‏ Job 16

Ayuptıń juwabı

1Sonda Ayup bılay dep juwap berdi:

2– Men bunday nárselerdi kóp esittim,
Sizlerdiń hámmeńiz qanday biyshara jubatıwshısızlar!
3Bos sózlerińizdiń aqırı bar ma ózi?
Tartısıwǵa sizlerdi ne májbúrlep tur?
4Eger sizler meniń ornımda bolǵanıńızda,
Men de sizlerdiń aytqanıńızdı ayta alaman.
Sizlerge qarsı sóz toqıp aytıp,
Basımdı shayqay alaman.
5Biraq men sózlerim menen táselle berer edim,
Ernimniń qıymıldısı menen dártińizdi jeńilleter edim.

6Al házir sóylesem de, azabım jeńillenbeydi,
Sóylemesem de, ol basılmaydı.
7Eh, Quday, Sen meni jenship tasladıń,
Pútkil úy-ishimdi qırıp tasladıń!
8Júzimdi ájim menen qapladıń,
Olar maǵan qarsı gúwalıq bolmaqta,
Azǵınlıǵım da maǵan qarsı turıp,
Maǵan qarsı gúwalıq bermekte.
9Quday meni jek kórip,
Ǵázep penen tilkim-tilkim etpekte,
Tislerin qayrap maǵan,
Dushpan kózi menen qarap, meni tespekte.
10Adamlar awızların kerip ashıp,
Meni masqaralap, shekeme urdı,
Olar maǵan qarsı birikti.
11Quday meni jawızlardıń qolına tapsırdı,
Zalımlardıń qolına taslap qoydı.
12Men tınısh jasap atır edim,
Biraq Ol meni maydalap tasladı,
Jelkemnen uslap alıp, jerge urdı.
Meni Ózine nıshan qıldı.
13Onıń sadaqshıları meni qorshap aldı,
Ayamay bótekelerimdi tesip,
Ótimdi jerge tókti.
14Quday denemdegi tesiktiń ústin qayta-qayta tesip,
Jawınger ásker kibi ústime topılmaqta.

15Men ústime aza kiyimin tiktim,
Ayaq astı bolıp, topıraqta otırman.
16Jılaǵannan júzim qızardı,
Qabaqlarım qarayıp ketti.
17Biraq qollarım jawızlıq islemedi,
Duwam da taza.

18Topıraq, sen meniń qanımdı jasırma,
Páriyadım hasla tınbasın.
19Mine, házir meniń Gúwam aspanda,
Joqarıda meniń Qorǵawshım bar.
20Doslarım meni mazaq qılmaqta,
Kóz jaslarım Qudayǵa qaray aqpaqta.
21Birewdiń dosları arasında táwelleshi bolǵanınday,
Quday menen meniń aramda da bir táwelleshi bolsa edi!

22Ómirimniń aqırı jaqınlap qaldı,
Qayta kelmes jolǵa atlanaman.