‏ Job 15

Elifazdıń ekinshi sózi

1Sonda temanlı Elifaz bılay dep juwap berdi:

2– Qarnın ıssı samalǵa toltırǵanday,
Dana adam bunday hawadan alınǵan sózler menen juwap bere me?
3Paydasız sózler menen aytısıp,
Mánissiz gápler aytıp, tartısar ma edi?
4Haqıyqattan da, sen Qudaydan qorqıwdı shetke ısırıp qoydıń,
Onıń aldında duwa etiwdi de bolar-bolmas nárse dep sanadıń.
5Gúnalarıń awzıńa sóz salıp tur,
Hiylekerlerdiń tili menen sóylep tursań.
6Seni ayıplap atırǵan men emes, al óz awzıń,
Tiliń ózińe qarsı gúwalıq berip tur.

7Sen ne adamzattıń tuńǵıshımısań?
Yamasa tóbeler jaratılmastan da burın tuwılǵanbısań?
8Qudaydıń májilisine qatnasıp, Onı tıńlap pa ediń?
Yamasa dana adam tek jalǵız ózińbiseń?
9Sen bilip, biz bilmeytuǵın ne nárse eken?
Sen túsinip, biz túsinbeytuǵın ne nárse eken?
10Aramızda aq shashlılar da, ǵarrılar da bar,
Olardıń jası seniń ákeńnen de úlken.
11Qudaydıń tásellesi sen ushın az boldı ma?
Saǵan aytqan jaǵımlı sózleri kemlik qıldı ma?
12Ne ushın júregiń seni alaǵada qıladı?
Ne ushın kózlerińde ǵázep otı lawlap tur?
13Ne ushın Qudayǵa ashıwlanıp,
Awzıńa sonshelli erk bereseń?

14Adam qalay pák bola aladı?
Hayal zatınan tuwılǵan bende qalay ádil bola aladı?
15Quday Óz perishtelerine de isenbeydi,
Hátte, aspan da Onıń názerinde pák emes.
16Solay eken, nahaqlıqtı suw kibi ishetuǵın,
Iplas hám buzıq insan onnan beter emes pe?

17Qulaq sal, men saǵan túsindiremen,
Ózim kórgenimdi aytıp beremen.
18Danalardıń aytqanların,
Ata-babalarınan úyrenip, jasırmay úyretkenlerin aytıp beremen.
19Jer tek olardıń ata-babalarına berilgen edi,
Olardıń arasında jat adamlar joq edi.
20Zalım adam ómir boyı azap shegedi,
Eziwshilerge berilgen jıllar sanawlı.
21Qorqınıshlı dawıslar olardıń qulaqlarınan ketpeydi,
Tınıshlıq waqtında da basqınshılardıń hújimine ushıraydı.
22Olar qarańǵılıqtan qutılıwǵa úmit etpeydi,
Olardıń táǵdirine qılıshtan óliw jazılǵan.
23Olar bir tislem nan izlep sergizdan bolar,
Qarańǵılıq kúniniń jaqınlasqanın da biler.
24Azap hám qayǵı olardı qorqınıshqa salar,
Urısqa tayar turǵan patsha sıyaqlı qorqınısh olardı jeńer.
25Olar qolların Qudayǵa qarsı kóterip,
Qúdireti kúshli Qudaydı maydanǵa shaqırar.
26Qalıń, bekkem qalqanın kóterip,
Ójetlenip, Oǵan qarsı juwırar.

27Zalım adamnıń betin may qaplap,
Bókselerine may jıynalǵan.
28Olar qarabaqanaǵa aylanǵan qalalarda jasaydı,
Qulap keteyin dep turǵan,
Qańırap qalǵan úylerde jasaydı.
29Olar bayımaydı, baylıǵı uzaqqa sozılmaydı,
Mal-múlki jer betine jayılmaydı.
30Olar qarańǵılıqtan qutıla almaydı,
Olar shaqaları janǵan terekke uqsaydı,
Qudaydıń demi olardı ushırıp jiberedi.
31Bos nársege úmit baylap, ózin aldamasın,
Olardıń sıyı boslıq boladı.
32Waqtı-saatı kelmey shawıp taslanadı,
Shaqaları endi qaytıp kógermeydi.
33Olar kókley miywesi tógilgen júzim aǵashına,
Gúlleri tógilip, miywesiz qalǵan záytún aǵashına uqsaydı.
34Qudaysızlardıń toparı násilsiz boladı,
Paraxorlardıń shatırların ot jalmap, joq qıladı.
35Olar qayǵıǵa hámiledar bolıp, jawızlıqtı tuwadı,
Júrekleri jalǵanǵa tolı boladı.