‏ Jeremiah 49

Ammon tuwralı payǵambarshılıq

1Jaratqan Iye ammonlar haqqında bılay deydi:
«Izraildıń ulları joq pa?
Onıń miyrasxorı joq pa?
Onda ne ushın Moloxqa tabınatuǵınlar,
Gad urıwınıń jerin iyelep,
Xalqı Gadtıń qalalarında jasap atır?
2Sonlıqtan sonday kúnler keledi,
– deydi Jaratqan Iye, –
Ammonlardıń bas qalası Rabbaǵa qarsı,
Urıs dabılın qaqtıraman.
Ol úyilgen topıraqqa aylanadı, órteledi.
Sonda Izrail ózlerinen tartıp alınǵanlardı iyeleydi,
– deydi Jaratqan Iye. –
3Zar jıla, Xeshbon!
Óytkeni Ay qalası qırıp taslandı.
Rabba hayalları páriyad etiń!
Aza kiyimin kiyip, ókirip jılań!
Atızlarda gezip júriń!
Óytkeni ruwxaniyleri hám hámeldarları menen,
Molox súrgin qılınadı.
4Oypatlıqlarıń menen nege maqtanasań?
Oypatlıqlarıń nabıt boladı.
Biyopa qız, ǵáziynelerińe isenip:
„Maǵan kim hújim ete aladı?“– dediń.
5Men Ózim saǵan hámme tárepten,
Qorqınısh jiberemen,
– deydi Iye, Álemniń Jaratqan Iyesi. –
Sizler quwılıp, tarap qashasız,
Qashqınlardı hesh kim qayta jıynamaydı.
6Biraq bunnan keyin, Men ammonlardıń,
Burınǵı abadanshılıǵın qaytarıp beremen», – deydi Jaratqan Iye.

Edom tuwralı payǵambarshılıq

7Edom tuwralı Álemniń Jaratqan Iyesi bılay deydi:
«Temanda endi danalıq joq pa?
Danalarda másláhát qalmadı ma?
Olardıń danalıǵı ǵayıp boldı ma?
8Dedan turǵınları!
Artıńızǵa qaramay, qashıp,
Úńgirlerge jasırınıń.
Men Esawdı jazalaǵanımda,
Basına apatshılıq jawdıraman.
9Baǵıńda júzim tergenler,
Azǵantay bolsa da júzim qaldırmas pa edi?
Túnde kelgen urılar,
Keregin urlamas pa edi?
10Biraq Esawdı tır jalańash qılaman,
Sırlı jerlerin áshkara qılaman,
Ol jasırına almaydı.
Onıń urpaqları,
Aǵayin hám qońsıları joq qılınadı,
Ózi de joq boladı.
11Hesh kim: „Jetimlerińizdi qaldırıń,
Olardıń janın saqlayman.
Jesirlerińiz de maǵan úmit baylasın“, – dey almaydı».

12Jaratqan Iye bılay deydi:
«Jaza kesesinen ishiwi kerek bolmaǵanlar da,
Onnan ishkende, sen jazasız qalasań ba?
Yaq, jazasız qalmaysań,
Álbette, onnan isheseń.
13Óz atım menen ant ishemen,
– deydi Jaratqan Iye, –
Bosra qorqınıshlı kóriniske aylanıp, nasaqqa qaladı,
Shólge aylanıp, ǵarǵısqa duwshar boladı.
Onıń barlıq qalaları máńgi bosap qaladı».

14Men Jaratqan Iyeden bir xabar esittim,
Milletlerge jollanǵan jarshı:
«Bir jerge jıynalıp, oǵan qarsı shıǵıń,
Ayaqqa turıp, sawashqa atlanıń!» – dedi.

15«Men seni milletler arasında arzımas,
Adamlar arasında jek kórinishli qılaman.
16Qáweterge túsiwiń hám tákabbir júregiń,
Seni aldadı.
Háy, jartastıń jarıqlarında jasaytuǵın,
Tóbelerdiń biyik shoqqıların iyelegen!
Búrkit kibi uyańdı bálent qursań da,
Seni ol jerden tómenge túsiremen,
– deydi Jaratqan Iye. –
17Edom qorqınıshlı kóriniske aylanadı.
Ol jerden ótken hár bir adamnıń júregi suwlap,
Apatshılıqları sebepli janı túrshigedi.
18Sodom menen Gomora hám olardıń átirapındaǵı qalalardıń,
Jer menen jeksen bolǵanı sıyaqlı,
– deydi Jaratqan Iye, –
Edomda da birde bir adam jasamaydı,
Tiri jan qalmaydı.

19Men Iordan boyındaǵı qalıń toǵaydan,
Jap-jasıl jaylawǵa shıqqan arıslan sıyaqlı,
Edom xalqın ol jerden asıǵıs quwıp shıǵaman.
Men olarǵa patsha beremen, biraq ol olardı qorǵay ala ma?
Sebebi Maǵan teń keletuǵın kim bar?
Mennen kim esap talap qıla aladı?
Qaysı patsha Maǵan qarsı tura aladı?»

20Sonlıqtan Jaratqan Iyeniń Edomǵa qarsı dúzgen jobasın,
Teman turǵınları ushın niyetlegen maqsetin esitiń:
«Haqıyqatında, súriwdegi eń jası da súyrep ketiledi,
Olardıń jaylawları bosap qaladı.
21Olardıń qulaǵan dawısınan,
Jer júzi lárzege keledi.
Qıshqırısqan dawısları,
Qızıl teńizge deyin esitiledi.
22Áne, dushpan búrkit kibi joqarı ushıp,
Qanatların Bosranıń ústine jaydı.
Sol kúni Edom áskerleriniń júregi,
Tolǵatqan hayaldıń júregindey boladı».

Damask tuwralı payǵambarshılıq

23Damask tuwralı payǵambarshılıq:
«Xamat hám Arpad uyatqa qaldı,
Qorqınıshlı xabardı esitip, qattı muńaydı.
Ruwxı túsip,
Tolqın kóterilgen teńizdey basılmaydı.
24Damask hálsirep, qasha jóneldi,
Onı qorqınısh biylep aldı.
Tolǵaq tutqan hayalday,
Onı azap hám dárt tuttı.
25Quwanıshım mákanı bolǵan,
Bul dańqlı qala qalayınsha taslap ketildi?
26Onıń jas jigitleri kóshelerde óledi,
Barlıq áskerleri sol kúni qaza tabadı,
– deydi, Álemniń Jaratqan Iyesi. –
27Damask diywallarına ot qoyaman,
Ben-Hadad qorǵan qalasın órt jalmaydı».

Kedar hám Xasor tuwralı payǵambarshılıq

28Babiloniya patshası Nabuxodonosor basıp alǵan Kedar hám Xasor patshalıqları tuwralı Jaratqan Iye bılay deydi:

«Barıp, Kedarǵa hújim qılıń,
Shıǵıstaǵı xalıqlardı joq qılıń!
29Olardıń shatırları menen súriwleri tartıp alınadı,
Perdeleri, buyımları, túyeleri talan-taraj qılınadı,
Adamlar way-waylap: „Qáwip dónbekte“, – dep baqırısadı.
30Xasor turǵınları! Qashıńlar,
Uzaqlarǵa ketińler,
Úńgirlerge jasırınıńlar!
– deydi Jaratqan Iye. –
Sebebi Babiloniya patshası Nabuxodonosor,
Sizler ushın qarar qabıl etti,
Sizlerge qarsı joba dúzdi.
31Barıń, tınısh hám qáwipsiz jasap atırǵan,
Xalıqqa hújim etiń,
– deydi Jaratqan Iye. –
Olardıń dárwazaları da, támbileri de joq,
Olar jeke jasaydı.
32Olardıń túyeleri oljalanıp,
Kóp malları qolǵa alınadı.
Tulımshaqların kestirip júretuǵın bul adamlardı,
Tórt tárepke tarqatıp jiberemen,
Hár tárepten olarǵa apat jiberemen,
– deydi Jaratqan Iye. –
33Xasor máńgige qańırap,
Saǵallar mákanına aylanadı.
Ol jerde birde bir adam jasamaydı,
Tiri jan qalmaydı».

Elam tuwralı payǵambarshılıq

34Yahuda patshası Sedekiyanıń patshalıǵınıń baslarında Eremiya payǵambarǵa Elam haqqında sóz tústi. 35Álemniń Jaratqan Iyesi bılay dedi:
«Elamnıń qúdiretiniń negizi bolǵan,
Sadaǵın sındıraman,
36Aspannıń tórt tárepinen jiberilgen samal menen,
Elamdı tórt tárepke tarqatıp jiberemen.
Elamnan súrgin etilgenlerdiń,
Ayaq baspaǵan jurtı qalmaydı.
37Elamdı dushpanlarınıń,
Janında qastı bolǵanlardıń aldında albırataman.
Men lawlaǵan ǵázebimdi,
Ústine apat qılıp jawdıraman,
– deydi Jaratqan Iye. –
Olardı pútkilley joq qılmaǵansha,
Izine qılısh salaman.
38Men taxtımdı Elamǵa ornatıp,
Onıń patshasın hám hámeldarların joq qılaman,
– deydi Jaratqan Iye. –
39Biraq aqırǵı kúnlerde Elamǵa,
Abadanshılıǵın qaytarıp beremen»,
– deydi Jaratqan Iye.