‏ Jeremiah 33

Xalıqtıń abadan keleshekten úmit etiwi

1Eremiya ele saqshılar háwlisinde qamaqta saqlanıp atırǵan waqıtta, oǵan Jaratqan Iyeden ekinshi ret sóz tústi:

2– Isti jobalastırıp, onı isleytuǵın hám júzege asıratuǵın, atı Jaratqan Iye bolǵan Jaratqan Iye bılay deydi: 3Meni shaqır, juwap beremen. Sen bilmegen ullı hám jumbaqlı sırlardı saǵan aytaman.

4Qalaǵa taqap úyilgen topıraqtan hám qılıshtan qorǵanıw ushın buzılǵan bul qaladaǵı úyler hám Yahuda patshalarınıń sarayları haqqında Izraildıń Qudayı Jaratqan Iye bılay deydi: 5Sizler kaldeyler menen urısasız, biraq olar úylerińizdi Meniń qáhárim hám ǵázebim menen qırıp taslanǵan óli denelerge toltıradı. Olardıń islegen barlıq jawızlıqları ushın, Men bul qaladan júzimdi jasırdım. 6Solay bolsa da, bul qalaǵa jáne shıpa berip, onı sawaltaman. Men Óz xalqımdı emleymen. Olarǵa sheksiz abadanshılıq hám paraxatshılıq beremen. 7Men Yahudanıń hám Izraildıń burınǵı abadanshılıǵın qayta tikleymen, olardı burınǵıday qayta bina qılaman. 8Olardı aldımda islegen barlıq gúnalarınan tazalayman hám Maǵan qarsı bas kóterip, islegen barlıq ayıpların keshiremen. 9Dúnyadaǵı barlıq milletler olarǵa islegen hámme jaqsılıqlarımdı esitedi hám bul qala jer betindegi barlıq xalıqlar aldında Maǵan quwanısh, alǵıs, ataq-abıray hám dańq alıp keledi. Erusalimge islegen hámme jaqsılıqlarım hám bergen paraxatshılıǵım tuwralı esitip, bul milletler qorqıp titiresedi.

10Jaratqan Iye bılay deydi: Sizler: «Bul orın wayran bolıp, adamsız hám haywansız shólge aylanadı», – dedińiz. Biraq adamsız hám haywansız bosap qalǵan Yahuda qalalarında hám Erusalim kóshelerinde 11shadlıq hám quwanısh sesleri, kelin hám kúyew sesti, Jaratqan Iyeniń Úyine minnetdarshılıq qurbanlıqların alıp kelgenlerdiń bılay degen dawısları esitiledi:

«Álemniń Jaratqan Iyesin táriyipleń!
Ol iygilikli, sadıqlıǵı máńgi dawam etedi».

Óytkeni Men bul jerdiń burınǵı abadanshılıǵın qayta tikleymen, – deydi Jaratqan Iye.

12Álemniń Jaratqan Iyesi bılay deydi: Adamsız hám haywansız bosap qalǵan bul jerde, onıń barlıq qalalarında jáne shopanlardıń óz súriwlerin baǵatuǵın jaylawları boladı. 13Tawlı úlkedegi qalalarda, batıstaǵı taw eteklerinde, Negebte, Benyamin jerlerinde, Erusalim átirapındaǵı hám Yahuda qalalarındaǵı aymaqlarda shopanlar jáne qoyların sanaytuǵın boladı, – deydi Jaratqan Iye.

14Sonday kúnler keledi, – deydi Jaratqan Iye, – Izrail hám Yahuda xalqı haqqında aytqan qayırlı wádelerimdi orınlayman. 15Sol kúnlerde hám sol waqıtta Men Dawıttıń násilinen ádil bir shaqanı ósirip shıǵaraman. Ol jer betinde ádalat hám ádillikti júzege asıradı. 16Sol kúnlerde Yahuda qutqarıladı, Erusalim qáwipsizlikte jasaydı. Onı «Jaratqan Iye – ádilligimiz», dep ataydı.

17Sebebi Jaratqan Iye bılay deydi: Dawıttıń násilinen Izrail taxtında otıratuǵınlardıń izi úzilmeydi. 18Aldımda jandırılatuǵın qurbanlıqlardı beretuǵın, ǵálle sadaqaların jandıratuǵın hám qurbanlıq shalatuǵın Lebiy áwladınan bolǵan ruwxaniyler hesh qashan joq bolıp qalmaydı.

19Eremiyaǵa Jaratqan Iyeden sóz tústi:

20– Jaratqan Iye bılay deydi: Eger kim de kim Meniń kúndiz hám tún menen dúzgen kelisimimdi buzıp, olardıń tártibin ózgerte alsa, 21onda Men, qulım Dawıt penen dúzgen kelisimimdi buzıp, Dawıttıń násilin taxttan túsiremen. Sonday-aq, Maǵan xızmet qılıp atırǵan Lebiy urpaqları menen de dúzgen kelisimim buzılǵan esaplanadı. 22Men qulım Dawıttıń urpaqların hám aldımda xızmet etetuǵın lebiylilerdi aspandaǵı juldızlarday, teńiz jaǵasındaǵı qumlarday san-sanaqsız etip kóbeytemen.

23Eremiyaǵa Jaratqan Iyeden jáne sóz tústi:

24– Mına xalıqtıń: «Jaratqan Iye Ózi tańlap alǵan eki patshalıqtan da waz keshti», – dep aytıp júrgenin kórmediń be? Olar endi Meniń xalqımdı kemsitip, hátte, onı millet dep atawǵa arlanıp atır. 25Jaratqan Iye bılay deydi: Haqıyqattan da, Men tún hám kún menen kelisim dúzdim, kóklerdiń hám jerdiń tártibin belgilep berdim. 26Sonday-aq Yaqıptıń hám qulım Dawıttıń násilinen hesh qashan waz keshpeymen. Ibrayım, Ísaq hám Yaqıp násili ústinen Dawıttıń urpaqlarınan birin húkimdar etip qoyıwdı dawam etemen. Men xalqımnıń burınǵı abadanshılıǵın qayta tikleymen, olarǵa rehim qılaman.