‏ Job 23

Ayuptıń juwabı

1Sonda Ayup bılay dep juwap berdi:

2– Búgin de aytar shaǵımım ashshı,
Zarlaǵanıma qaramastan, Quday awır jazalawın dawam etpekte.
3Ah, eger Onı qay jerden tabıwdı bilsem edi!
Ol taxtta otırǵan jerge bara alsam edi!
4Arzımdı Onıń aldında bayan etip,
Awzımdı toltırıp, dálillerimdi aytar edim.
5Onıń maǵan beretuǵın juwabın bilip,
Ne aytajaǵın túsiner edim.
6Ol ullı kúshi menen maǵan qarsı shıǵar ma edi?
Yaq, Onıń Ózi meni tıńlaǵan bolar edi.
7Ádil adam Onıń menen pikir talasıp biler edi,
Men de Qazım tárepinen máńgige aqlanar edim.

8Biraq shıǵısqa barsam, ol jerde Quday joq,
Batısqa barsam da, Onı taba almayman.
9Arqada bir nárse islese, men Onı kóre almayman,
Qublaǵa aylansa da, Onı bayqamayman.
10Biraq Quday men tutqan joldı jaqsı biledi,
Ol meni sınaqqa salǵanda, altınday pák bolıp shıǵaman.
11Sebebi ayaqlarım adımba-adım Onıń izinen júrdi,
Hesh jaqqa burılmay, Onıń jolın tuttım.
12Awzınan shıqqan buyrıqlarınan júz burmadım,
Onıń sózlerin kúndelikli tamaǵımnan da ústin qoydım.

13Quday qarar shıǵaradı, kim Oǵan qarsı shıǵa aladı?
Ol neni qálese, sonı qıladı.
14Men ushın shıǵarǵan qararın Ol aqırına shekem orınlaydı,
Bunday nárseler Onda ele kóp.
15Sonlıqtan Onıń dárgayında húreyim ushadı,
Bul haqqında oylasam, Onnan qorqaman.
16Quday meni qoyan júrek qılıp qoydı,
Qúdireti kúshli Quday meni qorqınıshqa salıp qoydı.
17Biraq júzimdi qaplaǵan tas túnek qarańǵılıq ta,
Meniń dawısımdı sóndire almadı.