Jer 32 | KaaIBT22L | STEP | Yahuda patshası Sedekiyanıń patshalıǵınıń onınshı jılında Eremiyaǵa Jaratqan Iyeden sóz tústi. Sol jılı Nabuxodonosordıń patshalıǵınıń on segizinshi jılı edi.

‏ Jeremiah 32

Eremiyanıń atız satıp alıwı

1 Yahuda patshası Sedekiyanıń patshalıǵınıń onınshı jılında Eremiyaǵa Jaratqan Iyeden sóz tústi. Sol jılı Nabuxodonosordıń patshalıǵınıń on segizinshi jılı edi. 2 Sol waqıtta Babiloniya patshasınıń láshkerleri Erusalimdi qamal qılıp turǵan, al payǵambar Eremiya Yahuda patshasınıń sarayındaǵı saqshılar háwlisinde qamaqta saqlanıp atırǵan edi. 3 Yahuda patshası Sedekiya onı qamap qoyıp, sen ne ushın bulay payǵambarshılıq ettiń dedi: «Jaratqan Iye bılay deydi: Men bul qalanı Babiloniya patshasınıń qolına beremen, ol qalanı basıp aladı. 4 Yahuda patshası Sedekiya kaldeylerdiń qolınan qutıla almaydı, ol Babiloniya patshasınıń qolına tapsırıladı hám onı óz kózleri menen kórip, onıń menen júzbe-júz sóylesedi. 5 Ol Sedekiyanı Babilonǵa alıp ketedi. Men Sedekiyaǵa kewil awdarmaǵanımsha, ol sol jerde qaladı, – deydi Jaratqan Iye, – Kaldeylerge qarsı gúresseńiz de, jeńiske erispeysiz».

6 Eremiya bılay dep juwap berdi:

– Maǵan Jaratqan Iyeden mınaday sóz tústi: 7 «Aǵań Shallumnıń ulı Xanamel kelip, saǵan: „Meniń Anatottaǵı atızımdı satıp al. Meniń eń jaqın aǵayinim bolǵanıń sebepli, onı satıp alıwǵa haqıń bar hám buǵan minnetliseń“, – deydi».

8 Sońınan Jaratqan Iyeniń aytqanınday, aǵamnıń ulı Xanamel saqshılar háwlisine, maǵan kelip: «Benyamin jeri aymaǵındaǵı Anatottaǵı atızımdı satıp al. Onı satıp alıp, óz wazıypańdı orınla. Onı satıp alsa», – dedi. Sonda men bul sózdiń Jaratqan Iyeden túskenin bildim. 9 Keyin men Anatottaǵı atızdı aǵamnıń ulı Xanamelden satıp aldım. Oǵan on jeti shekel ^{▼▼ On jeti shekel – bir shekel shama menen 11 gr.} gúmisti ólshep berdim. 10 Aldı-sattı shártnamasına qol qoyıp, mórimdi bastım hám gúwalardı shaqırıp, gúmisti ólshep berdim. 11 Men nızam-qaǵıydaları jazılǵan mórlengen shártnamanıń túp nusqasın hám mórlenbegen bir nusqasın alıp, 12 bul aldı-sattı shártnamasın aǵamnıń ulı Xanameldiń, oǵan qol qoyǵan gúwalardıń hám saqshılar háwlisinde meniń menen qamaqta otırǵan barlıq yahudiylerdiń kóz aldında Maxseyanıń aqlıǵı Neriyanıń ulı Baruxqa berdim. 13 Olardıń kóz aldında Baruxqa bılay dep tapsırma berdim: 14 «Izraildıń Qudayı Álemniń Jaratqan Iyesi bılay deydi: Bul aldı-sattı shártnamasınıń mórlengen hám mórlenbegen nusqaların alıp, uzaq waqıt saqlanıwı ushın, ılay gúzege salıp qoy. 15 Sebebi Izraildıń Qudayı Álemniń Jaratqan Iyesi bılay deydi: Bul jerde jáne úyler, atızlar hám júzimzarlar satıp alınadı».

Eremiyanıń duwası

16 Aldı-sattı shártnamasın Neriya ulı Baruxqa berip bolıp, Jaratqan Iyege duwa ettim:

17 «O, Quday Iye! Ullı qúdiretiń hám sozılǵan qolıń menen Sen kóklerdi hám jerdi jarattıń. Saǵan múmkin emes nárseniń ózi joq. 18 Sen mıńınshı áwladqa shekem miyrim kórseteseń, biraq ákeleriniń ayıplarınıń jazasın balalarına tarttırasań. Ullı hám kúshli Quday, Seniń atıń – Álemniń Jaratqan Iyesi. 19 Seniń niyetleriń ullı hám isleriń qúdiretli. Sen adamzattıń jollarınıń hámmesin kórip turasań, hár bir adamǵa tutqan jolına, isiniń miywesine jarasa qaytarasań. 20 Sen Mısırda belgiler hám káramatlar kórsettiń. Házirge deyin bulardı Izrailda hám adamzat arasında kórsetip, házirgi kúnge shekem Ózińdi dańqqa bólediń. 21 Belgiler hám káramatlar menen, kúshli hám sozılǵan qolıń menen hám ullı aybatıń menen xalqıń Izraildı Mısır jerinen alıp shıqtıń. 22 Ata-babalarına beremen dep ant ishken bul jerdi, sút hám pal aǵıp turǵan jerdi olarǵa berdiń. 23 Olar kelip, sol jerdi iyelep aldı. Biraq Saǵan qulaq aspadı, Seniń Nızamıńa say jasamadı hám Sen buyırǵan islerdi qılmadı. Sonlıqtan Sen bul apatlardıń hámmesin olardıń basına jawdırdıń.

24 Qara, dushpanlar qalanı qolǵa kirgiziw ushın topıraq úymekte. Qılısh, ashlıq hám illet sebepli qala ózine hújim qılǵan kaldeylerdiń qolına tústi. Kórip turǵanıńday, aytqanlarıń júzege astı. 25 O Quday Iye, qala kaldeylerdiń qolına berilgen bolsa da, Sen maǵan: Gúwalardıń qatnasıwında gúmiske atız satıp al, – dediń».

Qudaydıń juwabı

26 Bunnan keyin Eremiyaǵa Jaratqan Iyeden sóz tústi:

27 – Men – pútkil adamzattıń Qudayı Jaratqan Iyemen. Maǵan múmkin emes nárseniń ózi bar ma? 28 Sonlıqtan Jaratqan Iye bolǵan Men bılay deymen: Men bul qalanı kaldeylerge hám Babiloniya patshası Nabuxodonosorǵa beremen. Olar qalanı qolǵa aladı. 29 Bul qalaǵa hújim qılatuǵın kaldeyler kelip, oǵan ot qoyadı. Úsheklerinde Baal butına xosh iyisli tútetkiler tútetken hám basqa qudaylarǵa ishimlik sadaqaların quyıp, Meniń qáhárimdi keltirgen adamlardıń úylerin tolıq órtep jiberedi.

30 Izrail hám Yahuda xalqı jaslıǵınan Meniń názerimde jawız bolǵan islerdi isledi. Awa, Izrail xalqı qollarınıń isi menen bárqulla Meniń ǵázebimdi keltirdi, – deydi Jaratqan Iye. 31 – Bul qala bina bolǵannan baslap, búginge deyin qala xalqı Meniń ǵázebimdi keltirdi. Sonlıqtan onı dárgayımnan quwıp jiberemen. 32 Izrail hám Yahuda xalqı, olardıń patshaları, hámeldarları, ruwxaniyleri, payǵambarları, Yahuda hám Erusalim turǵınları – barlıǵı jawız isler islep, Meniń ǵázebimdi keltirdi. 33 Olar Maǵan júzin emes, al arqasın qarattı. Men olarǵa zinharlap úyrettim, biraq olar tıńlamadı, tárbiyamdı almadı, násiyatımdı qabıl etpedi. 34 Meniń atım menen atalatuǵın Úyge jerkenishli zatların qoyıp, onı haramladı. 35 Ul hám qızların Molox butına arnap otta jaǵıp qurbanlıqqa beriw ushın, Baalǵa arnap Ben-Hinnom oypatlıǵına sıyınıw orınların qurdı. Bunday jerkenishli isti qılıp, Yahudanıń gúnaǵa batıwın Men buyırmaǵanman, hátte, bul qıyalıma da kelmegen.

36 Biraq sizler: «Qılısh, ashlıq hám illet sebepli Babiloniya patshasına beriledi», – dep aytqan bul qala tuwralı Izraildıń Qudayı Jaratqan Iye bılay deydi: 37 Men xalqımdı qáhárim, ǵázebim hám ashıwım menen hámme jerge tarqatıp jibergen edim, endi olardı jıynap alaman. Olardı qaytarıp bul jerge alıp kelip, qáwipsizlikte jasataman. 38 Olar Meniń xalqım boladı, Men de olardıń Qudayı bolaman. 39 Olar bárqulla Mennen qorqıp jasaytuǵın bir maqsetke baǵdarlanǵan jol beremen. Bul olardıń ózleri ushın da, ózlerinen keyingi balaları ushın da jaqsı boladı. 40 Men olar menen máńgilik kelisim dúzemen. Olarǵa jaqsılıq qılıwdan qashpayman. Mennen júz burıp ketpewi ushın, olardıń júregine Ózimnen qorqıw sezimin salıp qoyaman. 41 Men olarǵa quwanısh penen jaqsılıq qılaman, sadıqlıq penen shın júrekten hám jan-tánim menen olardı usı jerge ornalastıraman.

42 Jaratqan Iye bılay deydi: Bul xalıqtıń basına ullı apatshılıqlardı qalay salǵan bolsam, olarǵa wáde etken jaqsılıqlardı da solay jawdıraman. 43 Sizlerdiń: «Kaldeylerge berilip, adamsız hám haywansız qańırap qalǵan jer», – dep aytıp júrgen bul jerde jáne de atızlar satıp alınadı. 44 Benyamin jerinde, Erusalimniń aylanasındaǵı jerlerde, Yahuda dalalarında, tawlı aymaqlarda, batıstaǵı taw eteklerinde hám Negeb jerlerinde atızlar gúmiske satıp alınıp, shártnamalarǵa qol qoyılıp, mór basılıp, gúwalar shaqırıladı. Sebebi Men olardıń burınǵı abadanshılıǵın qayta tikleymen, – deydi Jaratqan Iye.