Jeremiah 25
Jetpis jıllıq súrgin
1Yahuda patshası Ioshiyanıń ulı Ehoyakimniń patshalıǵınıń tórtinshi jılı, Babiloniya patshası Nabuxodonosordıń patshalıǵınıń birinshi jılı Eremiyaǵa pútkil Yahuda xalqı haqqında ayan boldı. 2Payǵambar Eremiya bunı pútkil Yahuda xalqına hám Erusalim turǵınlarına jetkerip, bılay dedi: 3– Mine, jigirma úsh jıldan beri, Yahuda patshası Amon ulı Ioshiyanıń patshalıǵınıń on úshinshi jılınan, usı kúnge deyin Jaratqan Iyeniń sózi maǵan tústi. Men olardı sizlerge qayta-qayta ayttım, biraq sizler tıńlamadıńız. 4Jaratqan Iye Óz qulları bolǵan payǵambarlardı sizlerge qayta-qayta jiberse de, olarǵa qulaq salmadıńız, itibar da bermedińiz. 5Olar arqalı sizlerge bılay dedi: «Endi hár birińiz jawız joldan, natuwrı isler qılıwdan bas tartıń. Sonda Men ózlerińizge hám ata-babalarıńızǵa bergen jerde máńgi-baqıy mákan basasız. 6Basqa qudaylarǵa ermeń, xızmet etpeń hám tabınbań. Qollarıńız benen islegen butlar menen ǵázebimdi keltirmeń. Sonda Men de sizlerge zıyan keltirmeymen». 7«Biraq sizler Meni tıńlamay, – deydi Jaratqan Iye, – qollarıńız benen islegen butlarıńız sebepli ǵázebimdi keltirdińiz hám ózińizge zıyan jetkizdińiz». 8Sonlıqtan Álemniń Jaratqan Iyesi bılay deydi: «Meniń sózlerimdi tıńlamaǵanıńız ushın, 9Men arqadaǵı barlıq xalıqlardı hám Babiloniya patshası bolǵan qulım Nabuxodonosordı shaqıraman, – deydi Jaratqan Iye. – Olardı bul jerdiń pútkil turǵınlarına hám aynalasındaǵı barlıq milletlerge qarsı atlandıraman. Bul xalıqlardı pútkilley joq qılaman hám jerin máńgige qańıratıp taslayman. Olardı kórgenlerdiń júregi suwlap, janı túrshigedi. 10Olardı quwanısh hám shadlıqtan juda qılaman, kelin-kúyewdiń toyınıń sesti esitilmeydi, digirman sesti de tınadı, shıraǵı sónedi. 11Pútkil el qańırap, qorqınıshlı kóriniske aylanadı. Bul milletler jetpis jıl Babiloniya patshasına xızmet etedi. 12Jetpis jıl ótkennen keyin Men Babiloniya patshasın, onıń xalqın hám kaldeylerdiń elin qılǵan qılmısı ushın jazalap, – deydi Jaratqan Iye, – jerin máńgilikke shól dalaǵa aylandıraman. 13Men sol jerge qarsı aytqanlarımnıń hámmesin, bul kitapta jazılǵanlardıń hámmesin, yaǵnıy Eremiyanıń pútkil milletler tuwralı aytqan payǵambarshılıqların ámelge asıraman. 14Kóp milletler hám ullı patshalar olardı qul qıladı. Men olarǵa is-háreketine hám qollarınıń isine say qaytaraman».Jaratqan Iyeniń ǵázep kesesi
15Izraildıń Qudayı Jaratqan Iye maǵan bılay dedi: – Mına Meniń qáhárimniń sharabına tolǵan keseni qolımnan al da, Men seni jiberetuǵın milletlerdiń hámmesine onı ishkiz. 16Olar sol keseden iship, tentirekleydi hám aqılın joytadı. Awa, Men olarǵa qılısh jiberemen. 17Men keseni Jaratqan Iyeniń qolınan alıp, Jaratqan Iye meni jibergen milletlerdiń hámmesine onnan ishkizdim. 18Búgin bolǵanı kibi wayran bolsın, qorqınıshlı jáne jandı túrshiktiretuǵın kóriniske aylansın hám nálet jawsın dep, Erusalimge, Yahuda qalalarına, onıń patshaları menen basshılarına ishkizdim. 19Sonday-aq Mısır patshası faraonǵa, onıń xızmetkerlerine, basshılarına hám pútkil xalqına, 20Mısırda jasap atırǵan barlıq kelgindilerge, Us jeriniń barlıq patshalarına, Filist jerindegi: Ashkelon, Gaza, Ekron patshalarına hám Ashdodtıń aman qalǵanlarınıń patshasına, 21Edomǵa, Moabqa hám ammonlarǵa, 22Tirdiń barlıq patshalarına, Sidonnıń barlıq patshalarına, teńiz jaǵalawlarındaǵı hám atawlardaǵı patshalarǵa, 23Dedanǵa, Temaǵa, Buzǵa hám tulımshaqların kesip júretuǵınlardıń hámmesine, 24barlıq Arabstan patshalarına hám shólde jasaytuǵın aralas qáwimlerdiń barlıq patshalarına, 25Zimriydiń, Elamnıń hám Midiyanıń barlıq patshalarına, 26uzaq-jaqın jerdegi barlıq arqa patshalarına hám jer betindegi barlıq patshalıqlarǵa náwbetpe-náwbet ishkizdim. Bulardıń hámmesinen keyin, Sheshax ▼▼ Sheshax – Babiloniyanıń shártli belgiler tártibi menen jazılǵan ataması.
patshası da ishedi. 27– Sońınan olarǵa ayt: «Izraildıń Qudayı Álemniń Jaratqan Iyesi bılay deydi: Iship, más bolıń, qusıń hám ózlerińizge jiberetuǵın qılıshımnan qaytıp turmaytuǵınday bolıp qulań». 28Eger olar seniń qolıńnan keseni qabıl qılıp, ishiwden bas tartsa, olarǵa ayt: «Álemniń Jaratqan Iyesi bılay deydi: Sózsiz ishesiz! 29Mine, Men Óz atım menen atalǵan qalaǵa apat jiberiwdi basladım. Sizler jazasız qalaman dep oylaysız ba? Jazasız qalmaysız, sebebi Men jer betinde jasap atırǵan hár bir adamǵa qılısh jiberemen, – deydi Álemniń Jaratqan Iyesi». 30Sonlıqtan mına sózlerdiń hámmesin olarǵa payǵambarshılıq etip ayt: «Jaratqan Iye joqarıdan gúrkirep,Muxaddes mákanınan saza beredi.
Óz jaylawındaǵı xalqına bar dawısı menen gúrkireydi.
Pútkil jer beti turǵınlarına qarsı,
Júzim basqılaǵannıń baqırǵanınday baqıradı.
31Aqırıwı jer betiniń ushlarına jetedi,
Sebebi Jaratqan Iyeniń milletlerge dawası bar.
Ol pútkil adamzatqa húkim shıǵarıp,
Zalımlardı qılıshtan ótkeredi, – deydi Jaratqan Iye.
32Álemniń Jaratqan Iyesi bılay deydi:
Qarańlar, apat xalıqtan xalıqqa ótpekte.
Jer betiniń shetinen,
Qorqınıshlı dawıl turmaqta.
33Sol kúni Jaratqan Iyeniń óltirgenleri jerdiń bir shetinen ekinshi shetine deyin jayrap qaladı. Olarǵa joqlaw aytılmaydı, jıynap alınbaydı, jerlenbeydi, tezek sıyaqlı shashılıp jatadı. 34Shopanlar jılap, dad-páriyad qılıń!
Súriwdiń basshıları, kúlge awnań!
Sizlerdiń bawızlanıp, tarqatılatuǵın kúnińiz keldi,
Qulatılıp, qımbatbaha ıdıs sıyaqlı sındırılasız.
35Shopanlar qasha almas,
Súriw basshıları qutılıp ketpes.
36Shopanlardıń páriyad etken dawısı,
Súriw basshılarınıń eńirep jılaǵanları esitilip tur.
Jaratqan Iye olardıń jaylawların jaypap taslap atır.
37Jaratqan Iyeniń lawlaǵan ǵázebi sebepli,
Tınısh jaylawlar nabıt bolmaqta.
38Ol arıslanday bolıp ininen shıqtı.
Onıń lawlaǵan ǵázebinen,
Basqınshılardıń qılıshınan,
Olardıń jeri qańırap bos qaladı».
Copyright information for
KaaIBT22L