‏ Job 22

Elifazdıń úshinshi sózi

1Sonda temanlı Elifaz bılay dedi:

2– Adam Qudayǵa payda keltire ala ma?
Hátte, eń aqıllı adam da Oǵan payda keltire alar ma edi?
3Seniń ádilligińnen Qúdireti kúshli Quday ne lázzet aladı?
Pák ómir tárizińnen Oǵan ne payda?
4Qudaydıń seni jazalawı, húkim etiwi,
Onnan qorqqanıń ushın ba?
5Kerisinshe, seniń jawızlıǵıń ullı,
Qılmıslarıń sheksiz bolǵanlıqtan emes pe?
6Sen tuwısqanlarıńnan jónsiz kepillik aldıń,
Kiyimlerin sheship alıp, jalańash qaldırdıń.
7Shóllegenge suw bermediń,
Ash bolǵanǵa nan bermediń.
8Bilegińniń kúshi menen úlkege iyelik ettiń,
Húrmetli adam bolıp jasadıń.
9Biraq jesir hayallardı qurı qol qaytardıń,
Jetimlerdiń qol-qanatın qayırdıń.
10Sonlıqtan átirapıńdı duzaqlar orap alǵan,
Tosattan seni qorqınısh baspaqta.
11Qarańǵılıq ishindeseń, kóre almaysań,
Seller seni ǵarq qılmaqta.

12Quday kóklerden de joqarıda emes pe?
Juldızlarǵa qara, olar qanshelli biyikte!
13Biraq sen: «Quday ne biledi?
Tereń qarańǵılıq ishinen húkim ete ala ma?
14Qoyıw bultlar Onı jasırıp tur, Ol bizlerdi kórmeydi,
Ol aspan gúmbezinde aylanıp júr», – deyseń.
15Sen ne, zalımlar júrgen,
Eski joldı tutpaqshımısań?
16Olar waqtınan burın joq qılındı,
Tiykarların sel aǵızıp ketti.
17Olar Qudayǵa: «Bizlerdi tınısh qoy!
Qúdireti kúshli Quday bizlerge ne qıla alar edi?» – dedi.
18Biraq olardıń úylerin bereketke toltırǵan Quday edi ǵoy!
Al men bolsam, zalımlardıń niyetinen awlaq bolaman.

19Ádiller olardıń qulaǵanın kórip, quwanar,
Ayıpsızlar olardıń ústinen kúlip, bılay der:
20«Dushpanlarımız joq qılındı,
Mal-múlki janıp, kúl boldı».

21Quday menen jaras, tınıshlıqta bol,
Sonda bereket tabarsań.
22Qudaydıń awzınan shıqqan kórsetpelerin qabıl etip,
Sózlerin júregińde saqla.
23Eger sen Qúdireti kúshli Qudayǵa qayta júz bursań,
Eski halıńa qaytarsań.
Shatırıńdı nahaqlıqtan tazalasań,
24Altındı jerdegi topıraqtay,
Ofir altının saydaǵı taslarday kórseń,
25Onda Qúdireti kúshli Qudaydıń Ózi seniń altınıń,
Qımbatbaha gúmisiń boladı.
26Sonda Qúdireti kúshli Qudaydan zawıq alarsań,
Qudayǵa basıńdı kóterip qaray alarsań.
27Oǵan duwa et, Ol seni esitedi,
Sen de óziń wáde etip ataǵanlarıńdı bereseń.
28Sonda neni niyet etseń, orınlanar,
Jollarıńa nur tógiler.
29Eger birew ayaq astı bolsa, sen: «Onı qollay gór», – dep aytasań,
Sonda Quday kemkewillilerdi qutqaradı.
30Ol, hátte, ayıplılardı da qutqaradı,
Olar seniń qollarıńnıń pákligi sebepli qutqarılar.