‏ Jeremiah 29

Súrgindegilerge jazılǵan xat

1Payǵambar Eremiya Erusalimnen Babiloniyaǵa Nabuxodonosor tárepinen tutqın qılıp alıp ketilgen tutqınlar arasında aman qalǵan aqsaqallarǵa, ruwxaniylerge, payǵambarlarǵa hám pútkil xalıqqa Erusalimnen xat jolladı. 2Bul xat Exoniya patsha menen onıń anası, saray xızmetkerleri, Yahuda hám Erusalim basshıları, ónermentshiler hám temirshiler Erusalimnen súrgin etilgennen keyin jazıldı. 3Xat Yahuda patshası Sedekiyanıń Babiloniya patshası Nabuxodonosorǵa jibergen adamları, Shafan ulı Elasa hám Xilkiya ulı Gemariya arqalı berip jiberildi. Xatta bılay dep jazılǵan edi:

4«Izraildıń Qudayı Álemniń Jaratqan Iyesi Ózi Erusalimnen Babiloniyaǵa súrgin etken hár bir adamǵa bılay deydi: 5Úyler qurıp, ornalasıń, baǵ egip, onıń jemisin jeń. 6Úylenip, ul-qızlı bolıń. Ullarıńızdı úylendirip, qızlarıńızdı turmısqa beriń. Olardan da ullar hám qızlar dúnyaǵa kelsin. Ol jerde azaymań, qayta kóbeyiń. 7Men sizlerdi tutqın etip jibergen qalanıń abadanshılıǵın tileń. Ol qala ushın Jaratqan Iyege duwa etiń, sizlerdiń abadan turmıs keshiriwińiz onıń abadanshılıǵına baylanıslı.

8Izraildıń Qudayı Álemniń Jaratqan Iyesi bılay deydi: Arańızdaǵı payǵambarlar menen palkerlerińizge ózińizdi aldatpań. Olar kórgen túslerin aytqanda qulaq salmań. 9Olar Meniń atım menen sizlerge jalǵan payǵambarshılıq aytadı. Olardı Men jibermedim, – deydi Jaratqan Iye.

10Jaratqan Iye bılay deydi: Babiloniyada bolǵanıńızǵa jetpis jıl tolǵanda, Men sizlerge názer awdarıp, sizlerdi usı jerge qaytarıp alıp kelemen degen iygilikli wádemdi orınlayman. 11Men sizler ushın dúzgen jobalarımdı Ózim bilemen, – deydi Jaratqan Iye. – Bul jobalarım sizlerge apat emes, al abadanshılıq alıp keledi, keleshekke úmit baǵıshlaydı. 12Sonda sizler Meni shaqırasız, kelip, Maǵan duwa etesiz. Men de sizlerdi esitemen. 13Sizler Meni izleysiz, eger shın júrekten izleseńiz, tabasız. 14Awa, Meni tabasız, – deydi Jaratqan Iye. – Men sizlerdiń abadanshılıǵıńızdı qayta tikleymen. Men sizlerdi quwǵın qılǵan jerlerimniń hámmesinen, barlıq milletler arasınan jıynap alaman, – deydi Jaratqan Iye. – Men sizlerdi qay jerden súrgin qılǵan bolsam, sol jerge qaytıp alıp kelemen.

15Biraq sizler: „Jaratqan Iye Babiloniyada bizlerge payǵambarlar berdi“, – deysiz. 16Jaratqan Iye Dawıttıń taxtında otırǵan patsha haqqında, bul qalada qalǵan pútkil xalıq haqqında, sizler menen súrginge ketpegen tuwısqanlarıńız haqqında bildirdi. 17Álemniń Jaratqan Iyesi bılay deydi: Men olarǵa qılısh, ashlıq hám illet jiberdim. Olardı jewge bolmaytuǵın shirik ánjirdey qılaman. 18Qılısh, ashlıq hám illet penen olardıń izinen quwıp, jer betindegi barlıq patshalıqlardıń húreyin ushıraman. Men olardı quwıp jibergen milletler arasında olar ǵarǵısqa qaladı, qorqınıshlı hám jandı túrshiktiretuǵın kóriniske aylanıp, nasaqqa qaladı. 19Sebebi olar Meniń sózlerimdi hám qayta-qayta ózlerine jibergen qullarım payǵambarlardıń sózlerin tıńlamadı, – deydi Jaratqan Iye.

20Sonlıqtan háy, barlıq súrgindegiler, Erusalimnen Babiloniyaǵa súrgin qılǵanlarım, Jaratqan Iyeniń sózin tıńlań! 21Meniń atım menen sizlerge jalǵan payǵambarshılıq qılǵan Qolaya ulı Axab penen Maaseya ulı Sedekiya haqqında Izraildıń Qudayı Álemniń Jaratqan Iyesi bılay deydi: Olardı Babiloniya patshası Nabuxodonosorǵa táslim etemen. Ol ekewin de sizlerdiń kóz aldıńızda óltiredi. 22Solay etip, Yahudadan Babilonǵa súrgin etilgenler arasında: „Jaratqan Iye seni Babiloniya patshası tiriley otta jaqqan Sedekiya hám Axabtay qılsın“, – degen ǵarǵıs payda boladı. 23Olar Izrailda jaramas islerdi isledi, qońsılarınıń hayalları menen buzıqshılıq qıldı, Men buyırmasam da, Meniń atımnan jalǵan sózlerdi ayttı. Men bulardı bilemen hám Ózim olarǵa gúwaman, – deydi Jaratqan Iye».

Shemaya tuwralı bildiriw

24– Nexelamlı Shemayaǵa aytıńlar: 25«Izraildıń Qudayı Álemniń Jaratqan Iyesi bılay deydi: Sen Erusalimdegi pútkil xalıqqa, Maaseyanıń ulı ruwxaniy Sefaniyaǵa hám basqa barlıq ruwxaniylerge ózińniń atıńnan bılay dep xatlar jollapsań:

26„Ruwxaniy Ehoyadanıń ornına Jaratqan Iye seni ruwxaniy etip tayınladı. Jaratqan Iyeniń Úyiniń qadaǵalawshısı sıpatında, ózin payǵambar etip kórsetken hár bir telbeni kisenlep, temir buǵaw menen buǵawlawıń kerek. 27Solay eken, ne ushın arańızda payǵambarshılıq qılıp júrgen anatotlı Eremiyaǵa shara kórmedińiz? 28Sebebi ol bizlerge, Babiloniyaǵa xat jollap: Súrgin uzaq dawam etedi. Ózlerińizge úyler qurıp, olarda jasańlar. Baǵlar otırǵızıp, olardıń miywesin jeńler, – dep jazıptı“».

29Ruwxaniy Sefaniya bul xattı payǵambar Eremiyaǵa esittirip oqıdı. 30Sonda Eremiyaǵa Jaratqan Iyeden sóz tústi:

31– Súrgindegilerdiń hámmesine mına xattı jiber:

«Jaratqan Iye nexelamlı Shemaya haqqında bılay deydi: Men onı jibermegen bolsam da, Meniń atımnan sizlerge payǵambarshılıq qılıp, jalǵanǵa isendirdi. 32Men nexelamlı Shemayanı hám onıń urpaqların jazalayman. Onıń áwladınan hesh biri bul xalıq arasında jasamaydı hám xalqıma isleytuǵın jaqsılıǵımdı kórmeydi, – deydi Jaratqan Iye. – Sebebi ol Maǵan qarsı sóyledi».