‏ Jeremiah 9

1Qánekey, basım suw tolı qudıq,
Kózlerim kóz jas shıǵatuǵın bulaq bolsa edi!
Xalqımnıń qaza tapqanları ushın,
Kúni-túni joqlaw aytıp, jılar edim!
2Qánekey, shólde men ushın bir kárwan saray bolsa edi!
Xalqımdı taslap, olardan uzaqlasar edim!
Sebebi olardıń hámmesi buzıq,
Opasızlar jıyındısı.

3«Olar jalǵan ushın tillerin oq jay kibi iyedi,
Nahaqlıqtıń arqasınan olar jerde kúsheyip barmaqta,
Jawızlıq ústine jawızlıq qılmaqta,
Meni hasla tanımaydı,
– deydi Jaratqan Iye. –
4Hár birińiz óz dostıńızdan saqlanıń,
Tuwısqanlarıńızdıń birde birewine isenbeń.
Sebebi hár bir tuwısqan jalǵanshı,
Hár bir dos ósekshi.
5Hár kim óz dostısın aldaydı,
Hesh kim haqıyqattı sóylemeydi.
Tillerin jalǵan sóylewge úyretken,
Qılmıs islew menen ózlerin harıqtırdı.
6Sen, Eremiya, ótirikshiler arasında jasap atırsań,
Ótirikshiligi sebepli olar Meni tanıwdan bas tartadı», – deydi Jaratqan Iye.

7Sonlıqtan Álemniń Jaratqan Iyesi bılay deydi:
«Men olardı otta eritip, sınaqtan ótkeremen.
Xalqımnıń jaman isine bunnan basqa ne qılayın?
8Olardıń tilleri óltiretuǵın oq,
Hiyle menen sóyleydi,
Dostı menen kózabaǵa jaqsı sóylesedi,
Biraq ishinen oǵan duzaq quradı.
9Bular ushın Men olardı jazalamayın ba?
– deydi Jaratqan Iye, –
Bunday milletten ósh almayın ba?»

10Men tawlar ushın jılap-sıqlap,
Daladaǵı jaylawlar ushın joqlaw aytaman.
Olar kúyip, shólge aylandı,
Hesh kim ol jerden ótpeydi,
Mallardıń dawısı da esitilmeydi.
Quslar da, haywanlar da ol jerden qashıp ketken.

11«Men Erusalimdi tas úyindisine,
Saǵallardıń mákanına aylandıraman.
Yahuda qalaların shólge aylandırıp,
Adamsız bos qaldıraman».

12Bunı túsiniwge kimniń danalıǵı jetedi? Bul jerdiń ne ushın qurıp, wayran bolıp, hesh kim júrmeytuǵın shólge aylanǵanın bizge túsindiretuǵınday, Jaratqan Iyeniń awzınan shıqqan sózdi kim alıp, járiyaladı?

13Jaratqan Iye bılay deydi: «Olar Meniń ózlerine bergen Nızamımdı orınlawdan bas tarttı, dawısıma qulaq aspadı hám Nızamıma say jasamadı. 14Kerisinshe, olar qaysarlıq penen óz júrek qálewlerine berilip, ata-babaları úyretkenindey, Baallarǵa erdi».

15Sonıń ushın Álemniń Jaratqan Iyesi Izraildıń Qudayı bılay deydi: «Men bul xalıqqa ashshı juwsan jegizip, záhárli suw ishkizemen. 16Men olardı ózleri de, ata-babaları da tanımaytuǵın milletlerdiń arasına tarqatıp jiberemen. Olar tolıq qırılıp bolmaǵansha, izine qılısh salaman».

17Álemniń Jaratqan Iyesi bılay deydi:
«Oylanıp kóriń!
Joqlaw aytıp jılaytuǵın hayallardı shaqırıń!
Olardıń eń sheberlerin aldırtıń!
18Jıldam kelip, bizler ushın jılasın,
Kózimizden jas shıǵarıp,
Qabaǵımızdan suwday aǵızsın.
19Sionnan joqlaw aytıp jılaǵan dawıs esitiledi:
„Bizler wayran boldıq!
Qattı uyatqa qaldıq!
Jerimizdi tárk ettik,
Mákanımız jer menen jeksen boldı“».

20Háy, hayallar, Jaratqan Iyeniń sózin tıńlań!
Awzınan shıqqan sózge qulaq salıń!
Qızlarıńızǵa jılawdı,
Olardıń doslarına joqlaw jırın aytıwdı úyretiń.
21Kóshelerde balalardı,
Maydanlarda jaslardı qırıp taslaw ushın,
Ólim áyneklerimizge tırmasıp,
Qorǵan qalalarımızǵa kirdi.

22Olarǵa ayt:
«Jaratqan Iye bılay deydi:
Adamnıń óli deneleri,
Ashıq daladaǵı qıy sıyaqlı,
Oraqshılardan qalǵan masaq sıyaqlı shashılıp jatadı.
Olardı jıynap alatuǵın hesh kim bolmaydı».

23Jaratqan Iye bılay deydi:
«Dana adam danalıǵı menen,
Kúshli kúshi menen,
Bay baylıǵı menen maqtanbasın.
24Maqtanatuǵın adam Meni túsingeni hám tanıǵanı menen,
Jer júzinde súyispenshilik,
Ádalat hám tuwrılıqtı júzege asıratuǵın,
Jaratqan Iye Men ekenim menen maqtansın.
Bulardan Men ráhátlenemen», – deydi Jaratqan Iye.

25«Sonday kúnler keledi, – deydi Jaratqan Iye, – tek kózabaǵa súnnetlengenlerdiń hámmesin jazalayman. 26Mısırdı, Yahudanı, Edomdı, ammonlardı, Moabtı hám shólde jasap, tulımshaqların kesetuǵınlardıń hámmesin jazalayman. Óytkeni bul milletlerdiń bári súnnetsiz, pútkil Izrail xalqınıń da júregi súnnetsiz».