Jer 7 | KaaIBT22L | STEP | Eremiyaǵa Jaratqan Iyeden mınaday sóz tústi:

‏ Jeremiah 7

Eremiyanıń Ibadatxanada waz aytıwı

1 Eremiyaǵa Jaratqan Iyeden mınaday sóz tústi:

2 – Jaratqan Iyeniń Úyiniń dárwazasında turıp, mına sózdi járiyala: «Háy, pútkil Yahuda xalqı, Jaratqan Iyege sıyınıw ushın mına dárwazalardan kirgenler! Jaratqan Iyeniń sózin tıńlań! 3 Izraildıń Qudayı Álemniń Jaratqan Iyesiniń sózi mınaw: Jollarıńızdı hám is-háreketińizdi tuwrılań. Sonda Men sizlerge bul jerde jasawǵa ruxsat beremen. 4 „Bul Jaratqan Iyeniń Ibadatxanası, bul Jaratqan Iyeniń Ibadatxanası, Jaratqan Iyeniń Ibadatxanası usı jerde“, – degen jalǵan sózlerge isenbeń. 5 Eger jollarıńızdı, islerińizdi pútkilley dúzetseńiz, bir-birińizge ádalatlı bolsańız, 6 kelgindige, jetimge hám jesirge zulımlıq qılmasańız, bul jerde nahaq qan tókpeseńiz, ózlerińizge zıyan keltiretuǵın basqa qudaylarǵa awıp ketpeseńiz, 7 onda Men sizlerge bul jerde, áwelden ata-babalarıńızǵa bergen jerde máńgi-baqıy jasawıńızǵa ruxsat beremen. 8 Degen menen, sizler paydasız jalǵan sózlerge isenip júrsiz. 9 Sizler urlıq qılasız, adam óltiresiz, neke hadallıǵın buzasız, jalǵan ant ishesiz, Baalǵa arnap, xosh iyisli tútetki tútetesiz, tanımaytuǵın basqa qudaylarǵa eresiz. 10 Keyin bul jerkenishli islerdi dawam etiw ushın, Meniń atım menen atalǵan mına Úyge kelip, aldımda turıp: „Bizler aman-esenbiz“, – deysizler me? 11 Meniń atım menen atalǵan bul Úy sizler ushın qaraqshılar mákanına aylandı ma? Degen menen, Men ne islep atırǵanıńızdı kórip turman, – deydi Jaratqan Iye. 12 – Endi Shiloǵa, Men Óz atımdı dáslepki ret ornatqan jerge barıń hám xalqım Izraildıń jawızlıǵı sebepli oǵan ne qılǵanımdı kóriń. 13 Bulardıń hámmesin sizler de isledińiz, – deydi Jaratqan Iye. – Men sizlerge qayta-qayta ayttım, qulaq salmadıńız, shaqırdım, juwap bermedińiz. 14 Solay eken, Men Shiloǵa ne qılǵan bolsam, Meniń atım menen atalǵan, sizler isengen bul Ibadatxanaǵa, sizlerge hám ata-babalarıńızǵa bergen bul jerge sonı qılaman. 15 Tuwısqanlarıńızdı, pútkil Efrayım ^{▼▼ Efrayım – arqa patshalıq Izrail názerde tutılǵan.} násillerin aldımnan qalay quwǵan bolsam, sizlerdi de solay quwaman».

Xalıqtıń boysınbawshılıǵı

16 – Eremiya, sen bul xalıq ushın duwa etpe, olar ushın páriyad qılma, jalınba, Maǵan táwelle salma. Bári bir Men seni tıńlamayman. 17 Yahuda qalalarında, Erusalim kóshelerinde olardıń ne islep atırǵanın kórip turǵanıń joq pa? 18 Balalar otın jıynaydı, ákeler ot jaǵadı, hayallar qamır iylep, Aspan xanshasına arnap mazalı nan pisiredi. Meniń ǵázebimdi keltiriw ushın, bul xalıq basqa qudaylarǵa ishimlik sadaqasın quyadı. 19 Olardıń ashıwǵa tiymekshi bolǵanı Men be? – deydi Jaratqan Iye. – Yaq, olar ózlerine zálel keltirip, uyatqa qalmaqta.

20 Sol sebepli Quday Iye bılay deydi: Men ashıw-ǵázebimdi bul jerge, adamlar menen haywanlardıń, atızdaǵı aǵashlar menen jerdiń óniminiń ústine tógemen. Ǵázebim ot bolıp janar, ol sóndirilmes.

21 Izraildıń Qudayı, Álemniń Jaratqan Iyesi bılay deydi: Jandırılatuǵın qurbanlıqlarıńızdı basqa qurbanlıqlarıńızǵa qosıp, ekewiniń de góshin jey beriń. 22 Óytkeni Men ata-babalarıńızdı Mısırdan alıp shıqqanımda, jandırılatuǵın qurbanlıq hám basqa qurbanlıqlar tuwralı hesh nárse aytpadım, buyrıq ta bermedim. 23 Men olarǵa tek mına buyrıqtı bergen edim: «Maǵan qulaq salıń. Sonda Men sizlerdiń Qudayıńız, sizler de Meniń xalqım bolasız. Bárqulla Men buyırǵan joldan júriń, sonda abadan turmısqa erisesiz». 24 Biraq olar tıńlamadı, Maǵan dıqqat awdarmadı. Kerisinshe, óz qálewi hám jawız júreginiń ójetligi jolında júrdi. Alǵa ilgerilewdiń ornına, artqa ketti. 25 Ata-babalarıńız Mısırdan shıqqan kúnnen tap usı kúnge shekem, Men olarǵa barlıq qullarımdı – payǵambarlardı hár kúni izli-izinen jiberdim. 26 Sonda da olar Meni tıńlamadı, názer de awdarmadı. Olar moyın tawlap, ata-babalarınan da beter jamanlıq qıldı.

27 Sen olarǵa usı sózlerdiń hámmesin aytasań, biraq olar seni tıńlamaydı. Sen olardı shaqırasań, biraq olar juwap bermeydi. 28 Sonlıqtan sen olarǵa bılay dep ayt: «Bul Qudayı Jaratqan Iyeniń sózine qulaq aspaǵan, tálim-tárbiyanı qabıl almaǵan millet! Haqıyqat óldi, olardıń awzınan haq sóz shıqpaytuǵın boldı.

29 Erusalim xalqı, shashıńızdı kesip ılaqtırıń,
Taqır tóbelerge shıǵıp, joqlaw aytıń.
Sebebi ǵázebine ushıraǵan bul áwladtı,
Jaratqan Iye tárk etip, taslap ketti.

30 Yahuda xalqı Meniń názerimde jawız bolǵan islerdi isledi, – deydi Jaratqan Iye. – Olar Meniń atım menen atalǵan úyge jerkenishli butlardı qoyıp, onı haramladı. 31 Ul-qızların otta jaǵıp qurbanlıq qılıw ushın, Ben-Hinnom oypatlıǵındaǵı Tofette sıyınıw orınların qurdı. Bulardı Men buyırmadım, bular oyıma kirip te shıqpadı. 32 Endi sonday kúnler keledi, – deydi Jaratqan Iye, – Ol jer Tofet yamasa Ben-Hinnom oypatlıǵı delinbeydi, al Bawızlaw oypatlıǵı dep ataladı. Tofette jerlewge orın qalmaǵansha, óliler jerlenedi. 33 Bul xalıqtıń óli deneleri aspandaǵı quslarǵa hám jerdegi jabayı haywanlarǵa jem boladı. Olardı úrkitetuǵın hesh kim qalmaydı. 34 Yahuda qalalarında hám Erusalim kóshelerinde quwanısh hám shadlıq seslerin, kelin-kúyewdiń toyınıń sestin esitilmeytuǵın qılaman. Ol el qarabaqanaǵa aylanadı».