‏ Job 10

1Ómirden toydım! Endi arzımdı erkin aytaman,
Ishimdegi ashshı dárt penen sóyleymen.
2Men Qudayǵa bılay deymen: «Meni ayıplama.
Meni ne ushın ayıplap atırǵanıńdı ayt.
3Yamasa meni eziw,
Yaǵnıy Óz qollarıń jaratqannan bas tartıw,
Zalımlardıń niyetlerin qollaw Saǵan unay ma?
4Seniń kózleriń insannıń kózlerindey me?
Yamasa Sen de olar qaraǵanday qaraysań ba?
5Seniń kúnleriń de insannıń kúnlerindey me?
Jıllarıń adamnıń jıllarınday ma?
6Ne ushın meniń gúnamdı izlep,
Ayıbımdı tabıwǵa asıǵasań?
7Biraq Sen meniń ayıpsız ekenimdi,
Seniń qolıńnan meni hesh kimniń qutqara almaytuǵının bileseń.

8Seniń qollarıń meni soǵıp, jarattı,
Biraq endi meni pútkilley joq qılmaqshımısań?
9Meni ılaydan qalay soqqanıńdı esle.
Endi meni jáne topıraqqa qaytarmaqshımısań?
10Sen emes pe, meni anamnıń qursaǵına sút kibi quyǵan,
Sol jerde meni irimtik kibi qoyıltqan,
11Meni teri hám dene menen kiyindirip,
Súyek hám sińirler menen biriktirgen?
12Sen maǵan ómir sıylap, miyrimińdi kórsettiń,
Seniń ǵamxorlıǵıń meniń ruwxımdı qorǵadı.

13Biraq, mine, Sen júregińde mına nárselerdi jasırıp qoydıń,
Seniń niyetińniń ne ekenin bilemen:
14Gúna islesem, meni gúzetip turǵan bolasań,
Bunı jazasız qaldırmaysań.
15Eger ayıplı bolsam, maǵan hásiret bolsın!
Biraq haq bolsam da, basımdı kótere almay atırman,
Uyatqa qaldım, dártim awır.
16Eger basımdı kótersem,
Arıslan kibi maǵan taslanasań,
Qorqınıshlı kúshińdi qaytadan maǵan qarsı isleteseń.
17Maǵan qarsı jańadan gúwalar alıp keleseń,
Maǵan degen ǵázebińdi arttırasań,
Shabıwıl ústine shabıwıl qılasań.

18Ne ushın tuwılıwıma jol qoydıń?
Hesh kim meni kórmesten aldın, ólgenim jaqsı edi.
19Hesh dúnyaǵa kelmegendey bolıp,
Anamnıń qursaǵınan tuwrı qábirge qoyılǵanımda edi.
20Meniń ómir kúnlerim qısqa emes pe?
Meni tınısh qoy, bir sát táselle tabayın.
21Sebebi men qaytıp kelmes jolǵa,
Tas túnek qarańǵılıq húkim súrgen jerge atlanaman.
22Qoyıw qarańǵılıqqa shúmgen jerge,
Tártipke keltirilmegen ólim túnegi eline,
Jaqtılıǵı da tas túnek bolǵan jerge ketemen».