Job 17
1Ruwxım túsken, ómirim az qalǵan,Qábir meni kútip turıptı.
2Mazaq qılıwshılar átirapımdı orap alǵan,
Olardıń qalay xorlıq kórsetip atırǵanın kórip turman.
3Quday, Óziń maǵan kepil bola gór,
Sennen basqa kim bar meni jaqlaytuǵın?
4Sen meniń doslarımnıń aqıl-sanasın túsinbeytuǵın etip jawıp qoydıń,
Sonlıqtan Sen olardıń jeńiske erisiwine jol qoymaysań.
5Óz paydasın gózlep, dosların satqan adamnıń,
Soqırlıǵınıń kesapatı balalarına tiyedi.
6Quday meni adamlar tilindegi ápsanaǵa aylandırdı,
Olar betime túkirdi.
7Qayǵıdan kózlerim qarawıtıp,
Denemniń súlderi qaldı.
8Ádil adamlar bunı kórip shorshıp keter,
Ayıpsızlar qudaysızlarǵa qarsı ǵázep atına miner.
9Sonda da ádil adamlar óz jollarına berik qalar,
Qolları taza bolǵanlar bekkemlenip bara berer.
10Qáne, sizler jáne bir háreket etip kóriń,
Bári bir arańızdan dana adam taba almaspan.
11Meniń kúnlerim ótip ketti,
Niyetlerim de shilpárshe boldı.
Júrektegi qálewlerim de óldi.
12Doslarım túndi kúndizge aylandıradı,
Qarańǵı bassa da: «Házir jarıq túsedi», – deydi.
13Eger óliler mákanı meniń úyim bolsa,
Tósegimdi qarańǵılıqqa salayın dep atırsam,
14Qábirge: «Sen meniń ákemseń», – desem,
Qurtlarǵa: «Sizler meniń anam hám apa-qarındaslarımsız», – desem,
15Onda meniń úmitimniń qayda bolǵanı?
Kim meniń úmitimdi kóre aladı?
16Úmitim meniń menen birge óliler mákanına bara ma?
Meniń menen birge topıraq qoynına kire me?
Copyright information for
KaaIBT22L