‏ Job 21

Ayuptıń juwabı

1Sonda Ayup bılay dep juwap berdi:

2– Sózlerimdi dıqqat penen tıńlań,
Usı sizlerdiń maǵan bergen táselleńiz bolsın.
3Sabır qılıń, men de sóyleyin,
Sóylep bolǵanımnan keyin mazaq qılarsız.

4Maǵan kelsek, men ne adamǵa arız qılıp atırman ba?
Ne ushın shıdamsızlanbayın?
5Jaǵdayıma qarańlar, deneńiz túrshigedi,
Awzıńızdı qollarıńız benen jawıń.
6Jaǵdayımdı oylasam, qorqınısh biylep aladı,
Denemdi qaltıratpa basadı.
7Zalımlar ne ushın jasawın dawam etedi,
Qartayıp, hátte, kúsh-ǵayratı arta beredi?
8Balaları saw-salamat dógereginde,
Urpaqları kóz aldında júredi.
9Úyleri qáwip-qáterden awlaq boladı,
Qudaydıń hasası ústine dónbes.
10Buǵalarınıń tól qoyıwı hesh bosqa ketpes,
Sıyırları buzawlaydı, hesh ish taslamas.
11Balaların súriw kibi shıǵarıp jiberer,
Perzentleri ayaq oyınǵa túser.
12Dáp hám lira ▼

▼ Lira – barmaq penen shertiletuǵın tarlı saz ásbabı.

sestine qosılıp, qosıq aytar,
Sıbızǵı sestine qosılıp, kewil kóterer.
13Ómirleri zawqı-sapa menen ótip,
Óliler mákanına tınıshlıq penen keter.
14Sonda da zalımlar Qudayǵa bılay dep aytar: «Bizlerdi tınısh qoy!
Seniń jollarıńdı biliwdi qálemeymiz,
15Saǵan xızmet etetuǵınday Qúdireti kúshli Quday, Sen kim bolıpsań?
Saǵan duwa etiwden bizge ne payda?»
16Degen menen, olardıń abadanlıǵı óz qolınıń isi emes,
Zalımlardıń oy-qıyalları mennen awlaq bolsın!

17Qashan zalımlardıń shıraǵı sóngen edi?
Qashan olardıń basına apat dóngen edi?
Qashan Quday olarǵa ǵázeplenip, jazalaǵan edi?
18Qashan olar jel ushırǵan sabanday,
Yamasa dawıl ushırǵan qawıqtay bolǵan edi?
19Sizler: «Olardıń gúnaları ushın balaların jazalaydı», – deysizler,
Onnan da, Quday olardıń ózlerin jazalasın,
Bul olarǵa sabaq boladı.
20Olar opat bolǵanların óz kózleri menen kórsin,
Qúdireti kúshli Qudaydıń ǵázebin tatsın.
21Ómiri tawısılǵannan keyin,
Izinde qalǵan xojalıǵına ne bolsa da, olarǵa bári bir emes pe?

22Biraq, eń joqarıdaǵılardı da húkim etetuǵın Qudayǵa,
Kim aqıl úyrete aladı?
23Birew ólgeninshe, kúshke tolısar,
Tınısh hám qayǵısız jasar,
24Denesin may basıp,
Súyekleri kemik bolar.
25Ekinshisi qayǵıǵa batıp,
Ómirden jaqsılıq kórmey ótip keter.
26Aqırında, olar topıraqta birge jatar,
Ekewi de qurtqa jem bolar.

27Awa, men sizlerdiń oyıńızdı bilemen,
Niyetińiz maǵan zıyan keltiriw ekenin de bilemen.
28Sizler: «Sol aqsúyek adamnıń úyi qay jerde?
Zalımlardıń shatırları qay jerde?» – deysizler.
29Jolawshılardan soramadıńız ba?
Olar bergen gúwalıqlardı qabıllamadıńız ba?
30Zalım adam bále kelgen kúni aman qaladı,
Ǵázep kúni oǵan qutılıw ushın jol ashıladı.
31Júrgen jolın kim onıń betine aytadı,
Qılmısları ushın kim oǵan jaza beredi?
32Ol qábirge qoyılǵanda,
Qábiriniń basında gúzetshi turadı.
33Hámme adamlar onıń izine eredi,
Aldında júrgenlerdiń de san-sanaǵı joq.
Górdiń topıraǵı da oǵan jaǵımlı boladı.

34Bos gáplerińiz benen meni qalay jubatasız?
Bergen juwaplarıńızdıń hámmesi jalǵan.