Jer 39 | KaaIBT22L | STEP | Yahuda patshası Sedekiyanıń húkimdarlıǵınıń toǵızınshı jılınıń onınshı ayında Babiloniya patshası Nabuxodonosor pútkil áskerleri menen Erusalimge júris qılıp, onı qamalǵa aldı.

‏ Jeremiah 39

Erusalimniń qulawı

1 Yahuda patshası Sedekiyanıń húkimdarlıǵınıń toǵızınshı jılınıń onınshı ayında Babiloniya patshası Nabuxodonosor pútkil áskerleri menen Erusalimge júris qılıp, onı qamalǵa aldı. 2 Sedekiyanıń patshalıǵınıń on birinshi jılınıń onınshı ayınıń toǵızınshı kúni diywal buzıldı. 3 Erusalim qolǵa alınǵanda, Babiloniya patshasınıń barlıq hámeldarları ishke kirip, Ortańǵı dárwaza janında otırdı. Olar: Nergal-Shareser, Samgar-Nebo, áskeriy wákil Sarsexim, bas másláhátshi Nergal-Shareser hám patshanıń barlıq hámeldarları edi.

4 Yahuda patshası Sedekiya hám onıń barlıq áskerleri olardı kórgende, túnde patshanıń baǵınıń janındaǵı, eki diywal arasındaǵı dárwaza arqalı shıǵıp, Iordan tegisligine qaray qashıp ketti. 5 Biraq kaldey áskerleri olardı quwıp, Erixo tegisliginde izinen jetti hám Sedekiyanı uslap, tutqınǵa aldı da, Xamat úlkesiniń Ribla qalasında bolǵan Babiloniya patshası Nabuxodonosorǵa alıp bardı. Sol jerde patsha Sedekiyanıń ústinen húkim shıǵardı. 6 Babiloniya patshası Riblada Sedekiyanıń ulların kóz aldında bawızlattı. Jáne de, ol Yahudanıń barlıq aqsúyeklerin de bawızlattı. 7 Bunnan keyin, Sedekiyanıń kózlerin oydırdı, Babilonǵa alıp ketiw ushın onı qola shınjır menen baylattı.

8 Kaldeyler patshanıń sarayın, xalıqtıń úylerin órtep, Erusalim diywalların qulattı. 9 Saqshılar baslıǵı Nabuzaradan qalada aman qalǵan adamlardı hám Babiloniya patshası tárepke ótken qashqınlardı qalǵan xalıq penen birge Babiloniyaǵa tutqın qılıp alıp ketti. 10 Biraq Nabuzaradan hesh nársesi joq biysharalardı Yahuda jerinde qaldırıp, sol waqıtta olarǵa júzimzarlar hám atızlar berdi.

11 Babiloniya patshası Nabuxodonosor saqshılar baslıǵı Nabuzaradanǵa Eremiya tuwralı mınaday buyrıq berdi: 12 «Onı uslap alıp, kózqulaq bol. Oǵan hesh qanday zıyan keltirme, ne sorasa, sonı isle».

13 Patsha saqshılarınıń baslıǵı Nabuzaradan, áskeriy wákil Nabushazban, bas másláhátshi Nergal-Shareser hám Babiloniya patshasınıń barlıq hámeldarları 14 adam jollap, Eremiyanı saqshılar háwlisinen aldırttı. Olar Shafannıń aqlıǵı Axiqamnıń ulı Gedaliyaǵa Eremiyanı úyine alıp ketiwdi tapsırdı. Solay etip, Eremiya óz xalqı arasında qaldı.

15 Qarawıllar háwlisinde qamaqta bolǵan waqtında, Eremiyaǵa Jaratqan Iyeden mınaday sóz túsken edi:

16 – Barıp, xabashstanlı Ebed-Melexke ayt: «Izraildıń Qudayı Álemniń Jaratqan Iyesi bılay deydi: Men bul qala tuwralı aytqan sózlerimdi jaqsılıq penen emes, al jamanlıq penen júzege asıraman. Bular seniń kóz aldıńda ámelge asadı. 17 Biraq sol kúni Men seni qutqaraman, – deydi Jaratqan Iye. – Sen óziń qorqıp júrgen adamlarıńnıń qolına túspeyseń. 18 Men seni qutqaraman. Sen qılıshtan qaza tappaysań, Maǵan úmit artqanıń ushın, janıń ózińe olja boladı, – deydi Jaratqan Iye».