırıń. Tonalǵandı eziwshiniń qolınan azat etiń. Kelgindige, jetimge hám jesirge nahaqlıq qılmań hám azar bermeń. Bul jerde ayıpsız qan tókpeń. 4 Eger bul buyrıqtı muqıyat orınlasańız, onda Dawıttıń taxtında otırǵan patshalar atlarǵa hám arbalarǵa minip, olardıń ózleri de, xızmetkerleri de, xalqı da usı saray dárwazalarınan kiredi. 5 Eger bul buyrıqtı orınlamasańız, tiriligim haqı ant ishemen, – deydi Jaratqan Iye, – bul saray qarabaqanaǵa aylanadı.

6 Sebebi Jaratqan Iye Yahuda patshasınıń sarayı tuwralı bılay deydi:

Sen Meniń kózime Giladtay,
Lebanonnıń shıńındaysań.
Biraq Men seni shól dalaǵa,
Adamsız qalaǵa aylandıraman.
7 Saǵan qurtıwshılardı jiberemen,
Hár biriniń qolında quralı bar,
Olar seniń sarayıńa qollanǵan kedr aǵashlarıńdı,
Otqa ılaqtıradı.

8 Kóp milletler bul qala janınan ótkende, bir-birine: „Bul ullı qalanı Jaratqan Iye ne ushın bunday qıldı eken?“– deydi. 9 Olarǵa bılay dep juwap beriledi: „Olar ózleriniń Qudayı Jaratqan Iyeniń kelisimin buzıp, basqa qudaylarǵa tabınıp, olarǵa xızmet etip ketti“».

Shallum patsha tuwralı bildiriw

10 Ólgen patsha ushın joqlaw aytpań, ol ushın aza tutpań,
Jaqsısı, tutqın bolǵan patsha ushın jılań,
Ol qaytıp kelmeydi,
Ana jurtın kórmeydi.

11 Ákesi Ioshiyanıń ornına Yahudanıń patshası bolǵan hám ol jerden shıǵıp ketken Ioshiya ulı Shallum ^{▼▼ Shallum – Ehoaxazdıń basqa atı. 4Pat 23:30 qarań.} tuwralı Jaratqan Iye bılay deydi:

«Ol bul jerge qaytıp kelmeydi. 12 Ol tutqın qılıp alıp barılǵan jerinde óledi hám artıq bul jerdi kórmeydi».

Ehoyakin patsha tuwralı bildiriw

13 Sarayın ádalatsızlıq penen,
Joqarǵı bólmelerin nızamsızlıq penen salǵan,
Jaqın adamların esheyin jumsap,
Miynet haqısın bermegen hásiret shegedi!
14 «Joqarǵı bólmelerin keń qılıp,
Ózim ushın záwlim saray salaman», – deydi birew.
Oǵan kóp aynalar qoyıp,
Kedr aǵashı menen qaplap,
Onı qızıl reńge boyaydı.

15 Kedr aǵashın kóp qollanǵan menen,
Patsha bolıp qalasań ba?
Ákeń toyıp iship-jegeni menen,
Ádil hám tuwrı islerdi isledi,
Sonlıqtan isleri tabıslı boldı.
16 Ol jarlı hám biysharanıń huqıqın qorǵadı,
Sol sebepli abadan turmıs keshirdi.
Meni tanıwdıń mánisi usı emes pe?
– deydi Jaratqan Iye. –
17 Biraq seniń kóziń hám júregiń,
Haram paydanı, ayıpsız qan tógiwdi,
Zulım hám zorlıq qılıwdı qáleydi.

18 Sonlıqtan Jaratqan Iye Yahuda patshası Ioshiya ulı Ehoyakim tuwralı bılay deydi:

«Way-way, tuwısqanım! Way-way, bawırım!» – dep,
Ol ushın joqlaw aytılmaydı.
«Way-way, mırzam! Way-way, taqsırım!» – dep,
Ol ushın joqlaw aytıp jılamaydı.
19 Onıń óligin Erusalim dárwazasınan sırtqa shıǵarıp taslap,
Eshektiń óligin kómgendey etip jerleydi.

Erusalim tuwralı bildiriw

20 Erusalim, Lebanonǵa shıǵıp, páriyad et.
Dawısıń Bashannan esitilip tursın,
Tawlı Abarim jerlerinen páriyad et,
Sebebi barlıq oynaslarıń qırıldı.
21 Abadanshılıqta bolǵanıńda saǵan eskerttim,
Biraq sen: «Men tıńlamayman», – dediń.
Jaslıǵıńnan solay islep,
Meni hesh tıńlamadıń.
22 Barlıq basshılarıńdı samal ushırıp ketedi,
Awqamlaslarıńdı súrgin qılıp alıp ketedi.
Sonda islegen zulımlıqlarıń ushın,
Uyatqa qalıp, shermende bolasań.
23 Háy, Lebanonda jasap,
Onıń kedrine uya salǵan!
Tuwıp atırǵan hayaldıń tolǵaǵı sıyaqlı,
Seni shanshıw tutqanda, azaptan ıńırsıysań!

Exoniyanıń jazalanıwı

24 Óz tiriligim haqı ant ishemen, – deydi Jaratqan Iye, – Háy, Yahuda patshası Ehoyakimniń ulı Exoniya ^{▼▼ Exoniya – Ehoyakinniń basqa atı. 4Pat 24:6 qarań.}, hátte, sen oń qolımdaǵı mór júzigim bolsań da, seni shıǵarıp ılaqtırǵan bolar edim. 25 Men seni janıńda qastı barlardıń hám óziń qorqatuǵınlardıń, Babiloniya patshası Nabuxodonosordıń hám kaldeylerdiń qolına tapsıraman. 26 Seni hám seni tuwǵan anańdı kindik qanıń tambaǵan ózge bir jurtqa ılaqtıraman. Sizler sol jerde ólesiz. 27 Sizler bul jerge qaytıp keliwdi árman qılasız, biraq qaytıp kele almaysız.

28 Mına adam – Exoniya sınıq gúzege,
Kereksiz buyımǵa aylanıp qalǵan ba?
Ne ushın ol hám onıń balaları quwılıp,
Ózleri bilmeytuǵın jerge ılaqtırıp taslandı?

29 Háy elim, elim, elim,
Jaratqan Iyeniń sózin tıńla!
30 Jaratqan Iye bılay deydi:
Bul adamdı zúryadsız,
Ómirinde isi kelispegen adam, dep jazıp qoy.
Sebebi endi onıń násilinen hesh biriniń jolı bolmas.
Hesh biri Dawıttıń taxtına otırmas,
Yahudada húkimdarlıq qılmas.