‏ Job 11

Sofardıń birinshi sózi

1Sonda naamalı Sofar bılay dedi:

2– Sonsha kóp sóz juwapsız qala ma?
Kóp sóylegen adam aqlana ma?
3Mıljıń gápleriń adamlardıń tilin tıyıp qoysın ba?
Masqaralaǵanıńda, seni hesh kim uyaltpasın ba?
4Sen: «Tálimim minsiz,
Ózim de Qudaydıń aldında pákpen», – deyseń.
5Qáne, endi Quday juwap berip,
Saǵan qarsı til qatıp,
6Danalıqtıń sırların bildirse edi!
Sebebi danalıq kóp qırlı ǵoy.
Bilip qoy, Quday gúnalarıńnıń bazıların jeńil jazalaydı.

7Qudaydıń tereń sırların túsine alasań ba?
Qúdireti kúshli Qudaydıń shegine jete alasań ba?
8Qudaydıń danalıǵı aspannan da biyik, sen ne qıla alasań?
Óliler mákanınan da tereń, ne bile alasań?
9Onıń ólshemi jerden de uzın,
Teńizden de keń.

10Eger Quday kelip, zindanǵa taslasa,
Húkim etiw ushın shaqırsa, kim Oǵan tosqınlıq qıla aladı?
11Ol ótirikshilerdi biledi,
Ol jawızlıqtı kórip, onı itibarsız qaldıra ma?
12Qulannan adam tuwılmaytuǵını sıyaqlı,
Miyi joq adam da dana bola almaydı.

13Biraq, sen eger Oǵan júregińdi qayta baǵıshlap,
Qollarıńdı jayıp, duwa etseń,
14Eger jawızlıq islegen bolsań, onı ózińnen uzaqlastırsań,
Shatırıńnan nahaqlıqtı quwıp shıǵarsań,
15Sonda uyalmastan basıńdı kóterip,
Qorqpastan tikke turatuǵınıń sózsiz.
16Azabıńdı umıtıp,
Onı aǵıp ketken suwlar kibi yadqa alasań.
17Ómiriń tústegi kúnniń nurınan da jarıq bolar,
Ondaǵı qarańǵılıq ta tań nurına aylanar.
18Úmitiń bolǵanlıqtan, arqayın bolarsań,
Átirapıń qorshalǵanlıqtan, qáwipsiz dem alasań.
19Jatqanıńda, seni qorqıtatuǵın hesh kim bolmaydı,
Kópler sennen miyrim izlep keledi.
20Biraq zalımlardıń kózleri talıp,
Bas sawǵalaytuǵın jeri de bolmaydı,
Úmitleri tek sońǵı demin beriw bolıp qaladı.