‏ Job 19

Ayuptıń juwabı

1Sonda Ayup bılay dep juwap berdi:

2– Qashanǵa shekem meni qıynap,
Sózlerińiz benen meni ezesiz?
3Mine, meni on márte kemsittińiz,
Azar bere beriwge uyalmaysızlar ma?
4Eger meniń qáteleskenim ıras bolsa,
Onda ol meniń moynımda.
5Ózlerińizdi mennen joqarı qoyıp,
Shermende bolǵanımdı betime bassańız,
6Onda bilip qoyıń: Quday maǵan nahaqlıq qıldı,
Óz torın ústime tasladı.

7Men: «Bul – zorlıq», – dep baqırsam da,
Hesh kim juwap bermeydi.
Járdemge shaqıraman, biraq ádalatlıq joq.
8Quday jolıma bóget qoydı, óte almayman,
Soqpaqlarımdı qarańǵılıqqa búrkedi.
9Ol meni abırayımnan jurday qılıp,
Basımnan tajımdı sheship aldı.
10Meni ján-jaqtan qırıp joydı, tamam boldım,
Aǵashtı suwırǵanday etip, úmitimdi túp-tamırı menen suwırıp aldı.
11Onıń ǵázebi maǵan qarsı qaynamaqta,
Ol meni dushpan dep sanaydı.
12Onıń láshkerleri de maǵan qarsı atlanıp,
Meni qamal qılıw niyetinde,
Shatırım átirapına orda qurdı.

13Quday tuwısqanlarımdı mennen uzaqlastırıp,
Jaqınlarımdı jat qıldı.
14Aǵayin-tuwǵanlarım mennen júz burdı,
Doslarım meni umıttı.
15Qonaqlarım da, shorılarım da,
Meni jat sanap,
Ózge adamday qarasadı.
16Xızmetshimdi shaqırsam, juwap bermeydi,
Oǵan jalınıwım kerek.
17Hayalım demimnen tiksinedi,
Tuwısqanlarım mennen jerkenedi.
18Hátte, kishkene balalar da meni kemsitedi,
Ornımnan tursam, ústimnen kúledi.
19Jaqın doslarım mennen jerkenedi,
Súygenlerim mennen júz burdı.
20Et-terim súyegime jabısqan,
Tánimde shıqpas janım ǵana bar.

21Maǵan ashınıń, háy doslarım, maǵan ashınıń!
Meni Quday urdı!
22Nege Quday sıyaqlı sizler de izimnen qalmaysızlar?
Etime ele toymadıńız ba?

23Qáne endi, sózlerim jazıp qoyılsa,
Orama kitapqa jazıp qaldırılsa!
24Temir qálem hám qorǵasın menen,
Tasqa oyılıp máńgige qalsa!
25Biraq men bilemen, Ámeńgerim tiri,
Aqırında Ol men ushın jer betine kelip turadı.
26Denem buzılıp ketkennen keyin bolsa da,
Usı denem menen Qudaydı kóremen,
27Onı men ózim kóremen!
Onı kóretuǵın basqanıń emes, meniń óz kózlerim boladı.
Júregim qanamnan shıǵıp baratır!

28Eger sizler: «Bizler onı qalay quwdalaymız,
Aqırı, máseleniń túp-tamırı onda ǵoy», – deseńiz,
29Onda qılıshtan qorqıń,
Sebebi Qudaydıń ǵázebi basıńızǵa qılısh dóndiredi,
Sonda húkim etiwshiniń bar ekenin kóresiz.