‏ Job 14

1Hayaldan tuwılǵan insannıń,
Ómiri qısqa, azapqa tolı boladı.
2Ol gúl sıyaqlı ósedi, solıp qaladı,
Kóleńke sıyaqlı tez ótip ketedi, turıp qalmaydı.
3Sonday insan bolǵan maǵan názerińdi úzbey qaraysań ba?
Húkim qılıw ushın meni dárgayıńa alıp keleseń be?
4Kim haram nárseden hadal nárse shıǵara aladı?
Hesh kim!
5Insannıń kúnlerin belgilep,
Aylarınıń sanın sanap,
Asıp ketpeytuǵın shek te qoyǵan ekenseń,
6Endi onnan názerińdi alıp, onı tınıshına qoy.
Ol da kúnlikshiniń jumıs kúniniń ayaqlanǵanına quwanǵanınday, ómirinen ráhátlensin.

7Hátte, aǵashta da úmit bar,
Onı kesip taslasa, ol qayta ósedi,
Ósiwin toqtatpaydı.
8Tamırları qartayıp qawsap,
Túbiri topıraqta shirip ketse de,
9Suw iyisin alıp-aq, jaynap ketedi,
Jas terek sıyaqlı shaqaların jayadı.
10Biraq insan ólse, bar kúshinen ayırıladı,
Sońǵı demin shıǵarǵannan soń, ol qay jerde boladı?
11Kóldiń suwı qurıp qalǵanday,
Dárya suwı tartılıp, kewip qalǵanday,
12Ólgen adam da jatadı, qaytıp turmaydı,
Aspan joǵalıp ketpegenshe, ol oyanbaydı,
Uyqısınan hesh turmaydı.

13Qáne, Sen meni óliler mákanına jasırıp qoysań edi,
Ǵázebiń basılǵansha, saqlap qoysań edi!
Men ushın bir waqıt belgilep,
Sońınan meni eske alsań edi!
14Adam ólgennen soń, qayta tirile me?
Eger sonday bolsa, azat etilgenimshe,
Azaplı kúnlerimniń barlıq kúnlerinde qayta tiriliwdi kúter edim.
15Sonda meni, Óziń jaratqan jaratılısıńdı,
Kórgiń kelgende, shaqırar ediń,
Men de juwap berer edim.
16Sonda Sen adımlarımdı sanap, gúzeter ediń,
Biraq gúnalarımnıń esabın almas ediń.
17Qılmıslarımdı dorbaǵa salıp mórlep,
Islegen gúnalarımdı jasırar ediń.

18Biraq tawlar qulap, maydalanıp,
Jartaslar óz ornınan qozǵalǵanday,
19Suwdıń tastı jalmap,
Aǵıstıń topıraqtı aǵızıp ketkenindey,
Sen de insannıń úmitin joq qılasań.
20Sen onı aqırına shekem ezeseń, ol joq boladı,
Ólgeninde júzin ózgertip, uzaqqa jibereseń.
21Ulları húrmetke miyasar bolar, bunnan onıń xabarı bolmas,
Jerge urılar, bunı bilmes.
22Ol tek óz denesiniń azabın sezer,
Tek ózi ushın qayǵırar.