Jer 42 | KaaIBT22L | STEP | Keyin barlıq áskerbasılar, Qareax ulı Yuxanan, Hoshaya ulı Ezaniya hám úlken-kishi pútkil xalıq Eremiya payǵambarǵa kelip,

‏ Jeremiah 42

Xalıqtıń Eremiyadan Qudaydıń erkin bilip beriwdi sorawı

1 Keyin barlıq áskerbasılar, Qareax ulı Yuxanan, Hoshaya ulı Ezaniya hám úlken-kishi pútkil xalıq Eremiya payǵambarǵa kelip, 2 oǵan bılay dedi:

– Ótinishimizdi qabıl etip, bizler ushın, mına aman qalǵanlar ushın Qudayıń Jaratqan Iyege duwa et. Kórip turǵanıńday, kópten az qaldıq. 3 Qay jerge barıp, ne isleytuǵınımızdı Qudayıń Jaratqan Iye bizge kórsetsin.

4 Eremiya payǵambar olarǵa:

– Yaqshı, aytqanıńızday, men Qudayıńız Jaratqan Iyege duwa etemen hám Jaratqan Iye ne dep juwap berse de, onı sizlerge ayan qılaman. Sizlerden hesh nárseni jasırmayman, – dedi. 5 Olar Eremiyaǵa jáne bılay dedi:

– Eger Qudayıń Jaratqan Iye bizge bildiriw ushın saǵan ayan etken hár bir sózge ámel qılmasaq, Jaratqan Iyeniń Ózi bizlerge qarsı haqıyqıy hám sadıq gúwa bolsın. 6 Jaqsı bolsa da, jaman bolsa da, bizler seni janına jiberip atırǵan Qudayımız Jaratqan Iyege qulaq asamız. Qudayımız Jaratqan Iyege qulaq assaq, abadan turmısqa erisemiz.

7 On kúnnen keyin, Eremiyaǵa Jaratqan Iyeden sóz tústi. 8 Eremiya Qareax ulı Yuxanandı, onıń menen birge áskerbasılardı hám úlken-kishi pútkil xalıqtı shaqırıp, 9 olarǵa bılay dedi:

– Ótinishińizdi bildiriw ushın meni Izraildıń Qudayı Jaratqan Iyeniń dárgayına jibergen edińiz. Ol bılay deydi: 10 «Eger usı jerde qalsańız, Men sizlerdi qayta tikleymen, qulatpayman, otırǵızaman, qoparıp taslamayman. Sebebi Men Ózim basıńızǵa salǵan apatshılıq sebepli ókinip atırman. 11 Ózlerińiz qorqıp atırǵan Babiloniya patshasınan endi qorqpań. Onnan qorqpań, – deydi Jaratqan Iye, – Men sizler menen birge bolaman. Sizlerdi onıń qolınan qutqaraman hám azat etemen. 12 Men sizlerge rehim qılaman, sonda onıń sizlerge janı ashıp, sizlerdi óz jerińizge qaytaradı».

13 Eger sizler: «Bul jerde qalıwdı qálemeymiz», – dep Qudayıńız Jaratqan Iyeniń sózine qulaq salmasańız, 14 jáne: «Yaq, bizler Mısırǵa ketemiz. Ol jerde urıs ta kórmeymiz, onı xabarlaǵan kárnay sestin de esitpeymiz, nanǵa zar bolmaymız, sol jerde jasaymız», – deseńiz, 15 onda Yahudanıń aman qalǵanları, Jaratqan Iyeniń sózin tıńlań! Izraildıń Qudayı Álemniń Jaratqan Iyesi bılay deydi: «Eger sizler Mısırǵa barıwǵa qarar etip, sol jerge barıp jasasańız, 16 sizler qorqqan qılısh ol jerde izińizden jetedi, sizler qorqqan ashlıq Mısırda jaǵańızǵa jabısadı hám sizler sol jerde ólesiz. 17 Mısırǵa barıp jasawdı qarar qılǵan hár bir adam qılıshtan, ashlıqtan hám illetten óledi. Men basıńızǵa jawdıratuǵın apatshılıqtan hesh kim tiri qalmaydı, hesh kim qashıp ta qutıla almaydı».

18 Izraildıń Qudayı Álemniń Jaratqan Iyesi bılay deydi: «Erusalim turǵınlarına qáhár-ǵázebim tógilgenindey, Mısırǵa kirgenińizde, sizlerge de ǵázebim tógiledi. Sizler ǵarǵısqa qalıp, qorqınıshlı kóriniske aylanasız, náletlenip, nasaqqa qalasız. Bul jerdi qaytıp kórmeysiz».

19 Háy, Yahudanıń aman qalǵanları! Jaratqan Iye sizlerge Mısırǵa ketpewdi buyırdı. Bilip qoyıń, búgin men sizlerge eskertip atırman. 20 Meni Qudayıńız Jaratqan Iyeniń dárgayına jiberip: «Bizler ushın Qudayımız Jaratqan Iyege duwa et. Onıń aytqanlarınıń hámmesin bizlerge bildir, bizler de oǵan ámel qılamız», – degenińizde, úlken qátege jol qoydıńız. 21 Men búgin sizlerge bunı bildirdim, biraq sizler Qudayımız Jaratqan Iyeniń men arqalı aytqan sózlerine qulaq salmadıńız. 22 Endi jaqsılap bilip qoyıń, barıp jasamaqshı bolǵan jerińizde qılıshtan, ashlıqtan hám illetten ólesiz.