‏ Jeremiah 51

1Jaratqan Iye bılay deydi:
«Men Babilon hám Leb-Qamay ▼

▼ Leb-Qamay – Babiloniyanıń shártli belgiler tártibi menen jazılǵan ataması. Bul «júregi Maǵan qarsılar» degen mánini bildiredi.

turǵınların,
Nabıt qılatuǵın dawıl turǵızaman.
2Babilonǵa jat jerlilerdi jiberemen.
Onı biydayday suwırıp, elin bosatıp taslaydı.
Apatshılıq kúni oǵan ján-jaqtan hújim qıladı.
3Sarıjayshılardıń sarıjayın tartıwına,
Sawıtların kiyip tayar turıwına jol qoymań.
Babilonnıń jasların ayamań,
Onıń láshkerlerin tolıq qırıp taslań.
4Qaza tapqanlar kaldeylerdiń elinde,
Óltirilgenler kóshelerde jatadı».

5Izrail hám Yahuda eli,
Izraildıń Muxaddesi aldında,
Gúnaǵa batqan bolsa da,
Qudayı Álemniń Jaratqan Iyesi,
Olardı tárk etpedi.
6Babilonlılar arasınan qashıń,
Hár kim óz janın qutqarsın.
Onıń qılmısı sebepli nabıt bolmań.
Sebebi Jaratqan Iye Babilonnan ósh almaqta,
Qılmısına jarasa jaza bermekte.
7Babilon Jaratqan Iyeniń qolında,
Pútkil dúnyanı más qılǵan,
Altın kese sıyaqlı edi.
Milletler onıń sharabınan iship,
Aqılınan azdı.
8Babilon qulap, shıl-párshe boldı.
Ol ushın jılań,
Jarasına málhám jaǵıń,
Bálkim, jazılıp qalar!

9Biz Babilonǵa shıpa bermekshi boldıq,
Ol shıpa tappadı.
Onı taslap, hámme óz watanımızǵa keteyik.
Oǵan shıǵarılǵan húkim kóklerge jetti,
Bultlarǵa deyin kóterildi.

10Jaratqan Iye bizdi aqladı,
Barıp, Qudayımız Jaratqan Iyeniń islerin,
Sionda járiya qılayıq.

11Oqlardı ushqırlap, oq qaltalardı toltırıń.
Jaratqan Iye Midiya patshalarınıń ruwxın qozǵadı.
Niyeti Babilondı joq qılıw edi.
Usılay, Jaratqan Iye Óziniń óshin,
Ibadatxanasınıń óshin aladı.
12Babilon diywallarına qarsı bayraq kóteriń,
Baqlawshılardı kúsheytiń, gúzetshiler qoyıń,
Buqqılardı tayarlań.
Jaratqan Iye maqsetlerin ámelge asıradı,
Babilon turǵınlarına aytqanların orınlaydı.
13Mol suwlar boyında,
Bay ǵáziynege iye bolǵan xalıq!
Seniń aqırıń jetti,
Ájeliń keldi.
14Álemniń Jaratqan Iyesi Ózi haqı ant ishti:
«Seni top-top shegirtkedey bolǵan,
Áskerlerge toltıraman.
Olar jeńis dawrıǵın saladı».

Jaratqan Iyege alǵıs-maqtaw

15Ol Óz qúdireti menen jerdi jarattı,
Danalıǵı menen dúnyanı qurdı,
Aqılı menen kóklerdi jaydı.
16Ol gúrkiregende kóktegi suwlar shuwıldaydı,
Ol jerdiń tórt tárepinen bultlardı kóteredi,
Jawın jawdırıw ushın shaqmaq shaqtırıp,
Saqlap qoyǵan jerinen samal estiredi.
17Hámme adam aqmaq hám bilimsiz,
Hár bir zerger soqqan butları sebepli uyatqa qaladı.
Olardıń músinleri qoldan soǵılǵan, olarda jan joq.
18Olar paydasız, masqarapazdıń isi,
Jazalaǵan waqıtta-aq joq boladı.
19Biraq Yaqıptıń Qudayı olarǵa uqsamaydı,
Ol pútkil barlıqtı jaratqan Quday.
Izrail urıwı – Onıń miyrası,
Onıń atı – Álemniń Jaratqan Iyesi.

Babilonnıń qıyralıwı

20«Babilon, sen Meniń shoqmarım ediń,
Sen arqalı milletlerdi qırıp,
Patshalıqlardı wayran qıldım.
21Sen arqalı atlar menen ondaǵı shabandozlardı,
Sawash arbaları menen arbakeshlerdi qırdım.
22Sen arqalı erkekler menen hayallardı,
Ǵarrılar menen jaslardı,
Jigitler menen qızlardı qırdım.
23Sen arqalı shopandı hám onıń súriwin,
Diyxandı hám onıń jer aydaytuǵın ógizin,
Húkimdarları menen hámeldarların qırdım.

24Babilonnıń hám pútkil kaldeylerdiń,
Sionda islegen barlıq jawızlıqların,
Sizlerdiń kóz aldıńızda ózlerine qaytaraman,
– deydi Jaratqan Iye. –
25Háy, wayran etiwshi taw,
Pútkil dúnyanı qıyratqan taw!
Men saǵan qarsıman!
– deydi Jaratqan Iye. –
Qolımdı sozıp,
Seni jartastan qulatıp,
Janıp ketken tawǵa aylandıraman.
26Sennen múyeshke qoyılatuǵın tas ta,
Tiykar tas ta alınbaydı.
Máńgige qańırap qalasań,
– deydi Jaratqan Iye».

27Sol jerde bayraq kóterip,
Milletler arasında kárnay shalıń,
Milletlerdi Babilonǵa qarsı urısqa tayarlań.
Ararat, Minniy hám Ashkenaz patshalıqların,
Babilonǵa qarsı toplań.
Oǵan qarsı sárkárda tayınlap,
Atlardı shegirtkedey ústine bastırıń.
28Babilonǵa qarsı urısıwǵa milletlerdi,
Midiya patshaların, onıń húkimdarları menen hámeldarların,
Olardıń qol astındaǵı barlıq ellerdi tayarlań.
29Jer titirep, qaltıramaqta.
Óytkeni Babilondı adamsız shólge aylandırıw haqqındaǵı,
Jaratqan Iyeniń niyeti ámelge aspaqta.
30Babilon batırları sawashtan waz keship,
Óz qorǵanlarında otır.
Kúshi ketip, hayalday bolıp qalǵan.
Olardıń jayları órtelip,
Qapı ilgishleri sındırıldı.
31Shabarman izinen shabarman,
Xabarshı izinen xabarshı kelip,
Babiloniya patshasına mına xabardı bildirdi:
«Qala hámme tárepten basıp alındı,
32Dárya ótkelleri qolǵa alındı,
Qamıslı batpaqlar órteldi,
Áskerlerdi qorqınısh biyledi».

33Izraildıń Qudayı Álemniń Jaratqan Iyesi bılay deydi:
«Orım waqtında qırman qalay aydalatuǵın bolsa,
Qız Babilon da solay qılınadı.
Tez arada sol waqıt keledi».

34«Babiloniya patshası Nabuxodonosor,
Meni jalmap, albırattı,
Bos ıdısqa aylandırıp qoydı.
Aydarhaday jutıp,
Qarnın lázzetli zatlarıma toltırdı,
Keyin qusıp tasladı.
35Bizlerge hám jerleslerimizge islengen zorlıq,
Babilonnıń basına tússin», – deydi Sion turǵınları.
«Tógilgen qanımızdıń qunı,
Kaldeylerden talap etilsin», – deydi Erusalim.

36Sonlıqtan Jaratqan Iye bılay deydi:
«Men seniń isińdi jaqlap,
Seniń ushın ósh alaman.
Teńizin qurǵatıp,
Suw bulaqların qurıtaman.
37Babilon tas úyindisine,
Saǵallar mákanına aylanadı.
Qorqınıshlı hám jandı túrshiktiretuǵın kóriniske aylanıp,
Kúlkige qaladı.
Ol jerde hesh kim jasamaydı.
38Babilon xalqı arıslanday aqıradı,
Arıslan balasınday qańsılaydı.
39Sonda, ishteyi ashılǵanda,
Men olarǵa zıyapat qurıp beremen.
Yoshlanıp, máńgilik uyqıǵa ketip,
Hesh waqıt oyanbasın dep,
Olardı más qılaman,
– deydi Jaratqan Iye. –
40Olardı toqlı, qoshqar hám serke kibi,
Soyıwǵa alıp baraman.

41Wah, Sheshax ▼

▼ Sheshax – Babilonnıń shártli belgiler tártibi menen jazılǵan ataması.

basıp alınadı!
Pútkil dúnyanıń saltanatı qolǵa alınadı!
Wah, milletler arasında Babilon qorqınıshlı kóriniske aylanadı!
42Babilondı teńiz qaplap,
Tuwlaǵan tolqınları onı bastıradı.
43Onıń qalaları qańırap,
Quw dalaǵa, shólge aylanadı,
Hesh kim jasamaytuǵın,
Adam balası ol arqalı ótpeytuǵın jer bolıp qaladı.
44Babilon qudayı Beldi jazalap,
Jutqanların qustıraman.
Endi milletler oǵan kelmeytuǵın boladı,
Babilon diywalları qulaydı.

45Xalqım Meniń! Olardıń arasınan shıǵıp,
Jaratqan Iyeniń lawlaǵan ǵázebinen,
Janıńızdı saqlap qalıń.
46Elde tarqalǵan mısh-mıshlardan,
Júregińiz artqa tartıp, qorqpasın.
Bıyıl bir gáp tarqalsa,
Kelesi jılı basqası tarqaladı.
Eldegi zorabanlıq,
Patshalar arasındaǵı urıs haqqında,
Mısh-mıshlar tarqaladı.
47Sonday kúnler kiyatır,
Men Babilonnıń butların jazalayman.
Pútkil úlke uyatqa qalıp,
Óli deneleri onıń ortasında jayrap jatadı.
48Arqadan joq qılıwshı,
Babilonǵa hújim etkende,
Aspan, jer hám ondaǵılardıń hámmesi,
Babilonnıń jaǵdayına shadlanıp, qıshqırısadı,
– deydi Jaratqan Iye. –
49Izraillılardı qırǵanı,
Jer júzindegi basqa xalıqlardı da qırǵanı ushın,
Babilon qulaydı.

50Qılıshtan qutılǵanlar irkilmey, ketiń!
Uzaq jerlerde Jaratqan Iyeni eske alıń,
Erusalimdi júrekte saqlań.
51„Bizler keyis esitkende, uyaldıq,
Shet elliler Jaratqan Iyeniń Úyiniń,
Muxaddes jerlerine kirgende,
Júzi qara boldıq!“

52Sonday kúnler keledi,
– deydi Jaratqan Iye. –
Men Babilonnıń butların jazalayman.
Pútkil jer boylap,
Jaradarlardıń páriyadı esitiledi.
53Hátte, Babilon kóklerge kóterilse de,
Bálent qorǵanların bekkem qılsa da,
Men oǵan qırǵın keltiriwshini jiberemen», – deydi Jaratqan Iye.

54Babilonnan ahıw-nala sesleri,
Kaldeylerdiń jerinen ullı qırǵın sesti esitiledi.
55Jaratqan Iye Babilondı opat etip,
Ullı shawqımın basıp tındıradı.
Dushpanları mol suwlardıń tolqınınday shuwlap,
Dawısları jańlap turadı.
56Qırǵın keltiriwshi Babilonǵa keledi.
Áskerleri tutqınǵa alınıp,
Oq jayları sındırıladı.
Jaratqan Iye – ósh alıwshı Quday,
Ol isine say tolıq qaytaradı.

57«Men Babilonnıń basshıların, danıshpanların,
Húkimdarların, hámeldarların hám áskerlerin más qılaman.
Olar oyanbaytuǵın máńgilik uyqıǵa ketedi», – deydi,
Atı Álemniń Jaratqan Iyesi bolǵan Patsha.

58Álemniń Jaratqan Iyesi bılay deydi:
«Babilonnıń qalıń diywalları jer menen jeksen boladı,
Bálent dárwazaları jaǵıp jiberiledi.
Xalıqlardıń miyneti biyhudaǵa ketedi,
Milletlerdiń miyneti otqa jemtik boladı».

59Yahuda patshası Sedekiyanıń patshalıǵınıń tórtinshi jılı, patshanıń jol saparların uyımlastırıwshı wáziri Maxseyanıń aqlıǵı, Neriyanıń ulı Seraya Sedekiya menen birge Babilonǵa keterinde, payǵambar Eremiya Serayaǵa usı tapsırmanı berdi. 60Eremiya Babilonnıń basına túsetuǵın barlıq apatshılıqlardı, Babilonǵa tiyisli barlıq sózlerdi bir orama qaǵazǵa jazıp qoyǵan edi. 61Eremiya Serayaǵa bılay dedi:

– Babilonǵa barǵanıńda, bul sózlerdi dawıslap oqıp ber. 62Keyin bılay dep duwa et: «Jaratqan Iye, bul orınnıń joq etiletuǵını, onda insan da, haywan da jasamaytuǵını, onıń máńgige qańırap jatatuǵını tuwralı Óziń ayttıń». 63Orama qaǵazdı oqıp bolıp, oǵan tas baylap, Evfrat dáryasına atıp jiber. 64Keyin bılay dep ayt: «Babilon da usılay suwǵa shógedi. Ol Men jawdıratuǵın apatshılıqtan, endi hesh qashan ayaqqa tura almaydı. Onıń hámme turǵınları nabıt boladı».

Usınıń menen, Eremiyanıń sózi juwmaǵına jetedi.