‏ Jeremiah 30

Jaratqan Iyeniń Óz xalqına wáde beriwi

1Eremiyaǵa Jaratqan Iyeden sóz tústi. 2Izraildıń Qudayı Jaratqan Iye bılay dedi:

– Saǵan aytqan sózlerimniń hámmesin bir orama kitapqa jaz. 3Sonday kúnler keledi, – deydi Jaratqan Iye, – xalqım Izrail menen Yahudanıń burınǵı abadanshılıǵın qayta tikleymen. Men olardı ata-babalarına bergen jerime qaytarıp alıp kelemen, olar sol jerge iyelik qıladı, – deydi Jaratqan Iye.

4Izrail hám Yahuda haqqında Jaratqan Iye aytqan sózler mınalar:

5«Jaratqan Iye bılay deydi:
Sizler tınıshlıq emes,
Ala-sapıran hám qorqınısh dawısın esitip tursız.
6Endi sorań hám kóriń!
Erkek bala tuwa ma?
Nege tolǵaq tutqan hayalday,
Hár bir erkektiń qolın belinde kórip turman?
Nege hámmesiniń júzi solǵın?
7Qanday qorqınıshlı kún!
Oǵan uqsaǵan kún basqa bolmaǵan.
Bul Yaqıp urpaǵı ushın apat waqtı,
Biraq olar onnan qutqarıladı.

8Sol kúni, – deydi Álemniń Jaratqan Iyesi, –
Men moynındaǵı moyıntırıqtı sındıraman,
Buǵawlardı qoparaman.
Bunnan bılay basqa milletlerge xızmet etpeydi.
9Endi Qudayı Jaratqan Iyege hám Men taxtqa otırǵızǵan,
Dawıt áwladınan bolǵan patshaǵa xızmet etedi.

10Sen, qulım Yaqıp, qorqpa,
– deydi Jaratqan Iye, –
Qáweterlenbe, Izrail!
Men seni qutqarıp, uzaq elden,
Urpaqlarıńdı tutqın bolǵan elinen qaytaraman.
Yaqıp, sen qaytıp keleseń,
Biyqáter hám tınısh jasaysań.
Seni qorqıtatuǵınlar da bolmaydı.
11Al Men seniń menen birgemen,
– deydi Jaratqan Iye, –
Seni qutqaraman.
Seni arasına shashqan,
Millettiń bárin joq qılaman.
Tek seni joq qılmayman.
Biraq seni ádalatlıq penen tárbiyalayman,
Seni jazasız qoymayman.

12Jaratqan Iye bılay deydi:
Jaraqatlarıń shıpasız,
Jarań awır.
13Seniń dawańdı hesh kim qorǵamaydı,
Jarańa shıpa beretuǵın dári joq,
Saǵan hesh qanday shıpa joq.
14Oynaslarıńnıń hámmesi seni umıttı,
Olar seni izlemeydi.
Ayıbıń awır,
Gúnań sheksiz bolǵanı ushın,
Seni dushpan kibi soqqıladım,
Ayawsız jazaladım.
15Nege jaraqatıń ushın,
Shıpasız dártiń ushın páriyad eteseń?
Qılmısıń awır,
Gúnań sheksiz bolǵanı ushın,
Saǵan solay isledim.
16Biraq seni jalmaǵanlar, jalmanadı,
Barlıq dushpanlarıń,
Olardıń hár biri súrgin etiledi.
Seni talaǵanlar, talanadı,
Seni olja qılǵanlardıń ózlerin,
Men olja qılaman.
17Seni: „Taslap ketilgen“, – dep atap,
„Sionnıń hesh kimge keregi joq“, – dep aytsa da,
Men saǵan shıpa berip,
Dártińnen jazaman, – deydi Jaratqan Iye.

18Jaratqan Iye bılay deydi:
Men Yaqıptıń shatırınıń abadanshılıǵın qayta tikleymen,
Onıń turaq jaylarına rehim etemen.
Qala qarabaqanaları ústine qayta qurıladı,
Burınǵı ornına saray salınadı.
19Olardan táriyiplew qosıqları,
Quwanısh sesleri esitiledi.
Men olardı kóbeytemen, endi azaymaydı,
Olardı abıraylı qılaman, ayaq astı bolmaydı.
20Balaları burınǵıday ómir súredi,
Jámiyeti aldımda bekkemlenedi.
Olarǵa jábir kórsetkenlerdi jazalayman.
21Kósemi olardıń ózinen boladı,
Húkimdarı olardıń arasınan shıǵadı.
Men onı jaqınlataman,
Ol Maǵan jaqın boladı,
Ózinshe Maǵan jaqınlawǵa kim júrek etedi?
– deydi Jaratqan Iye. –
22Sizler Meniń xalqım bolasız,
Men sizlerdiń Qudayıńız bolaman».

23Mine, Jaratqan Iyeniń dawılı,
Ǵázepke minip, kóterildi.
Kúshli quyın kóterilip,
Nahaqlardıń basına dónedi.
24Júrektegi niyetin ámelge asırmaǵansha,
Jaratqan Iyeniń lawlaǵan ǵázebi sónbeydi.
Waqtı kelgende sizler bunı túsinesiz.