‏ Jeremiah 4

1«Háy, Izrail! Eger qaytpaqshı bolsań,
– deydi Jaratqan Iye, –
Eger Maǵan qaytpaqshı bolsań,
Jerkenishli butlarıńdı Meniń kózimnen joǵaltsań,
Joldan azǵırılmay júrseń,
2Haqıyqat, ádalat hám tuwrılıq penen:
„Tiri Jaratqan Iye haqı ant ishemen“, – deseń,
Onda milletler Men arqalı jarılqanıp,
Meniń menen maqtanadı».

3Jaratqan Iye Yahuda xalqına hám Erusalim turǵınlarına bılay deydi:

«Súrilmegen jerińizdi súriń,
Tikenler arasına tuqım seppeń.
4Yahuda xalqı hám Erusalim turǵınları,
Júregińizdegi jamanlıqlardı alıp taslap,
Maǵan, Jaratqan Iyege ózińizdi baǵıshlań.
Bolmasa, jawız islerińiz sebepli,
Ǵázebimdi ot kibi lawlataman,
Onı hesh kim sóndire almas».

Arqadan keletuǵın apat

5«Yahudada járiyalap, Erusalimde jar salıp, bılay deńler:
„El boylap kárnay shalıń!“
Baqırıp bılay dep aytıń:
„Jıynalıp, qorǵanlı qalalarǵa qashayıq!“
6Sionǵa qashıń dep, bayraq kóteriń!
Sızılmay, tezirek qashıp qutılıń!
Óytkeni Men arqa tárepten apat,
Ullı qırǵın alıp kelemen.

7Arıslan ininen shıqtı,
Milletlerdi joq qılıw ushın jolǵa shıqtı.
Jerińdi wayran etiw ushın,
Ol óz ornınan qozǵaldı.
Yahuda, seniń qalalarıń qarabaqanaǵa aylanadı,
Adamsız húwlep qaladı.
8Sonıń ushın aza kiyimin kiyip, zarlap jılań,
Sebebi Jaratqan Iyeniń lawlaǵan ǵázebi bizdi shetlep ótpedi.

9Sol kúni,
– deydi Jaratqan Iye, –
Patshanıń hám hámeldarlardıń júrekleri suwlaydı,
Ruwxaniylerdi qorqınısh biylep alıp,
Payǵambarlar ań-tań boladı».

10Sonda men bılay dedim:

– Wah, Quday Iye! «Sizlerge tınıshlıq boladı», – dep, bul xalıqtı hám Erusalimdi pútkilley aldadıń. Qılısh alqımına taqalıp tur-ǵo!

11«Sol waqıtta bul xalıqqa hám Erusalimge bılay dep aytıladı: „Shóldegi jalańash tóbelerden esken ıssı samal Meniń xalqım tárepke espekte. Biraq ol qırman suwırıw yaki dándi tazalaw ushın emes. 12Mennen keletuǵın samal júdá kúshli boladı. Olardıń ústinen húkim shıǵaratuǵın waqıt keldi. Bunı Men aytaman“.

13„Áne, dushpan bult kibi jaqınlap kiyatır,
Sawash arbaları quyınǵa megzer.
Atları búrkitten de shaqqan.
Sorımız qurısın, sorlap qaldıq!“
14Háy, Erusalim! Júregińdi jamanlıqtan tazala, qutqarılasań.
Jawız niyetlerińdi qashanǵa deyin ishińde saqlamaqshısań?
15Dannan bir dawıs esitiledi,
Efrayım tawınan apatshılıq xabarı kelmekte.

16Milletlerge járiyalap, Erusalimge xabarlań:
Alıslardan basqınshılar kiyatır,
Yahuda qalalarına qarsı sawash súrenin aytıp baqırmaqta.
17Olar atızdaǵı saqshılarǵa uqsap,
Erusalimdi qorshap aladı.
Sebebi Erusalim Maǵan qarsı bas kóterdi,
– deydi Jaratqan Iye. –
18Bulardıń hámmesin basıńa salǵan,
Seniń jollarıń hám isleriń boladı.
Bul jawızlıǵıńnıń kesapatı.
Qanday ashshı! Bul seniń júregińniń tórine jetti!»

19Way, janım! Way, janım!
Azarına shıday almayman!
Wah, júregim! Júregim hásiret shegip atır!
Úndemey tura almayman,
Sebebi kárnay sestin, sawash shawqımın esittim.
20Apatshılıq izinen apatshılıq keldi,
Pútkil jurt was-wayran boldı.
Kózdi ashıp-jumǵansha, shatırlarım,
Bir demde perdelerim jırtılıp ketti.
21Qashanǵa deyin, men sawash bayraqların kórip,
Kárnay seslerin esite beremen?

22«Meniń xalqım aqmaq,
Olar Meni tanımaydı.
Olar nadan balalar, olarda túsinik joq.
Olar jamanlıq qılıwǵa sheber,
Jaqsılıq qılıwdı bilmeydi».

23Men, Eremiya jerge qaradım,
Ol bos hám tússiz edi.
Aspanǵa qaradım, onda nur joq edi.
24Tawlarǵa qaradım, olar qaltırasar,
Pútkil tóbeler terbelip turar edi.
25Qaradım, wah, hesh kim joq,
Kóktegi barlıq quslar ushıp ketken edi.
26Qaradım, Jaratqan Iyeniń aldında,
Ónimdar topıraq shólge aylanıp,
Pútkil qalalar wayran bolǵan edi.
Buǵan Onıń lawlaǵan ǵázebi sebepshi edi.

27Jaratqan Iye bılay deydi:
«Men bul jerdi pútkilley joq qılmasam da,
Onıń hámmesi qańırap, bosap qaladı.
28Sonlıqtan jer aza tutıp, aspan túneredi.
Men ayttım, Men qarar qıldım,
Ókinbeymen, pikirimnen qaytpayman.

29Barlıq qala xalqı,
Atlılardıń hám sadaqshılardıń shawqımınan qashadı.
Kimisi qalıń putalarǵa tıǵıladı,
Kimisi jartaslarǵa órmeleydi.
Hámme qalalar qańırap qaladı,
Olarda jasaytuǵın hesh kim bolmaydı.

30Háy, wayran bolǵan sen!
Nege qırmızı kiyim kiyip aldıń?
Ne ushın altın taǵınshaqlar taǵıp,
Kózlerińdi baqıraytıp boyap aldıń?
Biykarǵa bezenip alıpsań.
Oynaslarıń seni jek kóredi,
Olar seniń janıńdı almaqshı.

31Men tolǵatıp atırǵan hayaldıń baqırǵan dawısına,
Birinshi balasın tuwıp atırǵan hayaldıń,
Íńqıldısına uqsaǵan dawıstı esitip turman.
Men qız Sionnıń entikken dawısın esitip turman.
Ol qolların sozıp bılay demekte:
„Sorım qurısın!
Janımdı almaqshı bolǵanlar aldında dimarım qurıdı“».