Jer 34 | KaaIBT22L | STEP | Babiloniya patshası Nabuxodonosor óziniń barlıq láshkerleri, qol astındaǵı jerlerdiń barlıq patshalıqları hám xalıqları menen birge Erusalim hám onıń dógeregindegi qalalarǵa qarsı urısıp atırǵan waqıtta, Jaratqan Iyeden Eremiyaǵa sóz tústi:

‏ Jeremiah 34

Sedekiya ushın xabar

1 Babiloniya patshası Nabuxodonosor óziniń barlıq láshkerleri, qol astındaǵı jerlerdiń barlıq patshalıqları hám xalıqları menen birge Erusalim hám onıń dógeregindegi qalalarǵa qarsı urısıp atırǵan waqıtta, Jaratqan Iyeden Eremiyaǵa sóz tústi:

2 – Izraildıń Qudayı Jaratqan Iye bılay deydi: Yahuda patshası Sedekiyaǵa barıp ayt: «Jaratqan Iye bılay deydi: Men bul qalanı Babiloniya patshası Nabuxodonosordıń qolına tapsıraman. Ol qalaǵa ot qoyadı. 3 Sen onıń qolınan qutıla almaysań, sózsiz tutıp alınıp, oǵan tapsırılasań. Sen Babiloniya patshasın óz kózleriń menen kóreseń, onıń menen júzbe-júz sóyleseseń. Sen Babilonǵa alıp ketileseń.

4 Degen menen, Yahuda patshası Sedekiya, Jaratqan Iyeniń mına sózin de tıńla, Sen tuwralı Jaratqan Iye bılay deydi: Sen qılıshtan qaza tappaysań, 5 tınıshlıq penen kóz jumasań. Saǵan deyingi bolǵan patshalardıń, ata-babalarıńnıń húrmetine qalay ot jaǵılǵan bolsa, seniń húrmetińe de solay ot jaǵılıp: Way-way taqsırım! – dep joqlaw aytıladı. Bunı Men, Jaratqan Iye aytıp atırman».

6 Eremiya payǵambar bulardıń hámmesin Erusalimdegi Yahuda patshası Sedekiyaǵa aytıp berdi. 7 Sol waqıtta Babiloniya patshasınıń láshkerleri Erusalim menen, Yahudanıń ele táslim bolmaǵan qalaları Laxish hám Azeqa menen urısıp atırǵan edi. Yahudanıń qorǵanlı qalalarınan tek usılar qalǵan edi.

Qul nızamınıń buzılıwı

8 Sedekiya patsha Erusalimdegi pútkil xalıq penen kelisim dúzip, qullardı azat etiwdi járiyalaǵannan keyin, Eremiyaǵa Jaratqan Iyeden sóz tústi. 9 Bul kelisim boyınsha, hár bir adam óziniń evrey qulın hám shorısın azat etip, hesh kim artıq óz tuwısqanı bolǵan yahudalını qullıqta uslamawı tiyis edi. 10 Pútkil basshılar hám xalıq bul kelisimge boysınıp, ózleriniń qul hám shorıların azat etiwge hám olardı bunnan bılay qullıqta uslamawǵa ırazı boldı hám olardı azatlıqqa shıǵardı. 11 Biraq keyin pikirinen qaytıp, azatlıqqa shıǵarǵan qulların hám shorıların májbúrlep alıp kelip, olardı jáne qulǵa aylandırdı.

12 Sonda Eremiyaǵa Jaratqan Iyeden sóz tústi:

13 – Izraildıń Qudayı Jaratqan Iye bılay deydi: Men ata-babalarıńızdı Mısırdan, qul bolǵan jerinen alıp shıqqanımda, olar menen kelisim dúzip: 14 «Ózlerin sizlerge qul etip satıp, altı jıl sizlerge xızmet etken evrey tuwısqanıńızdı jetinshi jılı azatlıqqa shıǵarıń», – degen edim. Biraq ata-babalarıńız Meni tıńlamadı, qulaq aspadı. 15 Endi sizler táwbe qılıp, hár birińiz óz tuwısqanıńızdıń azatlıǵın járiyalap, Meniń názerimde tuwrı bolǵan isti isledińiz. Meniń atım menen atalǵan Úyde, aldımda turıp kelisim dúzdińiz. 16 Keyin sózińizden tanıp, Meniń atıma daq túsirdińiz. Sizler azat etkennen keyin, ózleri qálegen jerge ketken qul hám shorılarıńızdı qaytarıp alıp kelip, qul bolıwǵa májbúrledińiz.

17 Sonlıqtan Jaratqan Iye bılay deydi: Maǵan qulaq salmadıńız, hár birińiz tuwısqanıńızdı hám qońsıńızdı bosatıp jibermedińiz. Sol sebepli Men sizlerdi qılısh, illet hám ashlıqqa qaray bosatatuǵınımdı járiyalayman, – deydi Jaratqan Iye. – Sizlerdi kórgen jer júzindegi barlıq patshalıqlardıń húreyi ushadı. 18 Kelisim dúzgende tananı ekige bólip, onıń arasınan ótken edińiz. Men kelisimimdi buzıp, aldımda dúzgen kelisim shártlerin orınlamaǵanlardı sol tana kibi ekige bólemen. 19 Tananıń eki bólegi arasınan ótken Yahuda hám Erusalim basshıların, saray xızmetkerlerin, ruwxaniylerin hám bul jerdiń pútkil xalqın 20 dushpanlarınıń hám janın almaqshı bolǵanlardıń qolına beremen. Olardıń deneleri aspandaǵı quslarǵa hám jerdegi haywanlarǵa jem boladı.

21 Yahuda patshası Sedekiyanı hám onıń hámeldarların olardıń dushpanlarına hám janın almaqshı bolǵanlardıń qolına, sizlerden shegingen Babiloniya patshasınıń láshkerlerine tapsıraman. 22 Men buyrıq berip, – deydi Jaratqan Iye, – babiloniyalılardı bul qalaǵa qaytıp alıp kelemen. Olar qalaǵa hújim etip, onı qolǵa aladı hám jaǵıp jiberedi hám Men Yahuda qalaların adam jasamaytuǵın shólge aylandıraman.