Jer 41 | KaaIBT22L | STEP | Jetinshi ayda patsha áwladınan hám patshanıń wázirlerinen biri bolǵan Elishamanıń aqlıǵı Netaniyanıń ulı Ismayıl on adamı menen Mispadaǵı Axiqam ulı Gedaliyaǵa keldi. Olar Mispada birge iship-jep otırǵanda,

‏ Jeremiah 41

Ismayıldıń Gedaliyanı óltiriwi

1 Jetinshi ayda patsha áwladınan hám patshanıń wázirlerinen biri bolǵan Elishamanıń aqlıǵı Netaniyanıń ulı Ismayıl on adamı menen Mispadaǵı Axiqam ulı Gedaliyaǵa keldi. Olar Mispada birge iship-jep otırǵanda, 2 Netaniya ulı Ismayıl menen onıń janındaǵı on adam orınlarınan turdı da, Babiloniya patshası sol elge hákim qılıp qoyǵan Shafannıń aqlıǵı Axiqam ulı Gedaliyanı qılısh penen shawıp tasladı. 3 Ismayıl Mispada Gedaliya menen birge bolǵan barlıq yahudiylerdi de, ol jerdegi kaldey áskerlerin de óltirdi.

4 Erteńine Gedaliyanıń óltirilgeni haqqında hesh kim bilmey turıp, 5 Shexemnen, Shilodan hám Samariyadan seksen adam keldi. Olar qayǵıdan saqalların qırqqan, kiyimlerin jırtqan, denelerin tilgen bolıp, qollarında Jaratqan Iyeniń Úyine alıp kiyatırǵan ǵálle sadaqası menen xosh iyisli tútetkisi bar edi. 6 Olardı kútip alıw ushın Mispadan Netaniya ulı Ismayıl jolǵa shıqtı. Ol jılap ushırasıp, olarǵa:

– Axiqam ulı Gedaliyaǵa barıńlar, – dedi.

7 Endi qala ortasına kelgende, Netaniya ulı Ismayıl hám onıń janındaǵı adamlar olardı óltirip, suw saqlaǵıshqa tasladı. 8 Biraq olardıń arasınan on adam Ismayılǵa:

– Bizlerdi óltirme, bizlerdiń atızda jasırıp qoyǵan biydayımız, arpamız, mayımız hám palımız bar, – dedi. Sonda ol ózin tutıp, olardı qasındaǵıları menen birge óltirmey, aman qaldırdı.

9 Ismayıl Gedaliyaǵa tiyisli ólilerdiń denelerin taslaǵan suw saqlaǵısh júdá úlken bolıp, onı patsha Asa Izrail patshası Baashadan qorǵanıw ushın qazdırǵan edi. Netaniya ulı Ismayıl onı óli denege toltırdı. 10 Ismayıl Mispadaǵı qalǵan pútkil xalıqtı – patshanıń qızların hám saqshılar baslıǵı Nabuzaradan Axiqam ulı Gedaliyanıń ıqtıyarına tapsırǵan Mispada qalǵan pútkil xalıqtı tutqınǵa aldı. Netaniya ulı Ismayıl olardı aydap, ammonlar tárepke ótiw ushın jolǵa tústi.

11 Biraq Qareax ulı Yuxanan hám onıń janındaǵı pútkil áskerbasılar Netaniya ulı Ismayıl islegen jınayatları haqqında esitkende, 12 adamlarınıń hámmesin alıp, Netaniya ulı Ismayıl menen urısıw ushın jolǵa shıqtı. Olar Gibondaǵı mol suwlı háwiz janında Ismayıldıń izinen jetti. 13 Ismayıldıń qasındaǵı pútkil xalıq Qareax ulı Yuxanandı hám onıń qasındaǵı áskerbasılardı kórgende, quwanıp ketti. 14 Ismayıl Mispada tutqınǵa alǵan adamlardıń hámmesi izge, Qareax ulı Yuxananǵa qaray juwırdı. 15 Biraq Netaniya ulı Ismayıl segiz adamı menen Yuxanannan qutılıp, ammonlarǵa qashıp ketti.

Mısırǵa qashıw

16 Qareax ulı Yuxanan hám onıń janındaǵı barlıq áskerbasılar aman qalǵanlardıń hámmesin Axiqam ulı Gedaliyanı óltirgen Netaniya ulı Ismayıldan qutqarıp, hám Gibonnan izge qaytarıp alıp kelgen áskerlerdi, hayallardı, balalardı, saray xızmetkerlerin Mispadan alıp shıqtı. 17 Olar jol júrip, Mısırǵa ótiw ushın, Beytlehem jaqınındaǵı Gerut-Kimhamda toqtadı. 18 Babiloniya patshası el ústinen hákim qılıp qoyǵan Axiqam ulı Gedaliyanı Netaniya ulı Ismayıl óltirgeni sebepli, olar kaldeylerden qorqtı.