Jer 24 | KaaIBT22L | STEP | Babiloniya patshası Nabuxodonosor Yahuda patshası Ehoyakimniń ulı Exoniyanı, Yahudanıń basshıların, ónermentshileri menen temirshilerin Erusalimnen Babilonǵa tutqın etip alıp ketkennen soń, Jaratqan Iye maǵan Ibadatxananıń aldına qoyılǵan eki sebet ánjirdi kórsetti.

‏ Jeremiah 24

Eki sebet ánjir

1 Babiloniya patshası Nabuxodonosor Yahuda patshası Ehoyakimniń ulı Exoniyanı, Yahudanıń basshıların, ónermentshileri menen temirshilerin Erusalimnen Babilonǵa tutqın etip alıp ketkennen soń, Jaratqan Iye maǵan Ibadatxananıń aldına qoyılǵan eki sebet ánjirdi kórsetti. 2 Bir sebette erte piser júdá jaqsı ánjirler, ekinshisinde jewge jaramsız jaman ánjirler bar edi.

3 Jaratqan Iye maǵan:

– Eremiya, ne kórip tursań? – dep soradı. Men:

– Ánjir. Jaqsısı júdá jaqsı, al jamanı sonday jaman, hátte, jewge de bolmaydı, – dep juwap berdim.

4 Sonda maǵan Jaratqan Iyeden mınaday sóz tústi: 5 «Izraildıń Qudayı Jaratqan Iye bılay deydi: Bul jerden kaldeylerdiń jerine Men jibergen Yahuda tutqınların usı jaqsı ánjirler dep esaplayman. 6 Olardıń iygiligi ushın, názerim olarda boladı. Olardı usı jerge qaytaraman. Olardı ayaqqa turǵızaman, qulatpayman, otırǵızaman, qoparıp taslamayman. 7 Men olarǵa Jaratqan Iye ekenimdi tanıp biletuǵın júrek beremen. Olar Meniń xalqım, Men olardıń Qudayı bolaman. Sebebi olar shın júrekten Maǵan qaytadı.

8 Men Yahuda patshası Sedekiyanı, onıń basshıların, bul jerde Erusalimniń aman qalǵanların hám Mısır jerine kóship qonıs basqanlardı mına jewge bolmaytuǵın ánjirlerge uqsataman, – deydi Jaratqan Iye. 9 – Men olardıń basına sonday apatshılıq salaman, bunı kórgen jer betindegi barlıq patshalıqlardıń húreyi ushadı. Súrgin qılǵan jerlerimniń hámmesinde olar nasaqqa qalıp, ápsanaǵa aylanadı, masqara bolıp, atı ǵarǵısta qollanılatuǵın boladı. 10 Ózlerine hám ata-babalarına bergen jerimnen joq bolǵansha, olardıń ústine qılısh, ashlıq hám illet dóndiremen».