Jer 43 | KaaIBT22L | STEP | Eremiya pútkil xalıqqa ózleriniń Qudayı Jaratqan Iyeniń sózlerin, ózleriniń Qudayı Jaratqan Iyeniń ózin jiberip ayttırǵan sózlerin tolıq aytıp bolǵanda,

‏ Jeremiah 43

Eremiyanıń Mısırǵa alıp ketiliwi

1 Eremiya pútkil xalıqqa ózleriniń Qudayı Jaratqan Iyeniń sózlerin, ózleriniń Qudayı Jaratqan Iyeniń ózin jiberip ayttırǵan sózlerin tolıq aytıp bolǵanda, 2 Hoshaya ulı Azariya, Qareax ulı Yuxanan hám surbet adamlardıń hámmesi Eremiyaǵa bılay dedi:

– Sen jalǵan aytıp tursań. Qudayımız Jaratqan Iye seni bizlerge: «Mısırǵa barıp jasamań», – dep aytıw ushın jibergen joq. 3 Kaldeyler bizlerdi óltirsin yamasa Babiloniyaǵa tutqın etip alıp ketsin dep, bizlerdi olardıń qolına tapsırıw ushın Neriya ulı Barux seni bizlerge qarsı iytermelemekte.

4 Solay etip, Qareax ulı Yuxanan, áskerbasılar hám pútkil xalıq Jaratqan Iyeniń Yahudada qalıw tuwralı aytqan buyrıǵına qulaq aspadı. 5 Yahudada jasaw ushın tarap ketken jerlerinen qaytıp kelgen yahudiylerdiń aman qalǵanlarınıń hámmesin Qareax ulı Yuxanan hám áskerbasılar ertip ketti. 6 Bulardan tısqarı, olar babilonlı saqshılar baslıǵı Nabuzaradannıń Shafannıń aqlıǵı Axiqam ulı Gedaliyanıń qasında qaldırıp ketken adamlarınıń hámmesin: erkek hám hayallardı, balalardı, patshanıń qızların, Eremiya payǵambardı hám Neriya ulı Baruxtı ózleri menen alıp ketti. 7 Olar Jaratqan Iyege qulaq aspay, Mısır jerine ketip, Taxpanxeske jetip keldi.

8 Taxpanxeste Eremiyaǵa Jaratqan Iyeden sóz tústi:

9 – Qolıńa úlken taslardı alıp, olardı Taxpanxestegi faraonnıń sarayınıń kirer awzındaǵı gerbishler arasına kóm. Bunı yahudiylerdiń kóz aldında isle. 10 Keyin olarǵa ayt: «Izraildıń Qudayı Álemniń Jaratqan Iyesi bılay deydi: Mine, Men Babiloniya patshası qulım Nabuxodonosordı bul jerge alıp kelip, onıń taxtın mına kómilgen taslar ústine ornataman. Nabuxodonosor patshalıq shatırın usı taslardıń ústine tigedi. 11 Ol kelip, Mısırdı wayran qıladı. Táǵdirine ólim jazılǵan óledi, táǵdirine súrgin jazılǵan súrginge ketedi, táǵdirine qılısh jazılǵan qılısh penen shabıladı. 12 Babiloniya patshası Mısır qudaylarınıń butxanalarına ot qoyadı, butlardı jandıradı, bazıların ózi menen alıp ketedi. Shopan tonın búrgeden tazalaǵanday, Mısırdı da solay tazalaydı. Keyin ol jerden aman-esen shıǵıp ketedi. 13 Ol Mısır jerindegi Quyash qudayınıń butxanasındaǵı Quyash qudayına arnap qoyılǵan kiyeli taslardı buzıp, Mısır qudaylarınıń barlıq butxanaların órtep jiberedi».