‏ Jeremiah 23

Ádil shaqa

1Jaylawımdaǵı qoylardı nabıt qılıp, tarqatıp jibergen shopanlar hásiret shegedi! – deydi Jaratqan Iye.

2Sonlıqtan Izraildıń Qudayı Jaratqan Iye Óz xalqın baqqan shopanlar haqqında bılay deydi: «Sizler Meniń súriwimdi daǵıttıńız, olardı tarqatıp jiberip, ǵamxorlıq qılmadıńız. Men sizlerdi jawız islerińiz ushın jazalayman, – deydi Jaratqan Iye. 3– Súriwimnen aman qalǵanların Ózim quwıp jibergen barlıq ellerden jıynap, qaytadan jaylawlarına alıp kelemen. Olar sol jerde kóbeyip, ósip-ónedi. 4Men olardıń ústinen olardı baǵatuǵın shopanlardı qoyaman. Olar endi qorqıp, qáweterge túspeydi hám joytılmaydı, – deydi Jaratqan Iye.

5Mine, sonday kúnler keledi,
– deydi Jaratqan Iye, –
Dawıttıń násilinen ádil bir shaqanı shıǵaraman.
Sol patsha taxtqa otırıp, danalıq penen basqaradı,
Jer júzinde ádalat hám tuwrılıq húkimdarlıq qıladı.
6Sol kúnlerde Yahuda qutqarıladı,
Izrail qáwipsizlikte jasaydı.
Onı „Jaratqan Iye – ádilligimiz“, dep ataydı.

7Sonlıqtan sonday kúnler keledi, – deydi Jaratqan Iye, – artıq: „Izraildı Mısırdan alıp shıqqan tiri Jaratqan Iye haqı ant ishemen“, – dep aytılmaydı. 8Al: „Izrail xalqın arqadaǵı ellerden hám Ózi quwıp jibergen basqa barlıq ellerden alıp shıqqan tiri Jaratqan Iye haqı ant ishemen“, – dep aytılatuǵın boladı. Solay etip, olar óz jerlerinde jasaydı».

Jalǵan payǵambarlar tuwralı

9Payǵambarlar haqqında:
Júregim ishimde parra-parra boldı,
Pútkil súyeklerim qaltıraydı.
Jaratqan Iye sebepli,
Onıń muxaddes sózi sebepli,
Men más adam kibi,
Sharapqa jeńilgen adam kibi boldım.
10Jer buzıqlarǵa tolı,
El nálet zardabınan aza tutpaqta.
Shóldegi jaylawlar kúyip ketken.
Adamlar jaman jolǵa túsip,
Kúshlerin nahaqlıqqa qollanbaqta.

11«Payǵambarlar da, ruwxaniyler de iplas,
Hátte, olardıń jamanlıqların,
Óz Úyimde de kórdim,
– deydi Jaratqan Iye. –
12Sonlıqtan júrgen jolları olarǵa,
Qarańǵılıqtaǵı tayǵaq jolday boladı.
Sol jerde súrnigip, jıǵıladı.
Sebebi olardı jazalaytuǵın jılda,
Olardıń basına apatshılıq jawdıraman,
– deydi Jaratqan Iye. –
13Samariya payǵambarları arasında,
Men mına jerkenishli isti kórdim:
Olar Baaldıń atınan payǵambarshılıq etip,
Xalqım Izraildı joldan azǵırdı.
14Al Erusalim payǵambarları arasında,
Bunnan da qorqınıshlıraq isti kórdim.
Olar buzıqshılıq etip, jalǵanǵa erip,
Jamanlıq qılǵanlardı qollap atır.
Sonlıqtan hesh kim jamanlıqtan qol úzbeydi.
Olardıń hámmesi Men ushın Sodomday,
Onıń turǵınları Gomoraday ▼

▼ Jar 18:16–19:28.

bolıp ketti».

15Sonıń ushın, payǵambarlar haqqında Álemniń Jaratqan Iyesi bılay deydi: «Men bul xalıqqa ashshı juwsan jegizip,
Záhárli suw ishkizemen.
Óytkeni Erusalim payǵambarlarınıń iplaslıǵı,
Pútkil jer júzine jayıldı».

16Sonlıqtan Álemniń Jaratqan Iyesi bılay deydi:
«Payǵambarlar sizlerge sóylegende, qulaq salmań,
Olar sizlerdi bosqa úmitlendiredi.
Olar Meniń sózlerimdi emes,
Ózleri qıyal etken ayanlardı aytıp júr.
17Olar Meniń sózimdi húrmet etpeytuǵınlarǵa,
„Jaratqan Iye: Sizlerde paraxatshılıq boladı, – dep ayttı“, – deydi.
Júrekleriniń qaysarlıǵı menen jasaytuǵınlardıń hámmesine:
„Apat kelmeydi“, – deydi».

18Kim Jaratqan Iyeniń keńesinde qatnasıptı?
Kim Onı kórip, sózin esitipti?
19Mine, Jaratqan Iyeniń ǵázebi dawılday dúbep,
Quyın sıyaqlı zalımlardıń basına dónedi.
20Júrektegi niyetin tolıq iske asırmaǵansha,
Jaratqan Iyeniń ǵázep otı sónbeydi.
Sizler bunı waqtı kelgende anıq túsinesiz.

21«Bul payǵambarlardı Men jibermedim,
Olardıń ózleri ortaǵa shıǵıwǵa asıqtı.
Men hesh nárse aytpasam da,
Olar payǵambarshılıq ete berdi.
22Eger olar Meniń keńesimde bolǵanda,
Xalqıma Meniń sózlerimdi aytıp,
Olardı jaman jollarınan,
Jawızlıqlarınan qaytarǵan bolar edi.

23Men tek jaqın jerde ǵana Quday bolıp,
Alısta Quday emespen be?
– deydi Jaratqan Iye. –
24Qupıya jerge jasırınǵandı,
Meni kórmeydi dep oylaysız ba?
– deydi Jaratqan Iye. –
Aspan menen jerdi Men toltırmayman ba?
– deydi Jaratqan Iye.

25Meniń atımnan jalǵan payǵambarshılıq etken payǵambarlardıń ne aytıp júrgenin esittim. Olar: „Men tús kórdim! Men tús kórdim!“– deydi. 26Ótirik payǵambarshılıqtı aytıp, óz qıyalların járiyalaytuǵın payǵambarlardıń júrektegi jalǵan oy-qıyalları qashanǵa deyin dawam etedi? 27Ata-babaları Baalǵa tabınıw arqalı Meniń atımdı umıtqanı sıyaqlı, olar da bir-birine aytqan túsleri arqalı xalqıma Meniń atımdı umıttırmaqshı boladı. 28Tús kórgen payǵambar túsin aytsın, al Meniń sózimdi esitken, onı sadıq bayan etsin. Kepek penen dánniń arasında úlken ayırmashılıq bar – deydi Jaratqan Iye. 29– Meniń sózim jalınǵa, – deydi Jaratqan Iye, – jartastı maydalaytuǵın shókkishke uqsamay ma? – deydi Jaratqan Iye.

30– Sonıń ushın, – deydi Jaratqan Iye, – Men bir-birinen sózimdi urlaǵan payǵambarlarǵa qarsıman. 31– Awa, Men óz sózlerin aytıp, „Jaratqan Iye ayttı“, deytuǵın payǵambarlarǵa qarsıman, – deydi Jaratqan Iye. 32– Awa, Men jalǵan túsler menen payǵambarshılıq etetuǵınlarǵa qarsıman, – deydi Jaratqan Iye. – Olar óz túslerin aytıp, jalǵan sózleri hám bos úgitleri menen Meniń xalqımdı joldan azǵıradı. Olardı Men jibermedim, olarǵa Men tapsırma bermedim. Olardıń bul xalıqqa hasla paydası joq, – deydi Jaratqan Iye».

Jalǵan payǵambarlardıń jalǵan payǵambarshılıǵı

33«Eger sennen bul xalıq, payǵambar yamasa ruwxaniy: „Jaratqan Iye saǵan qanday awır payǵambarshılıq júkledi?“– dep sorasa, sen olarǵa: „Sizlerdiń ózlerińiz Maǵan júksizler. Men sizlerdi tárk etemen, – deydi Jaratqan Iye“– dep juwap ber. 34Eger bir payǵambar, ruwxaniy yamasa xalıq ishinen biri: „Bul Jaratqan Iyeniń payǵambarshılıq júgi“, – dese, onda Men sol adamdı hám onıń úy-ishin jazalayman. 35Sizler bir-birińizge hám tuwısqan tuwısqanǵa: „Jaratqan Iye ne dep juwap berdi? Yamasa Jaratqan Iye ne dedi?“– dep aytıńlar. 36Biraq bunnan bılay: „Jaratqan Iyeniń payǵambarshılıq júgi“, – degen sózdi qollanbań. Sebebi hár kimniń óz sózi ózine júk boladı. Bul arqalı sizler tiri Qudaydıń, Qudayımız Álemniń Jaratqan Iyesiniń sózin burmalap taslaysız. 37Payǵambardan tek: „Jaratqan Iye saǵan ne dep juwap berdi? Yamasa Jaratqan Iye ne dedi?“– dep sorańlar. 38Eger sizler: „Jaratqan Iyeden kelgen júk“, – dep ayta beretuǵın bolsańız, onda Jaratqan Iye sizlerge bılay deydi: Men sizlerge: „Jaratqan Iyeniń payǵambarshılıq júgi“, – degen sózdi aytpawdı buyırsam da, sizler „Jaratqan Iyeden kelgen júk“, – degen sózdi jáne ayttıńız. 39Sonlıqtan Men joqarıǵa kóterip, sizlerdi ózlerińizge hám ata-babalarıńızǵa bergen qala menen birge dárgayımnan ılaqtırıp taslayman. 40Men sizlerdi máńgige uyatqa qoyıp, máńgige umıtılmaytuǵın shermendelikke qaldıraman».