‏ Jeremiah 5

Erusalimniń gúnası

1«Erusalim kóshelerin aylanıń,
Átirapına qarap, ańlań,
Qala maydanlarınan izleń.
Eger ádalatlı hám haqıyqattı izlegen bir adam tapsańız,
Onda Men bul qalanıń gúnasınan ótemen.
2Olar: „Tiri Jaratqan Iye haqı ant ishemiz“, – dese de,
Negizinde, ishken antı jalǵan».

3Jaratqan Iye, Seniń názeriń haqıyqatqa tigilgen emes pe?
Olardı urdıń, biraq olar azarın sezbedi,
Olardı joq qılmaqshı boldıń, biraq sabaq alıwdan bas tarttı.
Olar betlerin jartastan da qattı qılıp,
Izge qaytıwdı qálemedi.
4Men ishimnen: «Bul adamlar ǵárip hám aqılsız,
Olar Jaratqan Iyeniń jolın,
Óz Qudayınıń Nızamın bilmeydi.
5Endi men abıraylı adamlarǵa barıp,
Olar menen sóylesemen.
Olar Jaratqan Iyeniń jolın,
Óz Qudayınıń Nızamın biledi», – dep oyladım.
Biraq olardıń hámmesi de Qudayınıń moyıntırıǵın sındırıp,
Kisenlerin úzip taslaǵan eken.
6Sonlıqtan toǵaydan shıqqan arıslan olardı tilkimlep,
Shóldegi qasqır olardı ǵajıp taslaydı.
Qaplan qalaları janında buqqıda jatıp,
Qaladan shıqqan hár bir adamdı tilkim-tilkim qıladı.
Sebebi olardıń qılmısı úlken,
Opasızlıǵı sansız.

7«Seni qalay keshiremen?
Balalarıń Meni taslap ketip,
Quday bolmaǵan butlar haqı ant ishti.
Men olardı toydırdım.
Olar bolsa, qıyanet etip,
Toplanısıp, buzıqlardıń úylerine ketti.
8Olar kúyge kelgen ayǵırlar kibi,
Hár biri qońsısınıń hayalına kisneydi.
9Bular ushın Men olardı sózsiz jazalamayman ba?
– deydi Jaratqan Iye. –
Usınday bir milletten ósh almayın ba?

10Júzimzarlarına kirip, olardı wayran qılıń,
Biraq pútkilley joq qılmań.
Júzim shaqalarınıń kereksizlerin julıp taslań,
Endi olar Maǵan, Jaratqan Iyege tiyisli emes.
11Izrail hám Yahuda xalıqları,
Maǵan pútkilley qıyanet etti», – deydi Jaratqan Iye.

12Xalıq Jaratqan Iye haqqında jalǵan sóylep, bılay deydi:
«Ol hesh nárse qılmaydı,
Basımızǵa apatshılıq túspeydi,
Bizler qılısh ta, ashlıq ta kórmeymiz.
13Payǵambarlar samalǵa megzer,
Olarda Jaratqan Iyeniń sózi joq.
Aytqanları olardıń ózleriniń basına tússin».

14Sonlıqtan Álemniń Qudayı Jaratqan Iye bılay deydi:
«Xalıq bul sózlerdi aytqanı ushın,
Óz sózlerimdi seniń awzıńda jalınday qılaman.
Bul xalıqtı otın qılaman,
Ot olardı jandırıp joq qıladı.
15Háy, Izrail xalqı,
– deydi Jaratqan Iye, –
Sizlerdiń ústińizge,
Uzaq jerden bir milletti alıp kelemen.
Ol kúshli hám áyyemgi xalıq bolıp,
Sol adamlardıń tilin sen bilmeyseń,
Sózine de túsinbeyseń.
16Olardıń oq jayları ashıq qábirge megzer,
Adamlarınıń hámmesi batır jawıngerler.
17Olar seniń zúráátińdi hám nanıńdı jep taslap,
Ul-qızlarıńızdı jalmap jutadı.
Mayda hám iri mallarıńızdı,
Júzim hám ánjirlerińizdi jeydi.
Sizler isengen qorǵanlı qalalarıńızdı,
Qılısh penen wayran qıladı.

18Hátte, sol kúnleri de, – deydi Jaratqan Iye, – sizlerdi pútkilley joq qılmayman. 19Xalıq sennen: „Nege Qudayımız Jaratqan Iye bizlerge bul nárselerdi isledi?“– dep sorasa, olarǵa bılay dep juwap ber: „Sizler Onı tárk etip, óz jerińizde basqa qudaylarǵa xızmet ettińiz. Endi sizler ózlerińizge tiyisli bolmaǵan jerde basqalarǵa solay xızmet etesiz“.

20Yaqıptıń xalqına jar salıp,
Yahudada járiyalań:
21Háy, kózi bolsa da, kórmegen,
Qulaǵı bolsa da, esitpegen,
Nadan hám biyparasat xalıq,
Qulaq salıń!
22Mennen qorqpaysız ba?
– deydi Jaratqan Iye. –
Meniń aldımda qaltıramaysız ba?
Men qumdı teńizge shegara,
Máńgi ótip bolmaytuǵın bóget qıldım.
Tolqınlar tassa da, ústine shıǵa almaydı,
Shuwlasa da, onnan asıp kete almaydı.
23Biraq bul xalıq ójet hám qozǵalańshı.
Olar azǵırılıp, óz jolına qaytıp ketti.
24Olar júregine túyip:
„Gúzgi hám báhárgi jawındı óz waqtında jawdıratuǵın,
Jıyın-terim ushın belgilengen hápteni saqlap kelgen,
Qudayımız Jaratqan Iyeden qorqayıq“, – demeydi.
25Ayıplarıńız sizlerdi usı jaqsı nárselerden uzaqlastırdı,
Gúnalarıńız bereketten mahrum etti.

26Xalqımnıń arasında jawız adamlar bar,
Olar qus awlaǵanday buqqıda jatıp,
Duzaq qurıp, adamlardı tutadı.
27Tordıń qusqa tolǵanınday,
Olardıń úyleri de jalǵanǵa tolı.
Sonlıqtan olar kúsheyip, bayıdı,
28Semirip, jıltıradı.
Olardıń jawız isleriniń shegarası joq.
Jetimniń dawa-arzın ádalatlı qaramaydı,
Isti onıń paydasına sheshpeydi,
Jarlınıń huqıqın da qorǵamaydı.
29Bular ushın Men onı jazalamayın ba?
– deydi Jaratqan Iye. –
Bunday milletten ósh almayın ba?

30Sol jerde qorqınıshlı hám tań qalarlıq nárse bolmaqta:
31Payǵambarlar jalǵan payǵambarshılıq qılmaqta,
Ruwxaniyler ózleriniń qálewi boyınsha basqarmaqta.
Meniń xalqıma bul unamaqta.
Biraq bulardıń aqırı kelgende ne qılasız?»