‏ Job 20

Sofardıń ekinshi sózi

1Sonda naamalı Sofar Ayupqa bılay dedi:

2– Qáweterli pikirlerim meni juwap beriwge májbúr etpekte,
Men qattı tınıshsızlanıp turman.
3Men kewlime tiyetuǵın ayıplawlarıńdı esitip turman,
Sonlıqtan aqılım men ushın juwap bermekte.

4Bilmes pe ediń áyyemnen beri,
Adamzat dúnyaǵa kelgenli beri,
5Zalımnıń shadlıǵı uzaqqa sozılmadı,
Qudaysızdıń quwanıshı bir sátlik ǵana.
6Onıń kókiregi kóklerge jetip,
Bası bultlarǵa tiyse de,
7Ol óziniń dáreti kibi máńgige joq boladı.
Onı kórgenler: «Ol qay jerde?» – dep soraydı.
8Ol tús sıyaqlı ǵayıp boladı, onı hesh kim taba almaydı,
Túnde kóringen elestey joǵalıp ketedi.
9Onı kórgen kózler endi kórmeydi,
Úy-ishindegilerge qaytıp kórinbeydi.
10Onıń balaları kámbaǵallardan mehir kútedi,
Urpaqları tartıp alǵan mal-dúnyasın qaytarıp beredi.
11Denesin toltırǵan jaslıq jigeri,
Onıń menen birge topıraqta jatadı.

12Jamanlıq onıń awzında tatlı kórinip,
Onı tiliniń astına jasırsa da,
13Onı qádirlep, jibermey,
Awzında uslap tursa da,
14Ol asqazanda aynıp,
Ishinde jılannıń uwına aylanadı.
15Ol jutqan baylıqların qaytarıp qusadı,
Quday olardı asqazanınan shıǵarıp aladı.
16Ol jılannıń uwın sorıydı,
Záhárli qara jılan onı shaǵıp óltiredi.
17Aǵar suwlardıń, sút hám pal aǵıp turǵan dáryalardıń,
Ráhátin kóre almaydı.
18Miynet penen eriskenlerin jemey atırıp, qaytarıp beredi,
Sawdadan tapqan paydasınan lázzet almaydı.
19Sebebi ol kámbaǵallardı ezip, olardı kózge ilmedi,
Ózi salmaǵan úylerdi tartıp aldı.

20Nápsiqawlıǵı tınıshlıq bermegenlikten,
Ózi unatatuǵın nárselerdiń hesh qaysısın saqlap qala almaydı.
21Ashkózliginen hesh nárse qaldırmaydı,
Sonlıqtan abadanlıǵı uzaqqa sozılmaydı.
22Dáwletli waqtında basına apat keledi,
Apatshılıqlar onı joq qıladı.
23Qarnın qampaytıp toltırıp bolǵanda,
Quday oǵan lawlaǵan ǵázebin shashıp,
Ústine ǵázebin jawınday jawdıradı.
24Zalım temir quraldan qashıp ketse de,
Onı qola oq tesip ótedi.
25Atılǵan oq arqasınan shıǵadı,
Ótin tesip ótken ushı jıltırap turadı,
Ólim qáwpi onı biylep aladı.
26Qara túnek onıń ǵáziynelerin kútpekte,
Adam jaqpaǵan ot onı jalmaydı,
Shatırında qalǵan sońǵı nárselerin de jaǵıp joq qıladı.
27Aspan onıń ayıbın áshkara etedi,
Jer oǵan qarsı bas kóteredi.
28Onıń úyindegi baylıǵı joq boladı,
Qudaydıń qáhárlenip, jazalaytuǵın kúni hámmesi seldey bolıp aǵıp ketedi.
29Mine, zalımnıń Qudaydan alatuǵın payı usı,
Qudaydıń oǵan beretuǵın miyrası usı.