Job 1 | KaaIBT22L | STEP | Us úlkesinde Ayup atlı bir adam jasaytuǵın edi. Ol minsiz hám ádil bolıp, Qudaydan qorqatuǵın, jamanlıqtan awlaq júretuǵın adam edi.

‏ Job 1

Ayup hám onıń shańaraǵı

1 Us úlkesinde Ayup atlı bir adam jasaytuǵın edi. Ol minsiz hám ádil bolıp, Qudaydan qorqatuǵın, jamanlıqtan awlaq júretuǵın adam edi. 2 Ayuptıń jeti ulı hám úsh qızı bar edi. 3 Ol jeti mıń qoy, úsh mıń túye, bes júz jup ógiz, bes júz urǵashı eshek, sonday-aq, júdá kóp xızmetshilerge iye bolıp, shıǵıs xalıqları arasında eń bay adam edi.

4 Ayuptıń ulları úylerinde gezek penen zıyapat berip, ózleri menen iship-jew ushın, úsh apa-sińlisin de mirát etetuǵın edi. 5 Zıyapat tamam bolǵannan keyin, Ayup balaların shaqırtıp alıp, pákleniw rásiminen ótkeretuǵın edi. Ol ullarım ishlerinen Qudayǵa til tiygizip, gúna islep qoyǵan bolıwı múmkin, dep oylap, azan menen olardıń hár biri ushın jandırılatuǵın qurbanlıq beretuǵın edi. Ayup bárqulla usılay isleytuǵın edi.

Ayuptıń dáslepki sınalıwı

6 Bir kúni iláhiy barlıqlar Jaratqan Iyeniń aldına kelgende, olar menen birge shaytan da kelgen edi. 7 Jaratqan Iye shaytannan:

– Sen qay jerden kiyatırsań? – dep soradı.

Shaytan Jaratqan Iyege:

– Men jer betin gezip, onıń hámme jerin aylanıp shıqtım, – dep juwap berdi.

8 Jaratqan Iye shaytanǵa:

– Qulım Ayupqa ser saldıń ba? Jer betinde ol sıyaqlı minsiz, ádil, Mennen qorqatuǵın hám jamanlıqtan awlaq júretuǵın adam joq, – dedi.

9 Sonda shaytan Jaratqan Iyege bılay dep juwap berdi:

– Ayup Sennen biykardan-biykarǵa qorqadı dep oylaysań ba? 10 Onıń ózin, úy-ishin hám barlıq iyeligin qorǵap júrgen Óziń emesseń be? Sen onıń qolı tiygen hár bir iske bereket berip atırsań. Onıń pada hám súriwleri pútkil úlkege jayılǵan. 11 Biraq qolıńdı sozıp, oǵan tiyisli bolǵannıń hámmesin joq qılsań, onda ol júzińe tik qarap, Saǵan nálet aytadı.

12 Jaratqan Iye shaytanǵa:

– Yaqshı, Ayupqa tiyisli bolǵannıń hámmesin seniń qolıńa beremen, biraq onıń ózine zıyan tiygizbe, – dedi.

Solay etip, shaytan Jaratqan Iyeniń dárgayınan ketti.

13 Bir kúni Ayuptıń ulları menen qızları úlken ájaǵasınıń úyinde zıyapat berip, sharap iship otırǵan edi. 14 Sonda bir xabarshı juwırıwı menen Ayupqa kelip, bılay dedi:

– Ógizlerińiz jer aydap, eshekler olardıń qasında otlap júrgen edi. 15 Birden shebalı basqınshılar hújim jasap, xızmetshilerińizdiń hámmesin qılıshtan ótkerdi hám mallardı aydap alıp ketti. Bul xabardı sizge jetkiziw ushın, jalǵız men ǵana qashıp qutıldım.

16 Ol sózin tamamlap úlgermey-aq, basqa bir xabarshı kelip, bılay dedi:

– Aspannan Qudaydıń jalını túsip, qoylarıńız benen shopanlarıńız janıp, kúlge aylandı. Bul xabardı sizge jetkiziw ushın, jalǵız men ǵana aman qaldım.

17 Sol adam sózin tamamlap úlgermey-aq, úshinshi xabarshı jetip kelip bılay dedi:

– Kaldeyler úsh topar bolıp kelip, túyelerdiń padasına taslandı. Olar barlıq padashılardı óltirip, túyelerdi aydap ketti. Bul xabardı sizge jetkiziw ushın, jalǵız men ǵana qashıp qutıldım.

18 Ol usı sózlerdi aytıp turǵanda, basqa bir xabarshı kelip, bılay dedi:

– Siziń ul-qızlarıńız úlken ájaǵasınıń úyinde awqatlanıp, sharap iship otırǵan edi. 19 Birden shól tárepten kúshli dawıl kóterilip, jaydı tórt tárepinen soqqılay basladı. Úy qulap, onıń ishindegilerdiń hámmesi óldi. Bul xabardı jetkiziw ushın, jalǵız men ǵana aman qaldım.

20 Sonda Ayup ornınan turdı da, qayǵıdan shapanın jırttı hám shashın aldırıp tasladı. Keyin et betinen jerge jıǵılıp, sıyındı. 21 Ol bılay dedi:

– Anamnıń qursaǵınan jalańash shıqqan edim,
Bul dúnyadan da jalańash qaytaman.
Jaratqan Iye berdi, Jaratqan Iye aldı,
Jaratqan Iyeniń atına alǵıslar bolsın!

22 Sonsha is bolıp ótse de, olardıń hesh birinde Ayup gúna islemedi, Qudaydı da ayıplamadı.