Jer 28 | KaaIBT22L | STEP | Sol jılı, tórtinshi jıldıń besinshi ayında, Yahuda patshası Sedekiyanıń patshalıǵınıń basında, gibonlı Azzur ulı payǵambar Xananiya Jaratqan Iyeniń Úyindegi ruwxaniyler menen xalıqtıń aldında maǵan bılay dedi:

‏ Jeremiah 28

Jalǵan payǵambar Xananiya

1 Sol jılı, tórtinshi jıldıń besinshi ayında, Yahuda patshası Sedekiyanıń patshalıǵınıń basında, gibonlı Azzur ulı payǵambar Xananiya Jaratqan Iyeniń Úyindegi ruwxaniyler menen xalıqtıń aldında maǵan bılay dedi:

2 – Izraildıń Qudayı Álemniń Jaratqan Iyesi bılay deydi: «Babiloniya patshasınıń moyıntırıǵın sındıraman. 3 Eki jıl ótpey, Babiloniya patshası Nabuxodonosor bul jerden Babilonǵa alıp ketken Jaratqan Iyeniń Úyine tiyisli zatlardıń hámmesin qaytarıp alıp kelemen. 4 Jáne Yahuda patshası Ehoyakimniń ulı Exoniya menen Babiloniyaǵa súrgin etilgen pútkil yahudalılardı bul jerge qaytarıp alıp kelemen, – deydi Jaratqan Iye. – Men Babiloniya patshasınıń moyıntırıǵın sındırıp taslayman».

5 Sonda men, Eremiya payǵambar Jaratqan Iyeniń Úyinde turǵan ruwxaniylerdiń hám pútkil xalıqtıń aldında payǵambar Xananiyaǵa 6 bılay dedim:

– Awmiyin! Jaratqan Iyeniń aytqanı kelsin! Jaratqan Iye Óz Úyinen alıp ketilgen zatlardı hám tutqınlardı Babilonnan bul jerge qaytarıp, seniń payǵambarshılıq etip aytqan sózlerińdi ámelge asırsın. 7 Biraq meniń saǵan hám mına xalıqtıń hámmesine aytatuǵın sózimdi tıńla. 8 Mennen de, sennen de burın jasap ketken payǵambarlar kóp jerlerge hám ullı patshalıqlarǵa qarsı urıs, ashlıq hám illet boladı dep payǵambarshılıq etken. 9 Biraq tınıshlıq boladı, dep payǵambarshılıq etken payǵambardıń sózi júzege asqannan keyin ǵana, sol payǵambardı haqıyqattan da Jaratqan Iye jibergeni belgili bolǵan edi.

10 Sonda Xananiya payǵambar Eremiya payǵambardıń moynındaǵı moyıntırıqtı alıp, sındırdı da, 11 toplanıp turǵan xalıqqa bılay dedi:

– Jaratqan Iye bılay deydi: «Eki jıl ótpey, Men Babiloniya patshası Nabuxodonosordıń moyıntırıǵın barlıq milletlerdiń moynınan alıp, usılay sındıraman».

Bunnan keyin, Eremiya óz jolı menen ketti.

12 Xananiya payǵambar Eremiya payǵambardıń moynındaǵı moyıntırıqtı sındırǵanınan keyin kóp ótpey, Eremiyaǵa Jaratqan Iyeden sóz tústi:

13 – Barıp, Xananiyaǵa ayt: «Jaratqan Iye bılay deydi: Sen aǵashtan islengen moyıntırıqtı sındırdıń, endi onıń ornın temirden islengen moyıntırıq iyeleydi. 14 Izraildıń Qudayı, Álemniń Jaratqan Iyesi bılay deydi: Men bul milletlerdiń hámmesin Babiloniya patshası Nabuxodonosorǵa xızmet etiwge májbúrlew ushın, moynına temir moyıntırıq saldım, olar oǵan xızmet etedi. Hátte, jabayı haywanlardı da onıń ıqtıyarına tapsırdım».

15 Eremiya payǵambar Xananiya payǵambarǵa bılay dedi:

– Qulaq sal, Xananiya! Seni Jaratqan Iye jibermedi, sen bul xalıqtı jalǵanǵa iseniwge májbúr qıldıń. 16 Sonıń ushın Jaratqan Iye bılay deydi: «Men seni jer betinen sıpırıp taslayman. Jaratqan Iyege qıyanet etiwge shaqırǵanıń ushın, usı jılı-aq óleseń».

17 Solay etip, sol jıldıń jetinshi ayında Xananiya dúnyadan ótti.