Jer 40 | KaaIBT22L | STEP | Babiloniyaǵa súrgin etilgen pútkil Erusalim hám Yahuda tutqınları menen birge Eremiya da shınjır menen baylanıp, Ramaǵa alıp barıldı. Ol jerde saqshılar baslıǵı Nabuzaradan Eremiyanı tawıp, onı bosattı. Sonda Eremiyaǵa Jaratqan Iyeden sóz tústi.

‏ Jeremiah 40

Eremiya Gedaliyanıń qasında boladı

1 Babiloniyaǵa súrgin etilgen pútkil Erusalim hám Yahuda tutqınları menen birge Eremiya da shınjır menen baylanıp, Ramaǵa alıp barıldı. Ol jerde saqshılar baslıǵı Nabuzaradan Eremiyanı tawıp, onı bosattı. Sonda Eremiyaǵa Jaratqan Iyeden sóz tústi. 2 Saqshılar baslıǵı Eremiyanı qasına shaqırıp alıp, oǵan bılay dedi:

– Qudayıń Jaratqan Iye bul elge apatshılıq jawdırajaǵın aytqan eken. 3 Mine, onı jawdırıp, aytqanınday qıldı. Bulardıń hámmesi Jaratqan Iyege qarsı gúna islegenińiz hám Oǵan qulaq salmaǵanıńız sebepli bolıp otır. 4 Búgin men seni qolıńdaǵı shınjırlardan azat etemen. Eger meniń menen Babilonǵa ketiwdi qáleseń, júr, men saǵan kózqulaq bolaman. Eger ketiwdi qálemeseń, onda qal. Mine, pútkil el aldıńda jatır. Qay jaqqa ketiwdi qáleseń, yaki qay jaqqa ketiwdi názerińde tuwrı dep tapsań, sol jerge kete ber.

5 Eremiya juwap berip úlgermey-aq, Nabuzaradan sózin dawam etti:

– Babiloniya patshası tárepinen Yahuda qalalarına hákim etip qoyılǵan Shafannıń aqlıǵı Axiqam ulı Gedaliyanıń janına bar. Onıń menen birge xalıq arasında jasay ber. Yamasa qay jaqqa ketiwdi qáleseń, sol jaqqa ket.

Saqshılar baslıǵı oǵan azıq-awqat hám sawǵalar berip, bosatıp jiberdi.

6 Eremiya Mispadaǵı Axiqamnıń ulı Gedaliyanıń janına ketti. Mispaǵa barıp, onıń menen birge elde qalǵan xalıqtıń arasında jasadı.

Yahuda hákimi Gedaliya

7 Dalalarda boy tasalap qalǵan barlıq áskerbasılar hám olardıń adamları Babiloniya patshasınıń Axiqam ulı Gedaliyanı hákim qılıp qoyǵanın hám súrginge alıp ketilmegen jarlı erkeklerdi, hayallardı hám balalardı oǵan tapsırǵanın esitti. 8 Sonda Netaniya ulı Ismayıl, Qareax ulları Yuxanan menen Ionatan, netofalı Tanxumet ulı Seraya, netofalı Efay ulları, maaxalı Ezaniya hám olardıń áskerleri Mispaǵa Gedaliyaǵa keldi. 9 Shafannıń aqlıǵı Axiqam ulı Gedaliya olarǵa hám olardıń áskerlerine ant iship, bılay dedi:

– Kaldeylerge xızmet etiwden qorqpań. Elge ornalasıp alıp, Babiloniya patshasına xızmet etiń, sonda abadan turmısqa erisesiz. 10 Men bul jerge keletuǵın kaldeylerge wákillik qılıw ushın Mispada jasap qalaman. Sizler sharap, jazǵı miyweler hám záytún mayın jıynap, saqlap qoyıńlar da, ózlerińiz ornalasıp alǵan qalalarda jasay berińler.

11 Moabta, ammonlardıń arasında, Edomda hám basqa ellerde jasap atırǵan yahudiylerdiń hámmesi Babiloniya patshası Yahudada bir topar adamlardı qaldırǵanın, olarǵa Shafannıń aqlıǵı Axiqamnıń ulı Gedaliyanı hákim qılıp qoyǵanın esitti. 12 Olardıń hámmesi súrgin qılınǵan jerlerdiń bárinen Yahuda jerine, Mispaǵa, Gedaliyanıń aldına qaytıp keldi. Olar sol jerde kóp miywe jıynap, mol sharap tayarladı.

13 Qareax ulı Yuxanan menen shól daladaǵı áskerbasılar Mispadaǵı Gedaliyaǵa kelip, 14 oǵan:

– Ammonlardıń patshası Baalistiń sizdi óltiriw ushın Netaniya ulı Ismayıldı jibergeninen xabarıńız bar ma? – dedi. Biraq Axiqam ulı Gedaliya buǵan isenbedi. 15 Keyin Qareax ulı Yuxanan Mispada jasırın túrde Gedaliyaǵa:

– Keliń, men barıp, Netaniya ulı Ismayıldı óltireyin, bunı hesh kim bilmeydi. Ne ushın sizdi óltiriwine, qasıńızǵa jıynalǵanlardıń tarqap ketiwine hám Yahudada qalǵanlardıń nabıt bolıwına jol qoyıwımız kerek? – dedi. 16 Biraq Axiqam ulı Gedaliya Qareax ulı Yuxananǵa:

– Bulay isleme, sen Ismayıl tuwralı jalǵan aytıp tursań, – dedi.