‏ Jeremiah 26

Xalıq Eremiyanı óltirmekshi

1Yahuda patshası Ioshiyanıń ulı Ehoyakimniń patshalıǵınıń basında Eremiyaǵa Jaratqan Iyeniń sózi ayan boldı. 2Jaratqan Iye bılay dedi:

– Meniń Úyimniń háwlisine barıp tur da, Yahuda qalalarınan sıyınıw ushın sol jerge kelgenlerdiń hár birine saǵan aytıwdı buyırǵan sózlerimniń birde birewin qaldırmay, hámmesin ayt. 3Olar qulaq salıp, hár biri jaman jolınan qaytıwı múmkin. Sonda Men ırayımnan qaytıp, olardıń jawız isleri ushın jawdırmaqshı bolǵan apattı jibermeymen. 4Olarǵa ayt: «Jaratqan Iye bılay deydi: Eger sizler Meni tıńlamasańız hám ózlerińizge bergen Nızamımdı orınlamasańız, 5qayta-qayta jibergen qullarım bolǵan payǵambarlarımnıń sózlerine qulaq aspawdı dawam etseńiz, 6onda Men bul Úydi Shilo sıyaqlı joq qılaman. Bul qalanı bolsa, jer júziniń pútkil milletleri ushın náletiy qılaman».

7Ruwxaniyler, payǵambarlar hám pútkil xalıq Jaratqan Iyeniń Úyinde Eremiyanıń aytqan bul sózlerin esitti. 8Eremiya Jaratqan Iyeniń pútkil xalıqqa ayt dep ózine buyırǵan sózleriniń hámmesin aytıp bolıwdan, ruwxaniyler, payǵambarlar hám pútkil xalıq Eremiyanı tutıp alıp:

– Sen sózsiz óleseń! 9Nege sen: «Bul Úy Shiloday boladı, al bul qala adamsız qarabaqanaǵa aylanadı», – dep, Jaratqan Iyeniń atınan payǵambarshılıq eteseń? – dedi. Jaratqan Iyeniń Úyinde pútkil xalıq Eremiyanıń aynalasına toplandı.

10Yahuda basshıları bunı esitkende, olar patshanıń sarayınan Jaratqan Iyeniń Úyine keldi hám Jaratqan Iyeniń Úyiniń Taza dárwazasınıń kirer awzındaǵı óz orınlarına otırdı. 11Sonda ruwxaniyler menen payǵambarlar basshılarǵa hám pútkil xalıqqa:

– Óz qulaqlarıńız benen esitkenińizdey, bul adam usı qalaǵa qarsı payǵambarshılıq qıldı. Sonlıqtan bul adam ólim jazasına ılayıqlı! – dedi.

12Sonda Eremiya barlıq basshılarǵa hám pútkil xalıqqa bılay dedi:

– Jaratqan Iye meni bul Úy hám qala haqqında jańa esitken sózlerińizdi payǵambarshılıq etiw ushın jiberdi. 13Endi jollarıńızdı hám islerińizdi dúzetip, Qudayıńız Jaratqan Iyege qulaq salıń. Sonda Jaratqan Iye de ırayınan qaytıp, sizlerge jiberemen degen apatın jiberiwden waz keshedi. 14Maǵan kelsek, men sizlerdiń qolıńızdaman, kózińizge ne jaqsı hám durıs bolıp kórinse, sonı isleń. 15Biraq mınanı bilip qoyıń: eger meni óltirseńiz, bul qala da, onıń turǵınları da, sizler de tógilgen biygúna qan ushın juwapker bolasız. Haqıyqattan da, bul sózlerdiń hámmesin qulaǵıńızǵa jetkeriw ushın meni Jaratqan Iye sizlerge jiberdi.

16Sonda basshılar menen pútkil xalıq ruwxaniyler menen payǵambarlarǵa:

– Bul adam ólimge húkim etilmewi kerek. Ol bizlerge Qudayımız Jaratqan Iyeniń atınan sóyledi, – dedi.

17Sonda sol jerdiń aqsaqallarınan bir neshesi aldıǵa shıǵıp, jıynalǵan xalıqqa bılay dedi:

18– Yahuda patshası Xizkiyanıń dáwirinde moreshetli Mixa payǵambarshılıq etip, pútkil Yahuda xalqına bılay degen edi: «Álemniń Jaratqan Iyesi bılay deydi:

Sion egin maydanı kibi súrilip,
Erusalim qarabaqanaǵa aylanadı,
Ibadatxana turǵan tawdı,
Toǵay qaplaydı» ▼

▼ Mix 3:12.

.

19Bunıń ushın Yahuda patshası Xizkiya yamasa Yahuda xalqınan biri Mixanı óltirip pe edi? Qaytama, Xizkiya Jaratqan Iyeden qorqıp, Onnan rehim soraǵan joq pa edi? Jaratqan Iye de ırayınan qaytıp, olarǵa jiberemen degen apatın jibermey qoyǵan joq pa edi? Bizler bolsaq, ózimizge úlken apat jawdırayın dep turmız.

20Kiryat-Yarimnen Shemaya ulı Uriya degen bir adam da Jaratqan Iyeniń atınan payǵambarshılıq qılıp júrgen edi. Ol da tap Eremiyaǵa uqsap, bul qala hám elge qarsı payǵambarshılıq qıldı. 21Patsha Ehoyakim óziniń áskerbasıları hám barlıq hámeldarları menen onıń sózlerin esitkende, onı óltirmekshi boldı. Uriya bunı esitkende qorqıp ketip, Mısırǵa qashıp ketti. 22Patsha Ehoyakim Axbor ulı Elnatandı bir neshe adamlar menen Mısırǵa jiberdi. 23Olar Uriyanı Mısırdan alıp shıǵıp, Ehoyakim patshaǵa alıp keldi. Ol Uriyanı qılısh penen óltirip, denesin qarapayım xalıq jerlenetuǵın mazarǵa ılaqtırdı.

24Biraq Shafan ulı Axiqam Eremiyanı qorǵaǵanı sebepli, Eremiya óltiriliw ushın xalıqtıń qolına berilmedi.