Job 2 | KaaIBT22L | STEP | Basqa bir kúni iláhiy barlıqlar Qudaydıń aldına jáne kelgende, Onıń dárgayında turıw ushın, shaytan da olar menen birge kelgen edi.

‏ Job 2

Ayuptıń ekinshi ret sınalıwı

1 Basqa bir kúni iláhiy barlıqlar Qudaydıń aldına jáne kelgende, Onıń dárgayında turıw ushın, shaytan da olar menen birge kelgen edi. 2 Sonda Jaratqan Iye shaytannan:

– Sen qay jerden kiyatırsań? – dep soradı. Shaytan Jaratqan Iyege:

– Men jer betin gezip, onıń hámme jerin aylanıp shıqtım, – dep juwap berdi.

3 Jaratqan Iye shaytanǵa:

– Qulım Ayupqa ser saldıń ba? Jer betinde ol sıyaqlı minsiz, ádil, Mennen qorqatuǵın hám jamanlıqtan awlaq júretuǵın adam joq. Qara, ol ele minsizliginde bekkem turıptı. Al sen bolsań, ayıpsızdan ayıpsız onı joq qılıw ushın Meni iytermelediń, – dedi.

4 Sonda shaytan:

– Etke et degenindey, adam óz janı ushın qolındaǵısınıń bárin beredi. 5 Qolıńdı sozıp, et penen súyegine zıyan tiygizip kór, sonda Ayup júzińe tik qarap, nálet aytadı, – dedi.

6 Jaratqan Iye shaytanǵa:

– Yaqshı, onı seniń qolıńa beremen, tek onıń janın alma, – dedi.

7 Solay etip, shaytan Jaratqan Iyeniń dárgayınan shıǵıp ketti hám Ayuptı basınan ayaǵınıń ushına deyin awırtatuǵın jara menen qaplap tasladı. 8 Sonda Ayup kúldiń ortasında otırıp, gúzeniń sınıǵı menen jaraların qasıp otırǵan edi.

9 Hayalı oǵan kelip:

– Sen ele minsiz bolıwǵa tırısıp atırsań ba? Onnan da Qudaydı náletlep, keyin ólip qala ǵoysesh, – dedi.

10 Ayup oǵan:

– Sen aqılsız hayallar sıyaqlı sóylep tursań. Sonda ne, bizler Qudaydan tek jaqsılıqtı qabıl etip, jamanlıqtı qabıl etpewimiz kerek pe? – dep juwap berdi.

Sonshama azap shekse de, Ayuptıń awzınan gúna bolǵanday sóz shıqpadı.

Ayuptıń úsh dostısı

11 Ayuptıń úsh dostısı: temanlı Elifaz, shuwaxlı Bildad hám naamalı Sofar Ayuptıń basına túsken baxıtsızlıqları haqqında esitkende, jasap turǵan jerlerinen shıqtı hám bir jerde ushırasıp, jolǵa atlandı. Olar Ayuptıń qayǵısın bólisip, oǵan táselle beriw ushın onıń janına keldi. 12 Dosları Ayuptı uzaqtan kórip, onı zorǵa tanıdı. Sonda olar zar eńirep jıladı, kiyimlerin jırtıp, aspanǵa qaray topıraq shashıp, onı baslarına da septi. 13 Dosları jeti kún, jeti tún Ayup penen birge qara jerde otırdı. Hesh biri oǵan bir awız sóz sóylemedi, olar Ayuptıń sonshelli qattı qıynalıp atırǵanın kórip turǵan edi.