‏ Job 18

Bildadtıń ekinshi sózi

1Sonda shuwaxlı Bildad bılay dep juwap berdi:

2– Bunday sózlerdi aytıwdı qashan toqtatasızlar?
Aqılǵa kelińler, sońınan sóylesemiz.
3Ayup, sen ne ushın bizlerdi haywan dep sanap tursań?
Ne ushın kózińe aqmaq bolıp kórinip turmız?
4Ǵázep penen óz janıńdı jaraqatlap atırsań,
Seni dep jer beti qańırap qalıp,
Jartaslar óz ornınan qozǵalıwı kerek pe?

5Durıs, zalımnıń otı sónedi,
Hátte, ushqını da qalmaydı.
6Shatırındaǵı jaqtılıq qarańǵılıqqa aylanadı,
Joqarısında turǵan shırası da óship qaladı.
7Keń qádemleri qısqarıp,
Óz jobalarınıń qurbanına aylanadı.
8Óz ayaqları onı torǵa jetelep,
Ózi barıp, shuqırǵa túsedi.
9Duzaq onı tabanınan qısıp alıp,
Tor onı bekkem uslap aladı.
10Ol ushın jerge bir duzaq jip qoyılǵan,
Jolında onı qaqpan kútpekte.
11Ján-jaǵınan qorqınısh onıń zárresin ushırıp,
Hár adımında izinen quwıp júredi.
12Onıń kúshi ashlıqtan tawısılıp,
Súrnikken jerinde apat ta kútip turadı.
13Kesellik onıń terisin kemiredi,
Awır qástelik onıń múshelerin jep taslaydı.
14Onı qáwipsiz shatırınan suwırıp alıp,
Qorqınısh patshasınıń aldına alıp baradı.
15Zalımnıń shatırın órt jalmaydı,
Ol jasaǵan úyge ıssı kúkirt jawadı.
16Onıń tamırları qurǵap, kewip,
Shaqaları quwrap qaladı.
17Jer betinde ol eske alınbay,
Kóshelerde onıń atı óshedi.
18Ol jarıqtan túnekke aydalıp,
Bul dúnyadan quwıp jiberiledi.
19Xalıq arasında onnan ul da, aqlıq ta qalmaydı,
Ol jasaǵan jerde hesh kimi qalmaydı.
20Batıstaǵılar onıń táǵdirinen qorqınıshqa túsedi,
Shıǵıstaǵılardı qorqınısh biylep aladı.
21Awa, jawızlardıń jasaytuǵın jeri usı awhalǵa túsedi,
Qudaydı tanımaytuǵınlardıń mákanı usınday boladı.