‏ Jeremiah 6

Erusalimniń qamal qılınıwı

1«Háy, Benyamin xalqı, janıńızdı qutqarıw ushın,
Erusalimnen qashıp ketiń!
Teqoada kárnay shalıń!
Beyt-Hakkeremde ot jaǵıp, belgi beriń!
Arqadan apatshılıq, ullı qırǵın kórinbekte.
2Sulıw hám názik qızdı,
Qız Siondı joq qılaman.
3Shopanlar súriwi menen oǵan kelip,
Dógeregine shatırların tigedi.
Hár kim úlesine tiygen jerde súriwin jayadı.

4„Erusalimge qarsı urısqa tayarlanıń!
Turıńlar, kúndiz hújimge shıǵayıq!
Sorımız qurısın! Kún batıwǵa meyil beripti,
Kesh túsip, kóleńkeler uzayıptı.
5Turıńlar, túnde hújim jasap,
Onıń qorǵanların qıyratayıq!“»

6Álemniń Jaratqan Iyesi bılay deydi:
«Tereklerin kesiń,
Erusalimge minetuǵın topıraq úyiń.
Bul qala jazalanadı,
Onda zorlıq-zombılıqtan basqa hesh nárse joq.
7Bulaqtan suw shıǵa bergenindey,
Bul qalada da jawızlıq solay shıǵa beredi.
Onnan zorlıq hám zulımlıqtıń dawısı esitilip tur,
Kesellik hám jaralardı kórip turman.
8Erusalim, eskertiwime qulaq sal,
Bolmasa, sennen júz buraman.
Seni qańıratıp,
Adam jasamaytuǵın jerge aylandıraman».

9Álemniń Jaratqan Iyesi bılay deydi:
«Júzimniń sońǵı solqımına deyin terilgenindey,
Dushpanlar Izraildı aman qalǵanlarınan jurday qıladı.
Sonlıqtan júzim teriwshi sıyaqlı,
Qolıńdı iske salıp shaqalardı qayta kórip shıq».

10Men kimge aytıp, kimdi qáwipten saqlayın?
Kim maǵan qulaq asadı?
Olardıń qulaqları jabıq, esitpeydi.
Jaratqan Iyeniń sózi olarǵa shermendeliktey túyiledi,
Onnan ráhátlenbeydi.
11Sol sebepli men Jaratqan Iyeniń ǵázebine toldım,
Qáhárimdi basa almayman.

«Bul ǵázepti kóshedegi balalardıń,
Jıynalıp turǵan jigitlerdiń ústine tók.
Ol erkek hám hayallarǵa jawadı,
Qartayǵanlar hám kúni jaqınlasqanlar da onnan qutıla almaydı.
12Olardıń úyleri, atızları hám hayalları,
Basqalarǵa beriledi.
Sebebi Men bul jerdiń turǵınlarına qarsı qolımdı kóteremen,
– deydi Jaratqan Iye. –
13Kishkenesinen úlkenine shekem,
Haram dúnya tabıwǵa háwes,
Payǵambarlarınan ruwxaniylerine shekem,
Hámmesi hiyle menen is tutadı.
14Tınıshlıq bolmasa da:
„Tınıshlıq, tınıshlıq“, – dep,
Xalqımnıń qáwipli jarasın júzeki emleydi.
15Islegen jerkenishli isleri ushın olar uyaldı ma?
Yaq, hesh te uyalmadı,
Qızarıw ne ekenin de bilmedi.
Sonlıqtan olar da qulaǵanlar menen qulaydı,
Jazalaǵanımda, jer menen jeksen boladı», – deydi Jaratqan Iye.

16Jaratqan Iye bılay deydi:
«Dárbent jollarda turıp, qarań,
Áyyemgi soqpaqlar haqqında sorap,
Jaqsı joldıń qay jerde ekenin úyreniń.
Onnan júriń, janıńız ráhát tabadı.
Biraq sizler: „Onnan júrmeymiz“, – dedińiz.
17Men sizlerdiń ústińizden gúzetshi qoyıp:
„Kárnaydıń dawısına qulaq salıń“, – dedim.
Biraq sizler: „Tıńlamaymız“, – dedińiz.
18Sonıń ushın, milletler, qulaq salıń,
Qarap turǵanlar, olardıń basına neler túsetuǵının biliń.
19Tıńla, jer júzi!
Bul xalıqtıń basına apatshılıq jawdıraman,
Bul olardıń jaman niyetleriniń miywesi boladı.
Olar Meniń sózlerime qulaq aspadı,
Nızamımdı qabıl etpedi.
20Ne ushın Maǵan Shebadan xosh iyisli tútetki,
Uzaq ellerden xosh iyisli qamıs alıp kelinedi?
Jandırılatuǵın qurbanlıqlarıńızdı qabıl etpeymen,
Sizlerdiń qurbanlıqlarıńız Maǵan unamaydı».

21Sonlıqtan Jaratqan Iye bılay deydi:
«Bul xalıqtıń aldına súrnigetuǵın tas qoyaman,
Ákeler balaları menen birge súrnigip jıǵıladı,
Qońsılar dosları menen birge nabıt boladı».

22Jaratqan Iye bılay deydi:
«Mine, arqa tárepten bir xalıq kiyatır,
Dúnyanıń shetinen bir ullı millet ayaqqa turmaqta.
23Olar oq jay hám semser menen qurallanǵan,
Ózleri de zalım hám rehimsiz.
Atlarǵa minip shawǵan sesti,
Teńiz sıyaqlı shuwıldaydı.
Qız Sion! Saǵan hújim qılıw ushın,
Olar bir adamday sap tartıp turadı».

24Olar haqqındaǵı bul xabardı esitip,
Qollarımızda dárman qalmadı.
Tolǵaq tutqan hayal kibi,
Shanshıw hám azap biylep aldı.
25Atızlarǵa shıqpań, jollarda júrmeń!
Dushpannıń qolında qılısh bar,
Átiraptı qorqınısh orap alǵan.
26Háy, meniń xalqım!
Aza kiyimin kiyip, kúlge otır.
Jalǵız perzent ushın aza tutqanday,
Ashshı-ashshı kóz jas tók.
Sebebi ústimizge tosattan nabıt qılıwshı keledi.

27«Men seni xalqım arasına,
Temirdi sınaǵanday etip,
Xalqımdı sınaw ushın qoydım.
Sen olardı baqlap, jollarına baha bereseń.
28Olardıń hámmesi baǵınbaytuǵın qozǵalańshı,
Ósekshi adamlar.
Olar qola hám temirdey qattı,
Bári joldan shıqqan.
29Kórik toqtawsız úplenip,
Otta qorǵasın erip atır.
Biraq zergerdiń bul isi biyhuda ketti,
Sonda da jawızlıqtan ajıratılmadı.
30Olardı „sıpatsız gúmis“dep ataydı.
Óytkeni Men, Jaratqan Iye olardan júz burdım».