‏ Jeremiah 50

Babiloniya tuwralı payǵambarshılıq

1Babilon hám kaldeylerdiń jeri haqqında Jaratqan Iyeniń Eremiya payǵambar arqalı aytqan sózi mınaw:

2«Milletler arasında járiyalap, jar salıń,
Bayraq kóteriń, olarǵa esittiriń,
Hesh nárseni jasırmay aytıń:
„Babilon qolǵa alındı,
Qudayı Bel shermende boldı,
Qudayı Merodax shilpárshe boldı.
Onıń butları masqara boldı,
Músinleri sındırıp taslandı“.
3Sebebi arqadan bir millet oǵan qarsı shıǵıp,
Onıń jerin shólge aylandıradı.
Ol jerde hesh kim jasamaydı,
Adam da, haywan da onnan qashıp ketedi.
4Sol kúnleri hám sol waqıtları,
– deydi Jaratqan Iye, –
Izrail xalqı Yahuda xalqı menen birge,
Kóz jas tógip kelip,
Ózleriniń Qudayı Jaratqan Iyeni izleydi.
5Olar Sionǵa qaray bet burıp,
Oǵan baratuǵın joldı soraydı.
„Keliń, umıtılmaytuǵın máńgilik kelisim dúzip,
Jaratqan Iye menen jarasayıq“, – deydi.
6Meniń xalqım adasqan qoylarday,
Shopanları olardı adastırıp,
Tawlarǵa aydap jiberdi,
Olar taw-tóbelerde gezip,
Óz órisin umıttı.
7Qoylarıma dus kelgen olardı jedi,
Dushpanları: „Biz ayıplı emespiz,
Olar haqıyqat órisi bolǵan Jaratqan Iyege,
Ata-babalarınıń úmiti bolǵan,
Jaratqan Iyege qarsı gúna isledi“, – deydi.

8Babilonnan qashıp ketiń,
Kaldeylerdiń jerinen shıǵıp ketiń,
Súriwdi baslap júrgen tekedey bolıń.
9Mine, Men arqadaǵı ullı milletler toparın,
Babilonǵa qarsı kóterip, alıp kelemen.
Olar Babilonǵa qarsı sap tartıp turadı,
Onı qolǵa aladı.
Oqları mergen áskerdikindey,
Hesh biri bos ketpeydi.
10Kaldeyler talan-taraj qılınıp,
Onı talaǵanlardıń bári oljaǵa batıp qaladı,
– deydi Jaratqan Iye.

11Háy, miyrasımdı talaǵan babiloniyalılar!
Sizler más bolıp, yoshlandıńlar,
Otlaqtaǵı qasharday sekirip quwanıp,
Ayǵırday kisnedińler.
12Biraq ana jurtıńız uyatqa qaladı,
Kindik qanıńız tamǵan jer ayaq astı boladı.
Ol milletler ishindegi eń áhmiyetsizi bolıp,
Shólge, quw dalaǵa, sahraǵa aylanadı.
13Jaratqan Iyeniń ǵázebinen,
Elsiz bolıp, pútkilley qańırap qaladı.
Babilonnan ótken hár bir adamnıń júregi suwlap,
Apatshılıqları sebepli janı túrshigedi.
14Háy, sadaqshılar,
Babilon átirapına sap tartıp turıń.
Oǵan oq atıń, oqlardı ayamań,
Sebebi ol Jaratqan Iyege qarsı gúna isledi.
15Hámme tárepten qalaǵa qaray baqırıń!
Ol táslim boldı, minaraları quladı,
Diywalları jer menen jeksen boldı.
Bul Jaratqan Iyeniń óshi, onnan ósh alıń,
Ózi ne islegen bolsa, ózine de sonı isleń.
16Babiloniyada egin ekkendi,
Oraq waqtında oraqshını da joq qılıń.
Dushpan qılıshınan qashıp,
Hár bir adam óz xalqına qaytsın,
Óz watanına qashıp barsın».

Izraildıń qayta tikleniwi

17«Izrail arıslanlar quwıp,
Súriwden ayırılıp qalǵan qoyǵa uqsaydı.
Dáslep onı Assiriya patshası jalmadı,
Al mına, onıń súyegin kemirgen sońǵısı,
Babiloniya patshası Nabuxodonosor boldı.
18Sonlıqtan Izraildıń Qudayı,
Álemniń Jaratqan Iyesi bılay deydi:
Men Assiriya patshasın qalay jazalaǵan bolsam,
Babiloniya patshası menen onıń elin de solay jazalayman.
19Izraildı jáne óz órisine qaytaraman,
Ol Karmelde, Bashanda otlap,
Efrayım tawlarında hám Giladta toyıp júredi.
20Sol kúnleri hám sol waqıtta,
– deydi Jaratqan Iye, –
Izraildıń ayıbı izlenedi,
Biraq hesh bir ayıp tabılmaydı.
Yahudanıń gúnası izlenedi,
Biraq onnan hesh bir gúna tabılmaydı.
Men aman qaldırǵanlarımdı keshiremen».

Jaratqan Iyeniń Babiloniyanı jazalawı

21«Meratayım jerine hám Peqod ▼

▼ Meratayım… Peqod – bul atamalar arqalı pútkil Babiloniya názerde tutılǵan.

xalqına hújim qılıńlar.
Olardı qırıp, tolıq joq qılıń,
– deydi Jaratqan Iye. –
Ózińe buyırǵanlardıń hámmesin orınla.
22Babiloniyada urıs shawqımı hám ullı wayranshılıq!
23Pútkil dúnyanı toqpaqlap ezgen Babiloniya,
Endi qanshelli sınıp, maydalandı!
Ol milletler arasında,
Qanday qorqınıshlı kóriniske aylandı!
24Men saǵan duzaq qurdım,
Babilon, sen bilmey, oǵan tústiń.
Jaratqan Iyege qarsı shıqqanıń ushın,
Sen tabıldıń hám tutqınǵa alındıń.
25Iyeniń, Álemniń Jaratqan Iyesiniń,
Kaldeylerdiń jerinde isleytuǵın isi bolǵanı sebepli,
Jaratqan Iye zat saqlaytuǵın bólmesin ashıp,
Onnan ǵázep quralların shıǵardı.
26Babilonǵa hár tárepten hújim qılıń.
Onıń dárwazaların ashıń,
Qaladaǵınıń hámmesin úyin-úyin qılıp jıynap,
Pútkilley joq qılıń.
Onnan hesh nárse qaldırmań.
27Barlıq batırların óltiriń,
Qırıp taslań.
Olardıń sorı qurısın!
Óytkeni olardıń kúni keldi,
Jaza alatuǵın waqtı jetti.

28Babiloniyadan qashıp qaytıp kelgenlerdiń dawısı esitiledi.
Olar Sionǵa kelip,
Qudayımız Jaratqan Iyeniń óshin,
Óz Ibadatxanası ushın alǵan óshin járiyalamaqshı.
29Sarıjayshılardı, oq atatuǵınlardıń hámmesin,
Babilonnıń qarsısına shaqırıń.
Qalanı qorshawǵa alıń,
Hesh kim qutılıp kete almasın.
Islegen isine jarasa qaytarıń,
Ózi ne islegen bolsa, ózine de sonı isleń.
Sebebi ol Izraildıń Muxaddesine,
Jaratqan Iyege qarsı kókirek kóterdi.
30Sonlıqtan jas jigitleri kóshelerde ólip,
Barlıq áskerleri sol kúni qaza tabadı, – deydi Jaratqan Iye.

31Háy, tákabbir, Men saǵan qarsıman,
– deydi Iye, Álemniń Jaratqan Iyesi. –
Seniń kúniń keldi, Men seni jazalaytuǵın waqıt jetti.
32Tákabbir súrnigip jıǵıladı,
Onı hesh kim ornınan turǵızbaydı.
Onıń qalalarına ot qoyaman,
Dógeregindegilerdiń hámmesin ot jalmaydı».

33Álemniń Jaratqan Iyesi bılay deydi:
«Izrail menen Yahuda da jábir shekpekte,
Tutqınǵa alǵanlardıń hámmesi olardı bekkem uslap,
Azat qılıwdan bas tartpaqta.
34Biraq olardıń ámeńgeri kúshli,
Onıń atı Álemniń Jaratqan Iyesi,
Ol Izraildıń isin jaqlaydı.
Jer júzine tınıshlıq,
Al Babiloniya turǵınlarına zobalań beredi.

35Kaldeylerge qılısh dónsin!
– deydi Jaratqan Iye. –
Babilon turǵınlarına,
Basshılarına hám danıshpanlarına qılısh dónsin!
36Jalǵan payǵambarlarına qılısh dónsin!
Olar aqmaqlıq qılmaqta!
Áskerlerine qılısh dónsin!
Olar nabıt bolmaqta!
37Atlarına, sawash arbalarına,
Basqa milletlerden jallap alǵan áskerlerine qılısh dónsin!
Olar hayal sıyaqlı hálsiz boladı.
Onıń ǵáziynesine qılısh dónsin!
Olar talan-taraj boladı.
38Qurǵaqshılıq baslanıp,
Suwlar tartılıp, qurıp qalsın,
Óytkeni bul jer butlar mákanı.
Qorqınıshlı butlar sebepli,
Adamlar aqıldan azdı.
39Endi ol jerde jabayı haywanlar,
Sırtlanlar hám úkiler jasaydı.
Onda adam jasamaydı,
Áwladtan-áwladqa hesh kim ayaq baspaydı.
40Sodom menen Gomoranıń,
Olardıń átirapındaǵı qalalardıń,
Jer menen jeksen bolǵanı sıyaqlı,
Ol jerde de birde bir adam jasamaydı,
Tiri jan qalmaydı, – deydi Jaratqan Iye.

41Mine, arqadan bir xalıq kiyatır.
Dúnyanıń shetinen bir ullı millet,
Sonday-aq kóplegen patshalar ayaqqa turmaqta.
42Olar oq jay hám semser menen qurallanǵan,
Ózleri de jawız hám rehimsiz.
Atlarǵa minip shawǵan sesti,
Teńiz sıyaqlı shuwıldaydı.
Qız Babilon! Saǵan hújim qılıw ushın,
Olar bir adamday sap tartıp turadı.
43Babiloniya patshası olar haqqında esitkende,
Qollarında mádar qalmadı.
Tolǵaq tutqan hayal kibi,
Onı qayǵı-azap biylep aldı.

44Men Iordan boyındaǵı qalıń toǵaydan,
Jap-jasıl jaylawǵa shıqqan arıslan sıyaqlı,
Olardı sol jerden asıǵıs quwıp shıǵaman.
Men olarǵa patsha beremen, biraq ol olardı qorǵay ala ma?
Sebebi Maǵan teń keletuǵın kim bar?
Mennen kim esap talap qıla aladı?
Qaysı patsha Maǵan qarsı tura aladı?»

45Endi, Jaratqan Iyeniń Babilonǵa qarsı dúzgen jobasın,
Kaldeylerdiń jeri ushın niyetlegen maqsetin esitiń:
«Haqıyqatında, súriwdegi eń jası da súyrep ketiledi,
Olardıń jaylawları bosap qaladı.
46„Babilon basıp alındı!“– dep baqırǵanda,
Jer júzi lárzege keledi.
Qıshqırısqan dawısları,
Milletler arasınan esitiledi».