Jer 37 | KaaIBT22L | STEP | Babiloniya patshası Nabuxodonosor Ehoyakimniń ulı Exoniyanıń ornına Ioshiya ulı Sedekiyanı Yahuda eline patsha etip qoydı.

‏ Jeremiah 37

Eremiya hám patsha Sedekiya

1 Babiloniya patshası Nabuxodonosor Ehoyakimniń ulı Exoniyanıń ^{▼▼ Exoniya – Ehoyakinniń basqa atı. 4Pat 24:6 qarań.} ornına Ioshiya ulı Sedekiyanı Yahuda eline patsha etip qoydı. 2 Biraq patsha da, onıń wázirleri de, úlke xalqı da Jaratqan Iyeniń Eremiya payǵambar arqalı aytqan sózlerine qulaq salmadı. 3 Degen menen, patsha Sedekiya Shelemiya ulı Ehuxal menen Maaseya ulı ruwxaniy Sefaniyanı: «Ótinemen, bizler ushın Qudayımız Jaratqan Iyege duwa et», – dep aytıw ushın Eremiyaǵa jiberdi.

4 Eremiya sol waqıtta xalıq arasında biyǵam jasap atırǵan bolıp, ele zindanǵa taslanbaǵan edi. 5 Sol arada faraonnıń láshkerleri Mısırdan shıqtı. Erusalimdi qamal qılıp turǵan kaldeyler bul xabardı esitkende, Erusalimnen shegindi.

6 Sonda Eremiya payǵambarǵa Jaratqan Iyeden sóz tústi:

7 – Izraildıń Qudayı Jaratqan Iye bılay deydi: Mennen soraw ushın sizlerdi Maǵan jibergen Yahuda patshasına bılay dep aytıńlar: «Sizlerge járdemge kiyatırǵan faraonnıń láshkerleri óz eline, Mısırǵa qaytıp ketedi. 8 Al kaldeyler qaytıp kelip hújim etedi, qalanı qolǵa alıp, órtep jiberedi.

9 Jaratqan Iye bılay deydi: „Kaldeyler sózsiz bizlerden sheginedi“, – dep ózlerińizdi aldamańlar. Olar sheginbeydi. 10 Eger sizler ózlerińizge qarsı urısqa shıqqan kaldeylerdiń pútkil láshkerlerin qırıp taslasańız da, olarda tek jaradarlar qalǵan bolsa da, olar shatırlarınan shıǵıp kelip, bul qalanı órtegen bolar edi».

11 Faraonnıń láshkerleri sebepli, kaldeylerdiń láshkerleri artqa shegingen waqıtta, 12 Eremiya Benyamin jerine barıp, xalıq arasındaǵı óziniń payına túsken jer úlesin alıw ushın Erusalimnen ketpekshi boldı. 13 Ol Benyamin dárwazasına jetkende, gúzetshiler baslıǵı Xananiyanıń aqlıǵı Shelemiya ulı Iriya Eremiyanı uslap alıp:

– Sen ne, kaldeylerge qashıp ketpekshimiseń? – dedi.

14 Eremiya oǵan:

– Jalǵan, men kaldeylerge qashıp ketpekshi emespen, – dedi. Biraq Iriya onı tıńlamadı hám Eremiyanı uslap, wázirlerdiń aldına alıp keldi. 15 Wázirler Eremiyaǵa ashıwlanıp, onı sabadı, keyin xatker Ionatannıń úyine qurılǵan zindanǵa tasladı. 16 Eremiya zindanǵa taslanıp, ol jerde kóp kúnlerdi ótkerdi.

17 Bir kúni patsha Sedekiya adam jollap, Eremiyanı sarayına aldırdı. Patsha óz sarayında jasırın túrde onnan:

– Jaratqan Iyeden qanday da bir sóz bar ma? – dep soradı.

Eremiya oǵan:

– Bar, siz Babiloniya patshasınıń qolına túsesiz, – dep juwap berdi.

18 Keyin Eremiya Sedekiya patshaǵa bılay dedi:

– Meni zindanǵa taslaǵanday, men sizge, xızmetkerlerińizge yaki bul xalıqqa ne qıldım? 19 «Babiloniya patshası sizge, bul xalıqqa hújim qılmaydı», – dep payǵambarshılıq etken payǵambarlarıńız qayaqta? 20 Endi meni tıńlań, taqsırım, ótinish qılıwǵa ruxsat beriń. Meni xatker Ionatannıń úyine qaytarıp jibermeń, bolmasa, men sol jerde ólip ketemen.

21 Patsha Sedekiya Eremiyanı saqshılar háwlisine qamap qoyıwdı hám qalada nan pútkilley tawısılǵansha, hár kúni oǵan nanbayxanadan bir shórek alıp berip turıwdı buyırdı. Solay etip, Eremiya saqshılar háwlisinde qaldı.