Jer 35 | KaaIBT22L | STEP | Yahuda patshası Ioshiyanıń ulı Ehoyakim húkimdarlıq qılǵan dáwirde Eremiyaǵa Jaratqan Iyeden mına sóz tústi:

‏ Jeremiah 35

Eremiya hám Rexab násili

1 Yahuda patshası Ioshiyanıń ulı Ehoyakim húkimdarlıq qılǵan dáwirde Eremiyaǵa Jaratqan Iyeden mına sóz tústi:

2 – Rexabtıń urpaqlarına barıp, olar menen sóyles. Olardı Jaratqan Iyeniń Úyiniń bir bólmesine alıp kelip, ishiw ushın sharap ber.

3 Men Xabassiniyanıń aqlıǵı Eremiyanıń ulı Yazaniyanı, onıń tuwısqanları menen balaların hám Rexabtıń urpaqların ertip, 4 Qudaydıń adamı bolǵan Igdaliya ulı Xanannıń ullarınıń Jaratqan Iyeniń Úyindegi bólmesine alıp bardım. Bul bólme basshılardıń bólmesiniń qaptalında, lawazımlı ruwxaniy Shallum ulı Maaseyanıń bólmesiniń joqarısında edi. 5 Keyin Rexabtıń urpaqlarınıń aldına sharap tolı gúzeler menen keselerdi qoyıp, olarǵa:

– Sharaptan ishińler, – dedim. 6 Biraq olar bılay dep juwap berdi:

– Bizler sharap ishpeymiz. Sebebi babamız Rexab ulı Ionadab bılay dep buyrıq bergen: «Ózleriń de sharap ishpeń, áwladlarıńız da hesh qashan sharap ishpesin. 7 Hesh qashan úy qurmań, egin ekpeń, júzim otırǵızbań. Bulardan hesh biri sizlerde bolmasın. Óytkeni sizler bárqulla shatırlarda jasawıńız tiyis. Sonda kóship-qonıp júrgen jerlerińizde uzaq ómir kóresiz». 8 Bizler babamız Rexab ulı Ionadabtıń barlıq buyrıqların orınlap kelemiz. Ózlerimiz de, hayallarımız da, ul-qızlarımız da hesh qashan sharap ishpeymiz. 9 Jasaw ushın úyler qurmadıq. Bizlerde júzimzar da, egislik atız da, egin de joq. 10 Bizler shatırlarda jasaymız. Babamız Ionadabqa qulaq asıp, onıń buyrıqların orınlap kelemiz. 11 Biraq Babiloniya patshası Nabuxodonosor bul elge hújim qılǵanda, bizler «aramlılardıń hám kaldeylerdiń láshkerlerinen qashıp, Erusalimge baramız» – dep sheshtik. Sol sebepli házir de Erusalimde jasap atırmız.

12 Sonda Eremiyaǵa Jaratqan Iyeden sóz tústi:

13 – Izraildıń Qudayı Álemniń Jaratqan Iyesi bılay deydi: Barıp, Yahuda xalqı menen Erusalim turǵınlarına bılay dep ayt: «Sizler Meniń sózlerimdi tıńlawdı qashan úyrenesiz? – deydi Jaratqan Iye. 14 – Rexab ulı Ionadab óz urpaqlarına sharap ishpewdi buyırdı. Olar babasınıń buyrıǵına boysınıp, usı kúnge deyin sharap ishpeydi. Al Men sizlerge qayta-qayta aytsam da, sizler tıńlamadıńız. 15 Men qullarım bolǵan payǵambarlardıń hámmesin aldıńızǵa jiberip: „Hár birińiz jawız jollarıńızdan qaytıp, is-háreketińizdi ózgertiń. Basqa qudaylarǵa xızmet etiw ushın, olarǵa ermeń. Sonda ózlerińizge hám ata-babalarıńızǵa bergen jerimde jasaysızlar“, – dedim. Biraq sizler Meni tıńlamadıńız, Maǵan qulaq aspadıńız. 16 Rexab ulı Ionadabtıń urpaqları ata-babalarınıń ózlerine bergen buyrıqların orınladı, al bul xalıq bolsa Meni tıńlamadı.

17 Sonlıqtan Izraildıń Qudayı, Álemniń Qudayı Jaratqan Iye bılay deydi: Men Ózim aytqan bálelerdi Yahudada hám Erusalimde jasaytuǵın hár bir adamnıń basına jawdıraman. Sebebi Men olarǵa ayttım, olar tıńlamadı. Olardı shaqırdım, juwap bermedi».

18 Rexab urpaǵına bolsa, Eremiya bılay dedi:

– Izraildıń Qudayı Álemniń Jaratqan Iyesi bılay deydi: «Sizler babańız Ionadabtıń buyrıqlarına boysınıp, olarǵa ámel qılıp, ózlerińizge tapsırǵanlarınıń hámmesin orınladıńız. 19 Sonlıqtan Izraildıń Qudayı Álemniń Jaratqan Iyesi bılay deydi: Rexab ulı Ionadabtıń urpaǵınan Meniń aldımda xızmet etetuǵın adamnıń izi úzilmeydi».