Jer 8 | KaaIBT22L | STEP | «Sol waqıtta, – deydi Jaratqan Iye, – Yahuda patshalarınıń, basshılarınıń, ruwxaniyleriniń, payǵambarlarınıń súyekleri, Erusalim turǵınlarınıń súyekleri qábirlerinen shıǵarıp taslanadı.

‏ Jeremiah 8

1 «Sol waqıtta, – deydi Jaratqan Iye, – Yahuda patshalarınıń, basshılarınıń, ruwxaniyleriniń, payǵambarlarınıń súyekleri, Erusalim turǵınlarınıń súyekleri qábirlerinen shıǵarıp taslanadı. 2 Bul súyekler ózleri súygen, xızmet etken, izine ergen, másláhát soraǵan hám tabınǵan zatlarınıń, yaǵnıy quyashtıń, aydıń hám aspan deneleriniń astına shashıp taslanadı. Olar jıynap alınbaydı, jerlenbeydi, topıraqta tezek sıyaqlı shashılıp jatadı. 3 Bul jaman xalıqtan aman qalǵanların qay jerge súrgin qılsam da, olar ómirden ólimdi abzal kóredi», – deydi Álemniń Jaratqan Iyesi.

Gúna hám jaza

4 – Sen olarǵa ayt:

«Jaratqan Iye bılay deydi:
Jıǵılǵan adam qayta turmay ma?
Joldan adasqan izge qaytpay ma?
5 Ne ushın bul xalıq joldan shıqtı?
Ne ushın Erusalim Mennen úzliksiz júz buradı?
Olar jalǵanǵa qattı jabısıp alıp,
Maǵan qaytıwdan bas tartpaqta.
6 Men dıqqat penen tıńladım,
Olar hesh tuwrı sóylemeydi.
Hesh biri: „Ne qılıp qoydım“, – dep,
Qılmısına pushayman bolmaydı.
Olar sawashqa umtılǵan at kibi,
Hár biri óz jolına jortadı.
7 Hátte, aspandaǵı láylek te,
Óziniń qaytıw máwsimin biledi.
Qumırı, qarlıǵash hám tırna da,
Kóshiw waqtın biledi.
Biraq xalqım Meniń kórsetpelerimdi bilmeydi.
8 Qalayınsha sizler: „Bizler aqıllımız,
Jaratqan Iyeniń Nızamı bizlerde“, – dep ayta alasız.
Negizinde, xatkerlerdiń jalǵan qálemi,
Bul Nızamdı jalǵanǵa aylandırǵan joq pa?
9 Danalar uyatqa qaldı,
Albırap, duzaqqa tústi.
Olar Jaratqan Iyeniń sózinen júz burdı.
Sonda olardıń danalıǵı qayda?
10 Kishkenesinen úlkenine shekem,
Haram dúnya tabıwǵa háwes.
Payǵambarlarınan ruwxaniylerine shekem,
Hámmesi hiyle menen is tutadı.
Sonlıqtan olardıń hayalların basqalarǵa,
Atızların basqınshılarǵa beremen.
11 Tınıshlıq bolmasa da: „Tınıshlıq, tınıshlıq“, – deydi.
Xalqımnıń qáwipli jarasın júzeki emleydi.

12 Islegen jerkenishli isleri ushın olar uyaldı ma?
Yaq, hesh uyalmadı,
Qızarıw ne ekenin bilmedi.
Sonlıqtan, olar da qulaǵanlar menen qulaydı,
Jazalaǵanda, jer menen jeksen boladı, – deydi Jaratqan Iye.

13 Olardıń zúráátin joq qılaman,
– deydi Jaratqan Iye. –
Shaqalarda júzim qalmaydı,
Ánjir aǵashı da miywe bermeydi,
Hátte, japıraqları da quwrap qaladı.
Olarǵa ne bergen bolsam,
Hámmesinen juda boladı».

14 Adamlar bılay desti:
«Nege ele bul jerde otırmız?
Jıynalıp, qorǵanlı qalaǵa barayıq,
Sol jerde jan táslim qılayıq.
Qudayımız Jaratqan Iyege qarsı gúna islegenimiz ushın,
Ol bizlerge záhárli suw ishkizip,
Ólim jazasın berdi.
15 Bizler tınıshlıq kúttik,
Biraq jaqsılıq kelmedi,
Shıpa waqtın kúttik,
Biraq tosattan qorqınıshqa duwshar boldıq.
16 Dushpan atlarınıń pısqırıǵı,
Dannan esitilip tur.
Ayǵırlarınıń kisnegeninen,
Pútkil jer júzi titirep atır.
Olar bul jerdi hám ishindegi hámme nárseni,
Qalanı hám onda jasaytuǵınlardıń hámmesin,
Joq qılıw ushın keldi».

17 «Men arańızǵa jılanlardı,
Aldap-arbawǵa kónbeytuǵın uwlı jılanlardı jiberemen.
Olar sizlerdi shaǵadı», – deydi Jaratqan Iye.

18 Dártime shıpa joq,
Júregim jaralı.
19 Tıńlań, xalqımnıń zarlaǵan dawısı,
Jerdiń alıs túpkirinen esitilip tur:
«Jaratqan Iye Sionda emes pe?
Onıń Patshası da endi ol jerde bolmay ma?»

«Ne ushın olar ózleriniń butları,
Jaramsız qudayları menen Meniń qáhárimdi keltirdi?»

20 «Báhár de ótti, jaz da tamam boldı,
Bizler ele qutqarılmadıq», – deydi xalıq.

21 Xalqımnıń azabı zardabınan men de azaplandım,
Aza tuttım, meni qorqınısh biylep aldı.
22 Giladta málhám joq pa?
Ol jerde shıpaker joq pa?
Xalqımnıń jaraqatı nege jazılmay qoydı?