‏ Jeremiah 3

Opasız Izrail

1«Eger birew hayalı menen ajırassa,
Hayal ketip, basqa birewge turmısqa shıqsa,
Birinshi kúyewi onı qayta hayallıqqa alar ma edi?
Bul arqalı jer pútkilley haramlanbay ma? ▼

▼ Nzm 24:1-4.

Sen kópler menen oynaslıq qıldıń,
Endi Maǵan qaytıp kelmekshimiseń?
– deydi Jaratqan Iye. –
2Kóz jiberip, taqır tóbelerge názer sal,
Sen buzıqshılıq qılmaǵan orın qalıp pa?
Shóldegi qaraqshı sıyaqlı,
Jol shetinde otırıp, oynaslarıńdı ańlıdıń.
Buzıqshılıǵıń hám jawız isleriń menen,
Jerdi haramladıń.
3Sonlıqtan jawın jawmadı,
Báhárdegi nóser de quymadı.
Sen namıssız jezókshege uqsadıń,
Uyattıń ne ekenin bilmediń.
4Endi bolsa: „Áke, jaslıǵımnan Sen meniń dostım ediń,
5Qáháriń máńgige dawam ete bere me?“– deyseń.
Usılay ayta tura,
Qolıńnan kelgen jamanlıqlardı isley bereseń».

Yahudanıń Izrailǵa eriwi

6Ioshiya patshanıń dáwirinde Jaratqan Iye maǵan bılay dedi:

– Sen opasız Izraildıń islegen islerin kórdiń be? Ol hár bir biyik tóbeshikte hám hár bir qoyıw japıraqlı terektiń astında buzıqshılıq qıldı. 7Bulardı islep bolǵannan keyin, ol maǵan bet burar dep oylaǵan edim. Biraq ol qaytpadı, bunı biyopa sińlisi Yahuda da kórdi. 8Islegen barlıq buzıqshılıǵı ushın, Men opasız Izrailǵa talaq xat berip, quwıp jibergenimde de, onıń biyopa sińlisi Yahuda bunnan qorqpastan, buzıqshılıq islegenin kórdim. 9Buzıqshılıq Izrail ushın hesh nárse emestey bolıp kórindi, ol tas hám aǵashlar menen buzǵınlıq islep, jerdi haramladı. 10Bulardıń hámmesine qaramastan, Izraildıń biyopa sińlisi Yahuda shın júrekten emes, al jalǵannan Maǵan qaytıp keldi, – deydi Jaratqan Iye.

11Jaratqan Iye maǵan bılay dedi:

– Opasız Izrail biyopa Yahudadan ádilirek bolıp shıqtı. 12Barıp, bul sózlerdi arqaǵa járiyala: «Opasız Izrail, Maǵan qayt! – deydi Jaratqan Iye. – Men miyrimlimen, endi saǵan ǵázebimdi shashpayman, – deydi Jaratqan Iye. – Máńgige qáhárlenip júrmeymen. 13Tek ayıbıńdı moyınla: Sen Qudayıń Jaratqan Iyege qarsı bas kóterdiń, hár bir qoyıw japıraqlı terektiń astında basqa qudaylarǵa kewil berdiń. Meniń dawısıma qulaq aspadıń, – deydi Jaratqan Iye.

14Háy biyopa xalıq, Maǵan qayt! – deydi Jaratqan Iye. – Sebebi Men seniń xojayınıńman. Men sizlerdi qaladan birewden, urıwdan ekewden alıp shıǵarıp, Sionǵa alıp baraman. 15Sizlerge Óz kewlimdegidey shopanlardı beremen. Olar sizlerdi bilim hám túsinik penen baǵadı. 16Sizler bul jerde ósip-ónip, san-sanaqsız bolǵanıńızda, – deydi Jaratqan Iye, – xalıq Jaratqan Iyeniń Kelisim sandıǵı tuwralı aytpaytuǵın boladı. Ol tuwralı endi oylamaydı, eske de almaydı, onı kúsemeydi, jáne qaytadan onı soqpaydı. 17Sol waqıtta Erusalim Jaratqan Iyeniń taxtı dep ataladı hám Jaratqan Iyeniń atı húrmeti pútkil milletler Erusalimge jıynaladı. Bunnan bılay, olar jawız júrekleriniń qıńırlıǵın qılmaydı. 18Sol kúnlerde Yahuda xalqı menen Izrail xalqı birigip, arqadaǵı jerlerden shıǵıp, Men ata-babalarına múlik etip bergen jerge keledi.

19Men sizlerdi de balalarım qılıp alıp,
Ájayıp bir jerdi,
Barlıq milletlerdiń gózzal miyrasların bermekshi edim.
Sizler Meni „Ákem“deysiz,
Mennen hesh júz burmaysız, dep oylaǵan edim.
20Biraq hayaldıń kúyewine opasızlıq qılǵanı sıyaqlı,
Izrail xalqı, sizler de Maǵan opasızlıq qıldıńız!
– deydi Jaratqan Iye.

21Jalańash tóbelerden bir dawıs esitiledi,
Bul Izrail xalqınıń ahıw-nalası menen páriyadı.
Óytkeni olar joldan shıqtı,
Qudayı Jaratqan Iyeni umıttı.

22Háy, biyopa perzentler, keri qaytıńlar,
Men sizlerdi opasızlıqtan emleymen.

Xalıq bılay deydi:
„Mine, Saǵan qaytıp kiyatırmız,
Sebebi Qudayımız Jaratqan Iye Senseń.
23Írasında da, tóbelerde tabınıp,
Tawlarda salǵan shawqım-súrenler jalǵan.
Haqıyqatında, Qudayımız Jaratqan Iye Izraildı qutqaradı.
24Jaslıǵımızdan ata-babalarımızdıń múlki bolǵan,
Mayda hám iri malların,
Ul hám qızların jerkenishli but jalmap juttı.
25Kelińler, shermendeligimizdi búrkenip,
Masqarashılıqtı jamılıp alayıq.
Sebebi Qudayımız Jaratqan Iyege qarsı gúna islep keldik,
Ata-babalarımız da, bizler de,
Jaslıǵımızdan usı kúnge deyin,
Qudayımız Jaratqan Iyeniń dawısına qulaq salmadıq.“»