Job 26
Ayuptıń juwabı
1Sonda Ayup bılay dep juwap berdi: 2– Ah, hálsizge sen qalay járdem berdiń!Kúshsizge qalay mádet berdiń!
3Aqılsızǵa qalay másláhát berdiń!
Danalıqtı qalay tereń túsindire aldıń!
4Bul sózlerdi aytıwǵa saǵan kim járdem berdi?
Sen arqalı sóylegen kimniń ruwxı?
5Suwlardıń hám olardaǵı tirishiliktiń astında mákan basqan,
Ólilerdiń ruwxları titireydi.
6Óliler mákanı Qudaydıń aldında jalańash,
Nabıt bolıw mákanınıń da japqıshı joq.
7Quday kóklerdiń arqa tárepin boslıqqa jayıp qoydı,
Jerdi de boslıqqa asıp qoydı.
8Ol suwlardı Óz bultlarınıń ishine salıp qoydı,
Biraq bultlar suwlardıń awırlıǵınan jırtılıp ketpeydi.
9Ol taxttıń ústin jawıp qoyıp,
Ústine Óz bultların jaydı.
10Suwlardıń betin shegaralap sızıp,
Jaqtılıqtı qarańǵılıqtan ayırdı.
11Quday abay etkende,
Aspannıń sútinleri qaltırasıp, titiresedi.
12Ol Óz kúshi menen teńizdi tınıshlandırdı,
Óz aqılı menen teńiz aydarhası Rahabtı joq qıldı.
13Óz demi menen bultlardı quwıp, aspandı ashıq qıldı,
Qolları menen qashıp baratırǵan úlken jılandı joq qıldı.
14Bul Onıń isleriniń kishkene bir bólegi ǵana,
Ol haqqında esitkenlerimiz sıbırlap aytılǵanday júdá az.
Onıń qúdiretiniń gúrkirewin kim túsine aladı?
Copyright information for
KaaIBT22L