Job 24 | KaaIBT22L | STEP | Ne ushın Qúdireti kúshli Quday húkim ushın waqıt belgilemeydi? Ne ushın Onı tanıǵanlar bul kúnlerdi hesh kórmeydi?

‏ Job 24

1 Ne ushın Qúdireti kúshli Quday húkim ushın waqıt belgilemeydi? Ne ushın Onı tanıǵanlar bul kúnlerdi hesh kórmeydi?
2 Zalımlar shegara belgilerin jıljıtıp,
Ózlestirip alǵan súriwlerin sol jaylawlarda baǵadı.
3 Jetimlerdiń eshegin tartıp aladı,
Jesirlerdiń ógizin kepillikke aladı.
4 Jarlılardı joldan quwıp shıǵaradı,
Úlkedegi barlıq kámbaǵallar bolsa, olardan jasırınıwǵa májbúr boladı.
5 Sonlıqtan kámbaǵallar shóldegi qulanlar sıyaqlı, erte iske shıǵıp,
Balaları ushın qula dúzden awqat izleydi.
6 Olar azıqların basqalardıń atızlarınan toplaydı,
Zalımlardıń júzim baǵınan qalǵan-qutqanların terip aladı.
7 Túndi kiyimsiz, jalańash ótkeredi,
Suwıqta jamılatuǵın hesh nársesi joq.
8 Tawda jawǵan jawınnan ústi-bası sel bolıp,
Baspanası bolmaǵanlıqtan, jılınıw ushın jartaslarǵa tıǵıladı.

9 Zalımlar jetimdi kókirek sútinen ayıradı,
Jarlınıń balasın qarızı ushın tartıp aladı.
10 Olar kiyimsiz, jalańash sandalıp júredi,
Ash qarınǵa biyday dástelerin tasıydı.
11 Diywallap qorshalǵan jerde záytúnnen may shıǵaradı,
Iskenjede júzim sıǵadı, biraq ózleri shólden harıǵan.
12 Qalalarda ólip baratırǵanlar nala shekpekte,
Jaraqatlanǵan janlar járdem sorap, páriyad etpekte,
Biraq, sonda da Quday olardıń jalbarınıwlarına kewil bólmeydi.

13 Nurǵa qarsı bas kóteretuǵınlar da bar,
Olar nurdıń jolın tanımas,
Onıń soqpaqlarınan da júrmes.
14 Jarlı hám kámbaǵaldı óltiriw ushın,
Qanxor kún batqanda ayaqqa turar,
Túnde bolsa, urlıq qılar.
15 Buzıqshılıq qılıwshınıń kózi ımırt jabılıwın kúter,
Ol: «Meni hesh kim kórmeydi», – dep oylap,
Júzin jawıp alar.
16 Qarańǵılıqta urılar úylerdi tonap,
Al kúndizleri óz úylerine tıǵılıp alar,
Olar nurdıń ne ekenin bilmes.
17 Olar ushın azan ólimdey qoyıw qarańǵılıq,
Al túnektiń qorqınıshları – olardıń dostı.

18 Biraq onday adamlar suw betindegi kóbiktey tez joq boladı,
Olardıń jer betindegi úlesine nálet jawǵan,
Hesh kim olardıń júzim baǵına ayaq baspas.
19 Íssı hawa hám qurǵaqshılıq qar suwların sorıp alǵanday,
Óliler mákanı da gúnakarlardı óz qushaǵına aladı.
20 Olardı, hátte, qursaǵına kótergen ana da umıtadı,
Qurtlar olardı ház etip jeydi,
Olardı endi hesh kim eslemeydi,
Solay etip, nahaq adamlar aǵash kibi sındırıladı.
21 Zalımlar perzenti joq, qaqsal hayalǵa zulımlıq qılar,
Jesirge hesh jaqsılıq qılmas.
22 Biraq Quday Óz kúshi menen kúshlilerdi joq qılar,
Olar bekkem ornalasıp alsa da, ómiri ushın úmiti bolmas.
23 Quday olarǵa qáwipsizlik berer, olar Oǵan súyener,
Biraq Qudaydıń kózleri olardıń jollarında.
24 Olar bir demge kóterilip, keyin joq bolar,
Tómenletiler, basqalar kibi ólip keter,
Masaq sıyaqlı quwrap qalar.

25 Solay emes pe? Jalǵan dep, kim meni ayıplay aladı?
Kim meniń gáplerimniń bos ekenin kórsete aladı?