‏ Job 13

1Mine, bulardıń hámmesin kózlerim kórdi,
Qulaqlarım menen esitip, túsindim.
2Sizlerdiń bilgenlerińizdi men de bilemen,
Men sizlerden kem emespen.
3Biraq men Qúdireti kúshli Quday menen sóylesip,
Dawamdı Quday menen tartısqım keledi.
4Al sizler meni ótirik penen ılaslaysız,
Hámmeńiz paydasız táwiplerge uqsaysız.
5Qáne, hámmeńiz dım úndemey otırsańız,
Bul sizler ushın danalıq bolar edi.
6Endi meniń arzımdı tıńlap,
Keltiretuǵın dálillerime qulaq salıń.
7Quday ushın nahaq sózlerdi aytıp,
Ol ushın ótirik sóylewińiz kerek pe?
8Eki júzlilik penen Qudaydı jaqlap,
Onıń sózin sóylemekshimisiz?
9Eger Quday sizlerdi tekserse, jaqsı bola ma?
Adamlardı aldaǵanday, Onı da aldaysızlar ma?
10Eki júzlilik etip, jasırınsha Onı jaqlasańız,
Ol sizlerdi sózsiz jazalaydı.
11Onıń ullılıǵı sizlerdi qorqıtpay ma?
Onıń aybatı sizlerge hújim qılmay ma?
12Eskertiwlerińiz kúl sıyaqlı paydasız naqıllardan ibarat,
Dálillerińiz ılaydan islengen qalqanday hálsiz.

13Úndemeńler, men sóyleymen,
Keyin ne bolsa, bolar.
14Sonlıqtan táwekelge bel baylap,
Janımdı qáterge qoyıp atırman.
15Qarańlar, Ol meni óltirmekshi, úmitim qalmadı,
Biraq men jollarımdı Onıń aldında qorǵayman.
16Sol arqalı qutqarılaman,
Qudaysız adam Onıń aldına barıwǵa júrek ete almaydı.
17Sózlerimdi dıqqat penen tıńlań,
Gáplerim qulaqlarıńızǵa kirsin.
18Mine, men dawa-arzımdı tayarladım,
Aqlanatuǵınımdı bilemen.
19Meniń menen tartısatuǵın adam bar ma?
Eger birew meni ayıplı dep tapsa, úndemey ólip ketemen.

Ayuptıń duwası

20Tek mına eki nárseni sorayman, Quday,
Sonı qılsań, men Sennen artıq jasırınbayman:
21Mennen qolıńdı tart,
Hám aybatıń menen meni qorqıtpa.
22Sońınan meni shaqır, juwap beremen,
Yamasa maǵan sóylewge ruxsat berip, Óziń juwap ber.
23Meniń qansha ayıp hám gúnalarım bar?
Maǵan qılmıslarım menen gúnamdı kórset.
24Ne ushın júzińdi jasırasań?
Nege meni dushpanım dep sanaysań?
25Sen samal ushırǵan japıraqtı qorqıtpaqshımısań?
Quwrap qalǵan qawıqtı quwdalamaqshımısań?
26Sen men tuwralı ashshı ayıplar jazıp qoyıp,
Balalıǵımdaǵı gúnalarımdı maǵan miyras etip, berip atırsań.
27Ayaqlarımdı buǵawlap,
Jollarımdı gúzetip,
Izimnen hesh qalmaysań.

28Sonlıqtan shirigen nársedey,
Kúye jegen kiyimdey ıdırap joq bolmaqtaman.