‏ Job 12

Ayuptıń juwabı

1Sonda Ayup bılay dep juwap berdi:

2– Álbette, sizler hámmesin bilesiz,
Danalıq ta sizler menen birge ólip ketse kerek!
3Biraq mende de sizlerdegidey aqıl bar,
Men de sizlerden kem emespen,
Sizler aytıp atırǵanlardı kim bilmeydi?

4Men óz doslarıma kúlki boldım.
Qudaydı shaqırǵanımda, Ol maǵan burın juwap beretuǵın edi.
Ádil hám minsiz bolsam da, kúlkige qalıp otırman!
5Qayǵısızlar baxıtsızlıqqa ushıraǵandı mensinbeydi,
Súrnikkendi iyterip jiberedi.
6Qaraqshılardıń shatırında tınıshlıq húkim súrgen,
Qudaydıń ǵázebin keltirgenler qáwip-qátersiz jasap atır,
Tap Quday olardıń qolında sıyaqlı.

7Biraq haywanatlardan sora, olar saǵan úyretedi,
Kóktegi quslardan sora, olar saǵan aytıp beredi.
8Jer menen sóyles, ol saǵan tálim beredi,
Teńizdegi balıqlar saǵan bildiredi.
9Olardıń qaysısı bilmes,
Bulardıń hámmesi Jaratqan Iyeniń qolı menen islengenin?
10Hár bir jaratılıstıń ómiri de,
Hár bir adamnıń janı da Onıń qolında.

11Awız awqattıń dámin ajıratqanınday,
Qulaq ta sózlerdiń mánisin ayıra almay ma?
12Danalıq jası úlkenlerde bolmay ma?
Aqıl uzaq ómir súrgenlerde bolmay ma?

13Biraq Qudayda danalıq ta, kúsh te bar,
Másláhát penen aqıl da Oǵan tiyisli.
14Ol qulatqan nárse qayta tiklenbeydi,
Ol qamaqqa taslaǵandı, hesh kim bosata almaydı.
15Quday suwlardı toqtatsa, qurǵaqshılıq bolar,
Eger jiberse, dúnyanı suw alar.
16Kúsh-quwat penen jeńis te Oǵan tiyisli,
Aldanǵan da, aldaǵan da Onıń qolında.
17Ol másláhátshilerdi jalańayaq aydatıp,
Biylerdi aqmaqqa aylandıradı.
18Ol patshalardıń sánli belbewlerin sheship alıp,
Bellerine arqan baylap qoyadı.
19Ruwxaniylerdi de jalańayaq aydatıp,
Kúshlilerdi awdarıp taslaydı.
20Ol isenimli másláhátshilerdi tilden ayıradı,
Aqsaqallardı aqılınan juda qıladı.
21Ol aqsúyeklerdi shermende qıladı,
Kúshlilerdi kúshinen ayıradı.
22Ol qarańǵılıqtıń tereń sırların ashadı,
Tas túnekti de jarıqqa shıǵaradı.
23Xalıqlardı ullı qılatuǵın da, joq qılatuǵın da Ol,
Olardı kóbeytetuǵın da, tarqatıp jiberetuǵın da Ol.
24Jer betindegi xalıq basshıların aqılınan ayıratuǵın da Ol,
Jolsız shólde gezdirip qoyatuǵın da Ol.
25Olar tas túnek qarańǵılıqta sıypalanıp júredi,
Olardı más adamday teńseldirip qoyadı.