Jer 27 | KaaIBT22L | STEP | Yahuda patshası Ioshiyanıń ulı Sedekiyanıń patshalıǵınıń basında Eremiyaǵa Jaratqan Iyeden mına sóz tústi.

‏ Jeremiah 27

Yahudanıń Nabuxodonosorǵa beriliwi

1 Yahuda patshası Ioshiyanıń ulı Sedekiyanıń ^{▼▼ Sedekiya – Bazı qoljazbalarda «Ehoyakim».} patshalıǵınıń basında Eremiyaǵa Jaratqan Iyeden mına sóz tústi. 2 Jaratqan Iye maǵan bılay dedi:

– Qayıs penen aǵashtan moyıntırıq islep, onı moynıńa taq. 3 Sońınan Erusalimdegi Yahuda patshası Sedekiyaǵa kelgen elshiler arqalı Edom, Moab, Ammon, Tir hám Sidon patshalarına xabar jiber. 4 Elshilerge óz mırzalarına mına xabardı bildiriwin buyır: «Izraildıń Qudayı Álemniń Jaratqan Iyesi bılay deydi: Mırzalarıńızǵa mınanı aytıńlar: 5 Bul dúnyanı, jer betinde jasap atırǵan adamlardı hám haywanlardı Men ullı qúdiretim hám sozılǵan qolım menen jarattım. Solay eken, onı qálegen adamıma beremen. 6 Endi bul jerlerdiń hámmesin Babiloniya patshası qulım Nabuxodonosorǵa berdim. Hátte, jabayı haywanlardı da onıń ıqtıyarına tapsırdım. 7 Onıń eliniń aqırǵı kúni kelgenshe, barlıq milletler onıń ózine, ulına hám aqlıǵına xızmet etedi. Keyin kóp milletler hám ullı patshalar onıń ózin qul qıladı.

8 Eger qanday da bir millet yamasa patshalıq Babiloniya patshası Nabuxodonosorǵa xızmet etpese, onıń moyıntırıǵın taqpasa, sol milletti Men bul patshanıń qolı menen joq qılmaǵanımsha, qılısh, ashlıq hám illet penen jazalayman, – deydi Jaratqan Iye. 9 – Sonıń ushın: „Babiloniya patshasına xızmet qılmaysız“, – dep atırǵan payǵambarlarıńızǵa, palkerlerińizge, tús jorıwshılarıńızǵa, boljawshılarıńızǵa, sıyqırshılarıńızǵa qulaq salmań. 10 Olar sizlerge jalǵan payǵambarshılıq qılıp atır. Bunıń nátiyjesinde, Men sizlerdi elińizden aydap shıǵıp, súrgin qılaman, aqıbette nabıt bolasız. 11 Biraq Babiloniya patshasınıń moyıntırıǵın taǵıp, oǵan xızmet etken milletti óz jerinde qaldıraman, – deydi Jaratqan Iye. – Olar óz jerinde jasap, óz jerine islew beredi».

12 Men Yahuda patshası Sedekiyaǵa da sol sózlerdi aytıp bılay dedim: «Babiloniya patshasınıń moyıntırıǵın taǵıp alıń, oǵan hám onıń xalqına xızmet etip, tiri qalıń. 13 Jaratqan Iye Babiloniya patshasına xızmet etpegen hár bir milletti óltiretuǵının aytqan edi. Solay eken, sizge hám xalqıńızǵa qılıshtan, ashlıqtan hám illetten nabıt bolıwdıń nege keregi bar? 14 „Babiloniya patshasına xızmet qılma“, – dep aytıp atırǵan jalǵan payǵambarlardıń sózlerine qulaq aspań. Olar jalǵan payǵambarshılıq qılıp atır. 15 Olardı Men jibermedim, – deydi Jaratqan Iye, – biraq olar Meniń atımnan jalǵan payǵambarshılıq qılıp atır. Sonlıqtan Men sizlerdi quwıp jiberemen. Sizler hám sizlerge payǵambarshılıq etip atırǵan payǵambarlarıńız nabıt bolasız».

16 Sońınan men ruwxaniylerge hám pútkil xalıqqa qarata sóyledim: «Jaratqan Iye bılay deydi: „Jaqında Jaratqan Iyeniń Úyindegi zatlar Babilonnan qaytıp alıp kelinedi“, – dep atırǵan payǵambarlarǵa qulaq salmań. Olar sizlerge jalǵan payǵambarshılıq qılmaqta. 17 Olarǵa qulaq salmań. Babiloniya patshasına xızmet etiń hám aman qalıń. Ne ushın bul qala qarabaqanaǵa aylanıwı kerek? 18 Eger olar payǵambar bolsa, olarda Jaratqan Iyeniń sózi bolsa, onda olar Jaratqan Iyeniń Úyinde, Yahuda patshasınıń sarayında hám Erusalimde qalǵan zatlardıń Babilonǵa alıp ketilmewin sorap, Álemniń Jaratqan Iyesine jalbarınsın.

19 Álemniń Jaratqan Iyesi Ibadatxanadaǵı qoladan islengen zatlar: óreler, háwiz, túbeldirik, bul qalada qalǵan basqa zatlar tuwralı aytadı. 20 Babiloniya patshası Nabuxodonosor Yahuda patshası Ehoyakimniń ulı Exoniyanı, Yahudanıń hám Erusalimniń barlıq aqsúyeklerin Erusalimnen Babilonǵa súrgin etip alıp ketkende, ayırım zatlardı qaldırıp ketken edi. 21 Awa, Izraildıń Qudayı Álemniń Jaratqan Iyesi Óz Úyinde, Yahuda patshasınıń sarayında hám Erusalimde qalǵan sol zatlar tuwralı bılay deydi: 22 „Olar Babilonǵa alıp ketiledi. Men olarǵa názer awdarmaǵanımsha, olar sol jerde qaladı, – deydi Jaratqan Iye. – Keyin Men olardı qaytarıp alıp kelemen“».