Jer 38 | KaaIBT22L | STEP | Mattan ulı Shefatiya, Pashxur ulı Gedaliya, Shelemiya ulı Yuxal hám Malkiya ulı Pashxur Eremiyanıń pútkil xalıqqa aytqan mına sózlerin esitti:

‏ Jeremiah 38

Eremiyanıń suw saqlaǵıshqa taslanıwı

1 Mattan ulı Shefatiya, Pashxur ulı Gedaliya, Shelemiya ulı Yuxal hám Malkiya ulı Pashxur Eremiyanıń pútkil xalıqqa aytqan mına sózlerin esitti: 2 «Jaratqan Iye bılay deydi: Bul qalada qalǵan adam qılıshtan, ashlıqtan hám illetten óledi, al kaldeyler tárepke ótken adam tiri qaladı, janın qutqarıp aman qaladı. 3 Jaratqan Iye bılay deydi: Bul qala álbette Babiloniya patshasınıń láshkerleriniń qolına beriledi, ol qalanı basıp aladı».

4 Sonda saray hámeldarları patshaǵa:

– Bul adam óltirilsin. Ol bul sózlerdi aytıp, bul qalada qalǵan áskerlerimizdiń hám pútkil xalıqtıń ruwxın túsirmekte. Bul adam xalıqqa jaqsılıq emes, al jamanlıq tileydi, – dedi.

5 Patsha Sedekiya olarǵa:

– Mine, ol sizlerdiń qolıńızda, men sizlerge qarsılıq kórsetpeymen, – dedi.

6 Olar Eremiyanı uslap alıp, patshanıń ulı Malkiyanıń saqshılar háwlisindegi suw saqlaǵıshqa arqan menen túsirdi. Suw saqlaǵısh suwsız bolıp, onda tek ılay bar edi. Eremiya balshıqqa batıp qaldı. 7 Patshanıń saray xızmetkerlerinen biri, xabashstanlı Ebed-Melex Eremiyanıń suw saqlaǵıshqa taslanǵanın esitti. Sol waqıtta patsha Benyamin dárwazası aldında otırǵan edi. 8 Ebed-Melex patsha sarayınan shıqtı da, patshaǵa barıp:

9 – Taqsır, Eremiyanı suw saqlaǵıshqa taslap, bul adamlar jaman is qılıptı. Qalada nan qalmadı, Eremiya ol jerde ashtan óledi, – dedi. 10 Patsha xabashstanlı Ebed-Melexke:

– Qasıńa otız adam al da, ólip qalmasınan burın, Eremiya payǵambardı suw saqlaǵıshtan shıǵarıp al, – dep buyırdı.

11 Ebed-Melex qasına adamlardı alıp, patsha ǵáziynexanasınıń astındaǵı bólmege kirdi hám ol jerden góne-kóksi shúberekler menen góne-kóksi kiyimlerdi tawıp alıp, olardı arqanǵa baylap, suw saqlaǵıshtaǵı Eremiyaǵa túsirdi. 12 Keyin Eremiyaǵa:

– Arqan deneńe batpawı ushın, mına góne-kóksi shúberekler menen kiyimlerdi qoltıǵıńnıń astına qoy, – dedi.

Eremiya solay isledi. 13 Olar Eremiyanı arqanlar járdeminde suw saqlaǵıshtan shıǵarıp aldı. Bunnan keyin, Eremiya saqshılar háwlisinde qaldı.

Sedekiyanıń Eremiyadan jáne másláhát sorawı

14 Patsha Sedekiya adam jiberip, Eremiya payǵambardı Jaratqan Iyeniń Úyiniń úshinshi esiginiń aldına alıp keltirdi. Patsha Eremiyaǵa:

– Men sennen bir nárse sorayjaqpan, mennen hesh nárseni jasırma, – dedi. 15 Eremiya Sedekiyaǵa:

– Eger ırasın aytsam, meni óltirmes pe edińiz? Másláhát bergenim menen meni tıńlamaysız, – dedi.

16 Biraq patsha Sedekiya jasırın túrde ant iship, Eremiyaǵa:

– Bizge jan bergen tiri Jaratqan Iye haqı ant ishemen: seni óltirmeymen hám janıńa qaslıq qılmaqshı bolǵanlardıń qolına tapsırmayman, – dedi. 17 Sonnan keyin, Eremiya Sedekiyaǵa bılay dedi:

– Izraildıń Qudayı, Álemniń Qudayı Jaratqan Iye bılay deydi: «Eger Babiloniya patshasınıń hámeldarlarına táslim bolsań, janıń tiri qaladı, bul qala da órtep jiberilmeydi, óziń de, úy-ishiń de aman qalasız. 18 Biraq eger Babiloniya patshasınıń hámeldarlarına táslim bolmasań, bul qala kaldeylerdiń qolına beriledi, olar qalanı órtep jiberedi, óziń de olardıń qolınan qashıp qutıla almaysań».

19 Patsha Sedekiya Eremiyaǵa:

– Men kaldeyler tárepke ótken yahudiylerden qorqaman. Kaldeyler meni olardıń qolına tapsırsa, olar meni xorlaydı, – dedi.

20 Eremiya patshaǵa bılay dedi:

– Yaq, olarǵa tapsırmaydı. Aytqanlarımdı islep, Jaratqan Iyeniń sózine qulaq salsańız, tiri qalıp, abadan turmısqa erisesiz. 21 Eger táslim bolıwdan bas tartsańız, Jaratqan Iye maǵan mınanı ayan etti: 22 Mine, Yahuda patshasınıń sarayında qalǵan barlıq hayallar Babiloniya patshasınıń áskerbasısına alıp ketiledi. Sol hayallar sizge bılay deydi:

«Isengen doslarıńız,
Sizdi aldap, jeńip ketti,
Batpaqqa battı ayaqlarıńız,
Olar sizdi taslap ketti».

23 Siziń barlıq hayallarıńız benen balalarıńız kaldeylerge beriledi. Siz de olardıń qolınan qashıp qutıla almaysız, Babiloniya patshasınıń qolına túsesiz. Bul qala bolsa, órtep jiberiledi.

24 Keyin Sedekiya Eremiyaǵa bılay dedi:

– Sóyleskenimiz tuwralı hesh kim bilmesin, bolmasa óleseń. 25 Eger hámeldarlar meniń seniń menen sóyleskenimdi esitip, saǵan kelip: «Patsha menen neler tuwralı sóyleskenińdi jasırmay ayt, bolmasa óleseń», – dese, 26 sen olarǵa: «Meni Ionatannıń úyine qaytarıp jiberme, bolmasa, men ol jerde ólip qalaman, dep patshaǵa jalbarındım dep ayt», – dedi.

27 Barlıq hámeldarlar kelip, Eremiyanı sorawǵa tuttı. Ol da patsha buyırǵanınday etip juwap berdi. Patshaǵa aytılǵanlardan hesh kimniń xabarı bolmaǵanlıqtan, olar úndemey qaytıp ketti. 28 Erusalim qolǵa alınǵan kúnge deyin, Eremiya saqshılar háwlisinde qaldı. ^{▼▼Bazı evreyshe qoljazbalarda mına gáp te bar: «Erusalim qulaǵanda, usı waqıyalar júz berdi», al bazı evreyshe qoljazbalarda, áyyemgi grek hám suriya tilindegi awdarmalarda joq.}