‏ Jeremiah 48

Moab tuwralı payǵambarshılıq

1Izraildıń Qudayı Álemniń Jaratqan Iyesi Moab tuwralı bılay deydi:

«Nebonıń sorı qurıp, qarabaqanaǵa aylanadı.
Kiryatayım masqara bolıp, basıp alınadı.
Shermende bolıp, qorǵanı wayran etiledi.
2Moabtıń dańqı sónedi.
Xeshbonda dushpanları oǵan qarsı joba dúzedi,
„Keliń, bul milletti qurtayıq“, – desedi.
Madmen qalası, seniń sestiń óshedi,
Qılısh seni quwalaydı.
3Xoronayımnan dad-páriyad esitiledi:
„Ullı qırǵınshılıq hám wayranshılıq“.
4Moab quladı,
Balaları shıńǵırıp jılamaqta.
5Ókirip jılawı menen,
Luxit biyikligine kóteriledi,
Xoronayımǵa túsetuǵın jolda,
Qırǵınnıń zarlı dawısın esitedi.
6Qashıńlar, bas sawǵalańlar!
Shóldegi jıńǵıl putasınday jan saqlańlar.

7Moab, sen islegen isleriń ushın,
Baylıǵıńa úmit baylaǵanıń ushın qolǵa alınasań.
Ruwxaniyleri hám hámeldarları menen,
Kemosh súrgin etiledi.
8Jaratqan Iyeniń aytqanınday,
Hár bir qalanı qırıp taslawshı keledi,
Birde bir qala aman qalmaydı,
Oypatlıq nabıt boladı,
Tegislik jer menen jeksen boladı.
9Moabqa qábir tasın qoyıń,
Onıń qalaları shólge aylanadı,
Ol jerde hesh kim jasamaydı.
10Jaratqan Iyeniń tapsırǵan isin,
Nemquraydı orınlaǵanǵa,
Onıń qılıshın qan tógiwden toqtatqanǵa nálet jawsın!

11Moab jaslıǵınan biyqáterlikte,
Tındırılǵan sharaptay tınısh jasadı.
Onı ıdıstan ıdısqa quymadı,
Súrginge alıp ketpedi.
Sonlıqtan onıń dámi saqlanıp qalǵan,
Xosh iyisi ózgermegen.

12Biraq onı ıdıstan ıdısqa ózgertetuǵın adamlardı jiberetuǵın kúnler keledi, – deydi Jaratqan Iye. – Onı tógedi, ıdısların bosatadı hám gúzelerin shıl-párshe etedi. 13Izraildıń ózleri isengen Beyt-El sebepli uyatqa qalǵanınday, Moab ta Kemosh sebepli uyatqa qaladı.

14Sizler qalayınsha: „Bizler márt jawıngerlermiz,
Sawashqa tayar batırlarmız“, – deysiz.
15Moab wayran qılınadı,
Qalaları basıp alınadı,
Saylandı jigitleri qırıp taslanadı, – deydi,
Atı Álemniń Jaratqan Iyesi bolǵan Patsha.
16Moabqa qırǵın jaqınlaspaqta,
Apat oǵan jeldey ushıp kelmekte.
17Aynalasında jasaytuǵınlar ol ushın jılańlar,
Onıń atın biletuǵınlar joqlaw aytıp:
„Wah, qúdiretli hasa,
Dańqlı tayaq qalay sındı?“– deńler.

18Qız Dibon turǵınları!
Saltanatlı ornıńızdan túsip,
Qurǵaq jerde otırıń.
Moabtı qırǵın qılǵan sizlerge kelip,
Qorǵanlarıńızdı wayran qıladı.
19Aroer turǵınları!
Jol jaǵasında turıp, názer salıń,
Qashqan erkekten hám qutılǵan hayaldan:
„Ne boldı?“– dep sorań.
20Moab masqara boldı, joq qılındı!
Páriyad etiń, ókirip jılań!
Moabtıń wayran bolǵanın,
Arnon sayında járiya etiń.
21Tegisliktegi mına qalalar ústinen húkim shıǵarıldı:
Xolon, Yahasa, Mefaat,
22Dibon, Nebo, Beyt-Diblatayım,
23Kiryatayım, Beyt-Gamul, Beyt-Meon,
24Keriyot, Bosra hám Moabtıń uzaq hám jaqın hár bir qalası.
25Moabtıń shaqı sındı, qolı kesildi,
– deydi Jaratqan Iye. –
26Onı más bolǵanınsha ishkiziń,
Sebebi ol Jaratqan Iyege kókirek kóterdi.
Moab óz qusıǵına ózi awnap jatsın,
Adamlarǵa kúlki bolsın.
27Sen Izraildıń ústinen kúlmediń be?
Ol tuwralı sóz bolsa, bas shayqaytuǵınday,
Ol ne urlıq ústinde uslanıp pa edi?
28Moab turǵınları!
Qalalarıńızdı taslap,
Jartaslar arasında jasań.
Uyasın úńgirdiń awzına salǵan,
Kepterdey bolıń.
29Bizler Moabtıń tákabbirligi,
Onıń asa menmenligi,
Órkókirekligi menen bálentpárwazlıǵı,
Maqtanshaqlıǵı hám pańpańlıǵı tuwralı esittik.
30Men onıń surbetligin bilemen,
– deydi Jaratqan Iye, –
Onıń maqtanǵanları bos, isleri push.
31Sol sebepli Moab ushın zarlap,
Pútkil Moab ushın jılayman,
Kir-Xeres xalqı ushın joqlaw aytaman.
32Sibmanıń júzimzarları!
Seniń ushın Yazer ushın jılaǵanımnan da kóbirek jılayman.
Seniń shaqalarıń teńizden asıp ótip,
Yazerge deyin sozıldı.
Qırǵın qılıwshı jazǵı jemisińe,
Pisip turǵan júzimińe hújim etti.
33Moabtıń baǵ-baqshalarınan, atızlarınan,
Shadlıq hám quwanısh tartıp alındı.
Júzim sıǵılatuǵın shuqırlardan,
Aǵatuǵın sharapqa shek qoydım.
Onda endi qosıq aytıp júzim basqılanbaydı.
Shawqım-súren bola beredi,
Biraq ol quwanısh shawqımı emes.

34Olardıń páriyad etip baqırǵan dawısı,
Xeshbonnan Elale hám Yahasqa deyin,
Soardan Xoronayımǵa hám Eglat-Shelishiyaǵa deyin esitiledi.
Hátteki, Nimrim suwları da qurıp qaldı.
35Men Moabtaǵı sıyınıw orınlarında qurbanlıq bergendi,
Óz qudaylarına tútetki tútetkendi,
Joq qılaman, – deydi Jaratqan Iye.
36Sol sebepli júregim sırnay kibi,
Moab ushın sızlaydı.
Kir-Xeres xalqı ushın,
Júregim sırnay kibi ıńıranadı.
Sebebi olar qolǵa kirgizgen baylıǵınan jurday boldı.

37Hár bir adam shashın aldırıp, saqalın qırqıp,
Qolların tilip jaraqatlap,
Aza kiyimin kiygen.
38Moabtıń barlıq úshekleri menen maydanlarında,
Ǵalaba jılasqan dawıslar esitiledi.
Sebebi Men Moabtı kereksiz ıdıstay sındırıp tasladım,
– deydi Jaratqan Iye.
39Wah, Moab qanday shıl-párshe boldı!
Olar qattı baqırıp jılamaqta!
Moab shermendelikten júzin jasırmaqta!
Ol kúlkige qalıp,
Átirapındaǵılar ushın qorqınıshqa aylandı.

40Jaratqan Iye bılay deydi:
Qarań, qanatların Moab ústine jayıp,
Dushpan búrkit kibi ushıp júr.
41Keriyot qolǵa túsedi,
Qorǵan qalalar basıp alınadı.
Sol kúni Moab jawıngerleriniń júregi,
Tolǵatıp atırǵan hayaldikindey boladı.
42Moab Jaratqan Iyege qarsı bas kótergeni ushın,
Xalıqlar arasınan joq qılınadı.
43Moab turǵınları!
Seni qorqınısh, shuqır hám duzaq kútpekte,
– deydi Jaratqan Iye. –
44Qorqınıshtan qashqan shuqırǵa,
Shuqırdan shıqqan duzaqqa túsedi.
Óytkeni Meniń Moabtı,
Jazalaytuǵın jılım keldi,
– deydi Jaratqan Iye. –
45Haldan tayǵan qashqınlar,
Xeshbonnıń sayasında toqtaydı.
Biraq Xeshbon qalasınan ot,
Sixon patshanıń qalasınan jalın shıǵıp,
Moab elin jandırıp,
Qozǵalańshı xalqın jalmaydı.
46Moab, sorıń qurısın!
Quday Kemoshtıń xalqı nabıt boldı,
Ullarıń súrginge aydaldı,
Qızlarıń tutqınǵa alındı.
47Biraq aqırǵı kúnlerde Men Moabtıń,
Abadanshılıǵın qaytarıp beremen», – deydi Jaratqan Iye.

Moabtıń jazası usı jerde juwmaǵına jetedi.